Daniel 10

Guarani 2015 (Ñanderuete Ñe’ẽ Porã 2015)

← Chapter 9 Jump to: Chapter 11 →

1Círo, pe Pérsia retã ruvicha, oisãmbyhy aja hi’áño mbohapyhápe ojehechauka Daniélpe, oñembohérava avei Beltsasar, peteĩ ñe’ẽ. Ha pe ñe’ẽ añetegua oñe’ẽ peteĩ ñorãirõguasu rehe. Daniel oma’ẽ porã katu ko’ã mba’e rehe ojehechaukáva ichupe oikuaa hag̃ua mba’epa he’ise.

2Umi ára umívape che, Daniel, añembyasyhápe aikova’ekue mbohapy semána aja.

3Nda’úi tembi’u héva, so’o ni víno ndoikéi che jurúpe ha namonái che rete rehe mba’e ryakuã porã ohasa peve 3 semána aja.

4Ha pe ára 24-hápe, jasy peteĩha jave, aĩ pe ysyryguasu Tígris rembe’ýpe.

5Ha ajesaupívo, ahecha peteĩ kuimba’épe oñemondéva ao morotĩme (líno) ha ojeku’akuáva óro Ufaz peguaréguigua.

6Hete ojogua ita vera sa’yju ha hovýpe, hova ha’ete ku aratiri, hesakuéra ku tata hendývaicha, ijyva ha ipykuéra ku brónce oñemboverapyrévaicha, ha iñe’ẽ ryapu ku atyguasu ñe’ẽ ryapúicha.

7Che, Daniel, ahechánte umi mba’e payetépe (visiónpe), ha umi kuimba’e chendive oĩva ndohechái mba’eve, oñemondyietégui okañymba hikuái.

8Chéve g̃uarãnte ojehechauka umi mba’e, chekangypa katu avei ha mba’eveichagua mbarete ndaguerekovéi.

9Ha ahendu peteĩ ñe’ẽ ryapu, ha ahendúvo pe ñe’ẽ ryapu ha’a yvýre ovypývo, peteĩ omanóvaicha; ha ovapývo apyta.

10Ha péina ápe peteĩ po opoko cherehe, chemopu’ã mbeguekatu, che po ha che py ári.

11Ha ha’e he’i chéve: Daniel, kuimba’e ojehayhuetéva, ejapysaka porãke ko’ã ñe’ẽ ha’étava ndéve rehe, ha eñembo’y, ko’ág̃a añemboúgui ne rendápe. Péicha he’i chéve, añembo’y jave ryryipópe.

12Upéramo ha’e he’i chéve: Daniel, ani rekyhyjétei, rembosako’iha ára guive ndepy’apy, reikuaa porã hag̃ua umi mba’e ha reñemomirĩ nde Jára renondépe, oñehendúma ne ñe’ẽ, ha umi mba’e ereva’ekue rehe Ñanderuete chembou ne rendápe.

13Pe Pérsia retã ruvicha pytu vai katu oñemoĩ cherehe ha chejoko 21 ára pukukue; upéi Miguel, yvága rembiguaiguasu ou chepytyvõ hag̃ua, ha opyta Pérsia retã ruvicha ndive (che aju hag̃ua ne rendápe),

14aikuaauka hag̃ua ndéve umi mba’e ojehútava ne retãme umi ára pahápe, ha umi mba’e ojehechaukava’ekue ndéve oñe’ẽ umi ára umívare.

15Ha’e he’i jave chéve ko’ã ñe’ẽ, che ama’ẽ yvy rehe ha apyta iñe’ẽngúvaicha.

16Ha péina ápe, ojoguáva peteĩ kuimba’épe opoko che rembe rehe, ha upévo ajejurupe’a ha añe’ẽ che renondépe oĩvape, ha’évo: Che jára umi mba’e ojehechaukava’ekue rupi ou chéve ko mba’asy ha chekangypa.

17Ha mba’éichapa che, peteĩ tembiguáinte, ikatu añe’ẽ che Jára ndive, chekangypa, ha ndachepytuhẽvéi.

18Ha pe ojoguáva peteĩ kuimba’épe katu opoko jevy cherehe ha chemombarete,

19ha he’i chéve: Nde rejehayhuetéva, ani rekyhyjétei, py’aguapy toĩ nendive, eñeha’ã ha eñemokyre’ỹ. Ha ha’e oñe’ẽ jave chéve, chembarete jevy ahávo, ha che ha’e: Eñe’ẽ katu, che Jára, nde chemombarete jevýma.

20Ha ha’e he’i chéve: Reikuaápa mba’érehepa aju ne rendápe. Ko’ág̃a aha jevyva’erã añorãirõ hag̃ua Pérsia pegua mburuvicha pytu vai ndive; ha aikopávo hendive pe Grécia pegua retã ruvicha pytu vai oútama.

21Che amombe’use raẽ ndéve umi mba’e oĩva pe kuatiañe’ẽ añeteguápe, avave katu nachepytyvõi añorãirõ hag̃ua hendivekuéra, pende yvága rembiguaiguasu Miguel añoiténte.

← Chapter 9 Jump to: Chapter 11 →