Jeremiah 50

Ewe 1913 (Biblia alo Ŋɔŋlɔ Kɔkɔe La Le Eʋegbe Me 1913)

← Chapter 49 Jump to: Chapter 51 →

1Yehowa ƒe nya, si wògblɔ fe Babel kple Kaldea-nyigba ŋu to nyagblɔɖila Yeremya dzi la, enye si.

2Mido kpo le dukɔwo dome, miɖe gbe ƒã, eye mido aflaga ɖe dzi! Miɖe gbe ƒã, migaɣlae o! Migblɔ be: Woxɔ Babel, ŋukpe lé Bel, eye wogbã Merodax ƒu anyi! Ŋukpe lé woƒe legbawo, eye wogbã woƒe mawuwo!

3Elabena dukɔa ɖe ho ɖe wo ŋu tso anyiehe, ne wòado aƒedo woƒe anyigba, be amea ɖeke naganɔ edzi o; amegbetɔwo kple lãwo siaa si, eye wobu dzo.

4Yehowa be: Le ŋkeke mawo me, le ɣemaɣi la Israel-viwo kple Yuda-viwo siaa atrɔ agbɔ, eye woano avi dzi ava ɖi Yehowa, woƒe Mawu la.

5Woabia Zion ta ase, eye afima ma anɔ ŋku dzi na wo be: „Mina míaku ɖe Yehowa ŋu, eye míabla nu mava, si womaŋlɔ be akpɔ o!“

6Alẽ tatrawoe nye nye dukɔ; wo kplɔviwo flu wo, eye wokplɔ wo tra yi towo dzii, wole tsatsam tso to dzi yi togbɛ dzi, eye woŋlɔ wo miaƒe be.

7Amesiwo katã kpɔ wo la, ɖu wo, eye woƒe futɔwo gblɔ bena; Míeɖi to o, elabena ɖe wowɔ nuvɔ̃ ɖe Yehowa, woƒe dzɔdzɔenyenye ƒe lãnyiƒe, kple Yehowa, wo fofowo ƒe mɔkpɔkpɔ la ŋu.

8Misi tso Babel, miʋu tso Kaldea-nyigba dzi, eye minɔ abe agbowo le alẽhawo ŋgɔ ene!

9Elabena manyɔ dukɔ gãa ɖe tso anyiehe-nyigba dzi, eye makplɔ wo avɛ ɖe Babel ŋu, ne wòadze aʋa ɖe eŋu ahaxɔe; woƒe aŋukawo le abe kalẽtɔ dzeaɖaŋu tɔ ene, womedaa dadagbo o.

10Ale Kaldea azu nuhaha; amesiwo katã hãe la, aɖi ƒo, Yehowa ye gblɔe.

11Nye domenyinu halawo, minɔ dzidzɔ kpɔm, eye minɔ aseye tsom ko, miɖi adzrɔ abe nyinɔvi, si le lu tugum la ene, eye mixlɔ̃ abe sɔtsu ene.

12Ŋu akpe mia dada, mia no ƒe mo atsi dã; kpo ɖa, dukɔwo ƒe nuwuwu anye gbegbe, kuɖiɖi kple tagba!

13Le Yehowa ƒe dɔmedzoe ta azu aƒedo kple gbegbe ɖikaa, ale be amesiame, si to Babel ŋu yina la ƒe nu aku, eye wòado tsiã le woƒe abixɔxɔwo katã ta.

14Mi aŋutrɔdalawo katã, midze aʋa ɖe Babel ŋu godoo va kpe; mitee, eye migave nu le aŋutrɔ gbɔ o, elabena Yehowa ŋu wòwɔ nuvɔ̃ ɖo.

15Mitso ayiboopɛɛ ɖe eŋu godoo; ena ta, eƒe sɔtiwo ŋe dze eme, eye eƒe gliwo mũ, elabena Yehowa ƒe hlɔ̃biabia nye esia; mibia hlɔ̃e, eye miwɔ nɛ, abe alesi wòwɔ ene!

16Mitsrɔ̃ nuƒãla kple nuŋela le nuŋeɣi ɖa le Babel! Amesiame trɔ yi eƒe dukɔ gbɔ, eye amesiame si yi eƒe anyigba dzi le yi wuame la ta.

17Israel la, alẽ, si wonyã de gbe, eye dzatawo yɔ ɖe nu la wònye; gbã la Asur-fia ɖui, emegbe Babel-fia Nebukadnezar kuko eƒe ƒuwo.

18Eyata ale Yehowa Zebaot, Israel ƒe Mawu la, gblɔ esi: Kpɔ ɖa, mahe to na Babel-fia kple eƒe anyigba, abe alesi mehe to na Asur-fia ene.

19Magakplɔ Israel agbɔ va eƒe gbeɖuƒe, ne woaɖu gbe le Karmel dzi kple Basan, eye woaɖu nu aɖi ƒo le Efrayim-towo dzi kple Gilead.

20Yehowa be: Le ŋkeke mawo me, le ɣemaɣi la woadi Israel ƒe vodada, ke manɔ anyi o, eye womagakpɔ Yuda ƒe nuvɔ̃wo o, elabena matsɔe ake amesiwo makpɔtɔ ɖi.

21Yehowa be: Ho ɖe aglãdzela vivivowo ƒe anyigba kple toheheviwo ŋu, wu ame, eye natsrɔ̃ woƒe susɔeawo gbidigbidi, eye nawɔ nusiwo katã ŋu mede se na wò le la.

22Aʋaɣli kple gbegblẽ gã le anyigba dzi!

23Aleke anyigba blibo la ƒe zũ gbã, eye wòkaka ale? Aleke Babel zu ŋɔdzinu le dukɔwo dome ale?

24Babel, meɖo mɔ̃ na wò, ke mèdze sii o, eye wòɖe wò; asi tu wò, eye wòlé; wò, elabena Yehowa ye nèwɔ avu kple.

25Yehowa ʋu eƒe nudzraɖoƒe, eye wòɖe eƒe dziku ƒe aʋawɔnuwo do goe; elabena dɔ le; Aƒetɔ, Yehowa Zebaot ŋu le Kaldea-nyigba dzi.

26Mitso goawo katã me va ƒo ɖe edzi, miʋu nu le eƒe avawo nu, mihe trɔ ɖe anyi abe lubabla ene, eye mitsrɔ̃e gbidigbidi; migakpɔtɔ naneke ɖi nɛ o.

27Miwu woƒe nyitsuwo katã, mikplɔ wo yi wuƒee. Baba na wo, elabena woƒe toheɣi ɖo.

28Miƒu to anyi! Sisilawo kple amesiwo kpɔtɔ tso Babel-nyigba dzi va, be woaɖe gbe ƒã Yehowa, mía Mawu ƒe hlɔ̃biabia, eƒe hlɔ̃biabia ɖe eƒe gbedoxɔ nu le Zion!

29Miyɔ aŋutrɔdalawo ɖe Babel ŋu! Mi amesiwo katã hea da me, miɖe to ɖee godoo va kpe, amea ɖeke megakpɔtɔ o! Miɖo eƒe nuwɔna teƒe nɛ, miwɔ nɛ pɛpɛpɛ, abe alesi wòwɔ ene, elabena Yehowa, Israel ƒe kɔkɔetɔ la ŋu wòwɔ nu tovo ɖo.

30Yehowa be: Eyata woƒe ɖekakpuiwo atsi woƒe kpɔdomeewo, eye woƒe aʋawɔlawo katã atsrɔ̃ gbemagbe.

31Aƒetɔ, Yehowa Zebaot, be: Kpɔ ɖa, mado ɖe dziwò, wò ame tovo; elabena: wò ŋkeke ɖe, wò toheɣi ɖo.

32Ame tovo la akli nu adze anyi, eye amea ɖeke mafɔe ɖe tsitrenu o, matɔ dzo eƒe duwo, ne wòabi eƒe nutowo katã me.

33Ale Yehowa Zebaot gblɔ esi: Wote Israel-viwo kple Yuda-viwo siaa ɖe anyi, eye amesiwo katã ɖe aboyo wo la, va wo goŋgoŋ, gbe be, yewomaɖe asi le wo ŋu o.

34Ke wo ɖela sesẽ, eŋkɔ nye Yehowa Zebaot. Adrɔ̃ woƒe nya ade goe, ne wòana gbɔdzɔe anyigba, eye wòaɖe zi Babeltɔwo me.

35Yehowa be, yi neva Kaldeatɔwo, Babeltɔwo kple woƒe amegãwo kple woƒe nunyalawo dzi!

36Yi neva woƒe afakalawo dzi, ne woazu bometsilawo! Yi neva woƒe kalẽtɔwo dzi, ne dzi naɖe le wo ƒo!

37Yi neva woƒe sɔwo kple woƒe tasiaɖamwo kpakple amedzro, siwo katã le wo dome la dzi, ne woazu nyɔnugbɔmewo! Yi neva woƒe kesinɔnuwo dzi, ne woaha wo!

38Kuɖiɖi neva na woƒe tsiwo, ne woamie! Elabena legbawo ƒe anyigba wònye, eye wotsɔ ŋɔdzinuwo le adegbe ƒomee.

39Eyata gbedadiwo kple amegãxiwo atso aƒe ɖi, eye golowo anɔ afima; ame magatso aƒe ɖi akpɔ o, eye ame manɔ eme o, tso dzidzime yi dzidzime.

40Yehowa be: Ame matso aƒe ɖe afima alo amegbetɔvia ɖe nanɔ eme o, abe alesi Mawu trɔ Sodom kple Gomora kpakple woƒe aƒelikawo bu anyii ene.

41Kpɔ ɖa, dukɔa ɖe tso anyiehe gbɔna, eye dukɔ gãa ɖe kple fia geɖewo ho tso anyigba ƒe mlɔenu.

42Da kple akplɔ le wo si, ŋutasẽlawo wonye, eye womekpɔa nublanui o; woƒe ɣli le abe atsiaƒu ƒe gbeɖeɖe ene, wole sɔ dzi, eye wòbia akpa abe aʋawɔla ene ɖe wò Babel-nyɔnuvi ŋu.

43Esi Babel-fia se nya le wo ŋu la, eƒe asiwò ɖo agblɔ, vɔvɔ̃ ɖoe, eye wose veve abe nyɔnu léku ene.

44Kpɔ ɖa, ado tso Yordan ƒe aƒlawo me abe dzata ene ayi ɖe lãnyiƒe, si de ama ɖaa la; elabena manyãe ɖa le eŋu le aɖabaƒoƒo ɖeka me, eye amesi metia la, eya matsɔ ado enu. Elabena amekae so kplim, amekae akplɔm ayi ʋɔnui, eye amekae nye lãkplɔvi, si anɔ te ɖe nunye?

45Eyata mise Yehowa ƒe adaŋu, si wòde ɖe Babel ŋu, kple eƒe tame, si wòɖo ɖe Kaldea-nyigba ŋu: Vavã woakplɔ lã kudɔewo adzoe, eye woƒe lãnyiƒe ƒe nu aku ɖe wo ŋu.

46Anyigba ʋuʋu, eye wose konyifaɣli le dukɔwo dome le ɣli, si ɖi be, woxɔ Babel la ta.

← Chapter 49 Jump to: Chapter 51 →

Recommended Reading

Commentary Jeremiah Commentaries → Devotional Jeremiah Devotional Guide → Get This Bible Ewe (Biblia alo Ŋɔŋlɔ Kɔkɔe La Le Eʋegbe Me ) Study Bible →