Daniel 12

Guarani 2015 (Ñanderuete Ñe’ẽ Porã 2015)

← Chapter 11 Jump to:

1Umi ára umívape opu’ãva’erã Miguel, peteĩ yvága rembiguái ruvicha, oñangarekóva ne retã ra’ykuéra rehe ha umi árape og̃uahẽta jehasa asyguasuete araka’eve oiko’ỹ haguéicha, oĩ guive tapichakuéra ko yvy apére, ha umi árape ojesalváta ne retãyguakuéra, opaite téra ojehaíva guive pe kuatiañe’ẽme.

2Ha heta umi omanómava yvy guýpe oñemombáyta, peteĩ atýra tekovépe g̃uarã ha ambue atýra ñemotĩ ha py’a tarova tapia g̃uarã.

3Umi mbo’ehára omimbíta, pe yvága omimbi háicha; ha umi oipytyvõva hapichápe ojohu hag̃ua pe justícia Ñanderuete ndive, omimbiva’erã tapia g̃uarã ku mbyjáicha.

4Ha nde, Daniel, ejokua hatã ha eñongatu porã ko kuatiañe’ẽ umi ára paha peve. Heta oĩta oipyguaráva ágotyo pégotyo, ha upépe ae oñemyesakãve ohóvo.

5Ha che, Daniel, ama’ẽ ha péina ápe ahecha ambue mokõi ángel oñembo’ýva ysyry rembe’ýpe, peteĩ ko ysyry rembe’ýpe ha pe ambue ysyry mboypýri.

6Ha peteĩva ko’ãvagui oporandu pe ángel línogui (ao morotĩ) oñemondévape, oĩvahína pe ysyry ári: Araka’épa ko’ã mba’e techapyrãva opáta.

7Ha ahendu pe ángel oñemondéva ao línope, oĩva pe ysyry ári, omopu’ã jave ijakatúa ha ijasu yvága gotýo, ha ome’ẽ iñe’ẽ omoañetéva Ñanderuete renondépe, pe Oikove tapia g̃uarãva, he’i: Hi’aréta mbohapy áño imédio. Upe ára upévape opava’erã pe mbyaihára pu’aka Israel retãme.

8Ha che ahendupa ramojepe, nahesakã porãi chéve, upévagui aporandu: Che Jára, mba’eichaitépa opava’erã ko’ã mba’e ko’ãva.

9Ha ha’e he’i chéve: Tereho, Daniel, ko’ã ñe’ẽ ko’ãva ningo oñemboty ha oñeñongatu ñemiháme og̃uahẽ meve umi ára paha.

10Heta ojeporavóva oñemopotĩuka ha oñemomorotĩuka hag̃ua; umi iñaña rekóva katu oikovéta iñaña rekópe, ijapytépe avave nahesakãmo’ãi; umi heko potĩva katu oikuaáta ha hesakã porãta umi mba’e ojehúva rupi.

11Ojejokóta umi kuave’ẽmby ojejapóva meme árape ha hendaguépe oñemopu’ãta ambue jára ra’ãnga, ha pe ára guive ohasáta 1290 ára (día).

12Ovy’aite upe oha’ãrõva ha ohupitýtava 1.335 ára peve.

13Ha nde, Daniel, tereho epytu’u og̃uahẽ meve pe ára paha, upe ára upévape nde repu’ã jevýta oñeme’ẽ hag̃ua ndéve ne mba’erã.

← Chapter 11 Jump to: