Galatians 3

Guarani 1970 (Ñandeyara Ñe'ẽ)

← Chapter 2 Jump to: Chapter 4 →

1Che ryvy kuéra Galaciaygua, ¿mba'éichapa ikatu peẽ peichaite peve pende tavy? ¿Máva piko pene mbotavy ra'e, pene ñe'ẽrendu'ỹ haguã pe ñe'ẽ añetévape? Ore ñemoñe'ẽme niko rohechauka va'ekue peẽme pende resa tee renondépe Jesucrístope voi kurusu rehe.

2Peje chéve aipóramo kóva: ¿Perecibípa ra'e peẽ pe Tupã Ñandejára Espíritu pejapo rupi he'i háicha Moisés léype, terãpa pehendu ha perovia rupi pe ñe'ẽ?

3¿Mba'éicha piko ikatu peichaite peve pende tavy? ¿Peimo'ã nga'u piko peẽ pejapopataha hekópe pende reko yvypóra mbaretekue rupi, pe pemoñepyrũ va'ekue Espíritu rupi?

4¿Hetaite piko aipóramo pehasa asy rei ra'e? Pehasa asy rei rire ramo añete.

5Tupã Ñandejára ome'ẽ ramo guare peẽme Ije-Espíritu, ha ojapo ramo guare milagro pende apytépe, ¿mba'érehepa ojapo raka'e? Ndojapói peẽ pejapo hague rehe pe Moisés ley he'i háicha, pehendu ha perovia rupínte pe ñe'ẽ.

6He'i háicha Tupã Ñandejára Kuatiañe'ẽme Abraham rehe: “Abraham oguerovia Tupã Ñandejárape, ha upéva rupi ojerereko ichupe iculpa'ỹva ramo.”

7Upéva rehe, peẽ peikuaa vaerã umi ojeroviáva umíva ha'eha Abraham ñemoñare añeteguáva.

8Tupã Ñandejára Kuatiañe'ẽme he'i voi va'ekue Tupã Ñandejára oguereko va'erãha iculpa'ỹva ramo umi Israelita'ỹvape ha'e kuéra ojerovia ramo, ha upéicha ojekuaauka va'ekue Abrahámpe ko ikuaapyrã porã: “Opa tetã kuéra ojehovasa vaerã nde rupi.”

9Pe oguerovia haguéicha Abraham ha ojehovasa, opa ogueroviáva ojehovasa vaerã avei.

10Umi ojeroviáva iñe'ẽrendu rehe Moisés léype, oĩ maldición guýpe. Tupã Ñandejára Kuatiañe'ẽ he'ígui: “Opa umi ojapopa'ỹva opa oĩva pe Kuatiañe'ẽ ley reheguápe, oñemaldecíma.”

11Ndaipóri iculpa'ỹva Tupã Ñandejára renondépe ojapo rupi he'i háicha Moisés ley, Tupã Ñandejára Kuatiañe'ẽ niko he'i: “Upe ojererekóva iculpa'ỹva ramo, ojerovia rupi, oikove vaerã.”

12Ha pe Moisés ley ndaha'éi jerovia rehegua, he'i uvei kóicha: “Upe ojapopáva ko'ã mba'e, oikove vaerã ko'ã mba'e rupi.”

13Cristo ñande salva va'ekue pe ley maldicióngui, ha'e oñemoĩ pype maldición guýpe ñande rehehápe, he'i háicha Tupã Ñandejára Kuatiañe'ẽme: “Oñemaldecipyre opa oñemosaingóva yvyra máta rehe.”

14Upéva ojehu va'ekue ikatu haguã pe Tupã Ñandejára rovasare, he'i haguéicha Abrahámpe, ohupity Cristo Jesús rupi umi Israelita'ỹvape avei. Opavave jahupity haguã, jajerovia rupi, pe Espíritu Tupã Ñandejára oikuave'ẽ va'ekue.

15Che ryvy kuéra, amoĩta peẽme peteĩ ejemplo yvypóra reko rehegua: Peteĩ kuimba'e oheja ramo peteĩ testamento héra reheve, avave ndaikatúi oheja rei terã omoĩve mba'eve.

16Ko'ãga, katu, Tupã Ñandejára ome'ẽ va'ekue iñe'ẽ Abraham “ha iñemoñarépe.” Nde'íri “ha iñemoñare kuérape” tetápe ramo guáicha, he'ínte “ha ne ñemoñarépe”; ha upéva he'ise peteĩme añó, ha upéva Cristo.

17Pe ha'éva niko kóva: Tupã Ñandejára ome'ẽ va'ekue iñe'ẽ Abrahámpe ha omoañete va'ekue Moisés ley ou va'ekue cuatrociento treinta años uperire, ha ndaikatúi ombyai upe ñe'ẽme'ẽ ha oheja mba'eve'ỹva ramo pe Tupã Ñandejára promesa.

18Pe Tupã Ñandejára ome'ẽva Moisés ley rupi rire, nome'ẽi vaerã mo'ã mba'e kuave'ẽmbyréicha, upéicha rupi Tupã Ñandejára ome'ẽ va'ekue mba'evete'ỹ rehe Abrahámpe mba'e ichupe oikuave'ẽ va'ekue ramo.

19Aipóramo, ¿piko maerã oĩ pe Moisés ley? Oñemoĩ va'ekue uperire, ohechauka haguã umi pecado. Peteĩ mba'e sapy'aguánte va'ekue, oiko vaerã ou peve upe “iñemoñare” oñeme'ẽ hague pe promesa. Pe ley niko oñeme'ẽ va'ekue ángel kuéra rupi, ha Moisés po rupi.

20Opáichavo na tekotevẽi peteĩ oporomombytéva rehe peteĩme guarã añó, ha Tupã Ñandejára niko peteĩnte.

21¿He'ise nga'u piko upéva pe Moisés ley opu'ãha umi Tupã Ñandejára promesa rehe? ¡Mba'evéicharamo! Oñeme'ẽ rire peteĩ ley oporomoingovéva ikatu vaerã mo'ã añete jaiko iculpa'ỹva ramo jajapóvo pe ley he'i háicha.

22Tupã Ñandejára Kuatiañe'ẽme katu he'i opavave oĩmbaha preso, oñecondenambaha ipecádo kuéra rehe, ha upéva ikatu haguã opa umi ogueroviáva ohupity pe Tupã Ñandejára oikuave'ẽ va'ekue, ojerovia rupi Cristo Jesús rehe.

23Opáichavo, Jesucristo ou mboyve, pe ley ñande rereko va'ekue ipoguýpe, ñaha'arõ aja ojekuaauka peve pe jerovia.

24Ha upéicha pe ley ha'ete ku tembiguái mitã rehe oñangarekóva. Oñangareko va'ekue ñande rehe ou peve Cristo, ikatu haguã jajerereko iculpa'ỹva ramo jajeroviávo hese.

25Ha ko'ãga oguahẽma ramo pe Cristo rehe jajerovia haguã ára, nañaimevéima tembiguái ñangareko guýpe.

26Opavave peẽ niko Tupã Ñandejára ra'y pejerovia rupi Cristo Jesús rehe.

27Opavave peẽ pejebautiza va'ekue peñemopeteĩgui Cristo ndive, peñemonde Crístogui.

28Ndaiporivéima Israelita terã griégova, tembiguái terã tembiguai'ỹva, kuimba'e terã kuña, opavave peẽ peteĩ añóguima peñemopeteĩ rupi Cristo Jesús ndive.

29Ha peẽ Cristo rehegua ramo niko Abraham ñemoñare, ha pehupity vaerã pe Tupã Ñandejára oikuave'ẽ va'ekue ichupe.

← Chapter 2 Jump to: Chapter 4 →