Daniel 3

Guarani 2015 (Ñanderuete Ñe’ẽ Porã 2015)

← Chapter 2 Jump to: Chapter 4 →

1Pe tetã ruvicha Nabucodonosor ojapo peteĩ ta’ãnga oroguiguáva, ijyvate 26,25 métro, ipe 2,62 métro. Ha kóa ha’e omopu’ãuka Dura ñúme, Babilónia departaméntope.

2Upérõ pe tetã ruvicha Nabucodonosor ombyatyukapa umi departaménto sãmbyhyharakuérape, mburuvichakuéra, umi mba’erepy ñangarekohára, umi tekombo’ehára, umi mbojovakehára ha umi mburuvicha michĩvape jepe, oupa hag̃ua pe ta’ãnga renondépe, Nabucodonosor omopu’ãukava’ekue.

3Upéicha oñembyatypa umi departaménto sãmbyhyhára, umi mburuvicha, umi mba’erepy ñangarekohára, tekombo’eharakuéra, umi mbojovakehára ha umi mburuvicha michĩva, tetã ruvicha Nabucodonosor ta’ãnga renondépe, ha ñembo’yhápe oĩ joa hikuái pe ta’ãnga renondépe, Nabucodonosor omopu’ãukava’ekue.

4Upérõ peteĩ tetã ruvicha rembiguái hatã osapukái ha he’i: Pehendúke, peẽ tetãyguakuéra ha opaite tetã ambueygua, pejapopa hekoitépe che ha’étava guive peẽme tetã ruvichaguasu rérape.

5Pehendu vove pe turu, pe mimby, pe mba’epu pararã, pe árpa, pe mbaraka, ha opaichagua mba’epu, peñesũ joava’erã ha pemomba’eguasu joava’erã pe ta’ãnga oroguiguápe, tetã ruvicha Nabucodonosor omopu’ãukava’ekue.

6Ha oimeraẽ oñesũ’ỹva ha omomba’eguasu’ỹva, pya’e oñemombóta tatakua hendývape.

7Upérõ opaite tetãygua ha tetã ambueygua oñesũ ohendúvo pe turupu, pe mimby, pe mba’epu pararã, pe árpa, pe mbaraka, ha opaite ambue mba’epu, omomba’eguasu hag̃ua pe ta’ãnga oroguiguápe, tetã ruvicha Nabucodonosor omopu’ãva’ekue.

8Umi ára umívape Caldeayguakuéra oñe’ẽ vai Judayguakuéra rehe,

9ha he’i hikuái tetã ruvicha Nabucodonosórpe: Tetã ruvicha tereikove tapia g̃uarã,

10nde, ore retã ruvicha, remoĩma peteĩ tembiapoukapy mayma tetãyguakuérape g̃uarã ha ohendu vove pe turu, pe mimby, pe mba’epu pararã, pe árpa, pe mbaraka, ha opaichagua ambue mba’epu, oñesũva’erã omomba’eguasu hag̃ua ko ta’ãnga oroguiguávape,

11ha upe oñesũ’ỹva ha omomba’eguasu’ỹva, toñemombo pe tatakua hendývape.

12Oĩ ningo kuimba’ekuéra Juda pegua, nde remoĩva’ekue Babilónia departaménto sãmbyhyhára ramo: Sadrac, Mesac ha Abed-négo, ko’ã kuimba’e, tetã ruvicha nande’apói mba’eve ramo, nomomba’eguasúigui nde járape ha noñesũi avei pe ta’ãnga oroguiguáva renondépe nde remopu’ãukava’ekue.

13Upéramo Nabucodonosor ipochy ha ñeko’õipópe ogueruka Sadrac, Mesac ha Abed-négope, ha pya’e ojegueru ichupekuéra tetã ruvicha renondépe.

14Ha Nabucodonosor he’i ichupekuéra: Añete piko Sadrac, Mesac ha Abed-négo, peẽ napemomba’eguasúi che járape, ha napeñesũi pe ta’ãnga oroguiguáva che amopu’ãukava’ekue renondépe.

15Ko’ág̃a, pehendúvo pe turu, pe mimby, pe mba’epu pararã, pe árpa, pe mbaraka, ha opaichagua ambue mba’epu, peñesũva’erã pemomba’eguasu hag̃ua pe ta’ãnga che ajapoukava’ekue. Ha napemomba’eguasuséi ramo pe ta’ãngápe, pe hóra pévape peñemombóta tatakua hendýva ruguápe, ha mba’eichagua Jára piko ikatu pendesalva che pógui.

16Upérõ Sadrac, Mesac ha Abed-négo he’i tetã ruvicha Nabucodonosórpe: Natekotevẽi ro’e ndéve mba’eve ko’ã mba’e rehe.

17Eikuaa porãnte, ore Jára, ore romomba’eguasúva, oreguenohẽse ramo nde ratakua hendývagui ha nde pógui, Ha’e ikatu ojapo.

18Ha Ha’e ndaoresalvaséi ramojepe, eikuaa porãke nde ore retã ruvicha, ore ndoroikomo’ãi nde jára rembiguái ramo, ha noromomba’eguasumo’ãi avei pe ta’ãnga nde remopu’ãukava’ekue.

19Ha Nabucodonosor ipochyeterei ha hova oñemoambuepa ipochy hendýgui Sadrac, Mesac ha Abed-négo rehe, ha ombyakukave pe tatakua 7 jevyve jepiguágui.

20Ha Nabucodonosor he’i ikuimba’ekuéra imbaretevévape, oĩva isoldadokuéra apytépe, ojokua hag̃ua Sadrac, Mesac ha Abed-négope, oity hag̃ua ichupekuéra tatakua hendývape.

21Upérõ ojejokua umi kuimba’épe ipóncho reheve, isapatukuéra, iñakã hojakuéra ha ambue ijaokuéra reheve, ha oñemombo ichupekuéra pe tatakua hendývape.

22Pe tetã ruvicha oipota ojejapo pya’e iterei iñe’ẽ, ha ombyakuetereígui hikuái pe tatakua, umi soldádo ohupiva’ekue Sadrac, Mesac ha Abed-négope omano pe tata rendy rupi.

23Ha Sadrac, Mesac ha Abed-négo ho’a pe tatakua rendýpe ojejokua hagueichaite.

24Ha pe tetã ruvicha Nabucodonosor oñemondyiete ohecháva rehe ha pya’eiterei opu’ã ha he’i hekombo’eharakuérape: Ndajaitýi piko ra’e mbohapy kuimba’e jejokuapyreva tatakuápe. Ha he’i hikuái Nabucodonosórpe: Upeichaite ningo, ore retã ruvicha.

25Ha ha’e he’i: Mba’éicha rupi piko ahecha irundy kuimba’e ojejokua’ỹvape, oguatáva pe tata mbyte rupi ojehu’ỹre ichupekuéra mba’eve ivaíva, ha pe irundyha ojogua umi yvága jarakuéra ra’ýpe (ángel).

26Upémaramo Nabucodonosor oñemboja pe tatakua hendýva rokẽme ha he’i: Sadrac, Mesac ha Abed-négope, peẽ ningo Yvagakuéra Jára tuichavéva rembiguái, peju ha pesẽ tatakuágui. Upérõ Sadrac, Mesac ha Abed-négo osẽ pe tata mbytégui.

27Ha oñembyatypa umi mburuvicha, tetã sãmbyhyharakuéra ha tetã ruvicha rekombo’ehakuéra, ha oma’ẽ hikuái ko’ã kuimba’e rehe, ha mba’éichapa pe tata ndoguerekói mba’eveichagua pu’aka hetekuéra rehe, ha iñakã rague jepeve ndokáiri, ijaokuérape ndojehúi mba’evete, ha tata ryakuã jepeve noñehetũi hesekuéra.

28Upémaramo Nabucodonosor he’i: Toñemomba’eguasu: Sadrac, Mesac ha Abed-négo Járape, ombouva’ekue ijyvága rembiguái osalva hag̃ua hembiguaikuérape ojeroviágui hese, ha ndojapoiva’ekue tetã ruvicha rembiapoukapy, ha omanosénte uvei hikuái, oiko rãngue ambue jára rembiguái ramo, omomba’eguasuséguinte Ijarateépe.

29Upévare amoĩ tembiapoukapy pyahu opaite tetãnguérape g̃uarã, ha opaichagua tetã oñe’ẽva ambue ñe’ẽme: Upe oñe’ẽ vaíva Sadrac, Mesac ha Abednégo Jára rehe, toñepehe’ãmba, ha hóga toñembotapere; ndaipórigui ambue jára ikatúva oporosalva Ijáraicha.

30Uperire tetã ruvicha ombotuichaiteve Sadrac, Mesac ha Abed-négope ha ome’ẽ jevy ichupekuéra Babilónia departaméntope oisãmbyhy hag̃ua.

← Chapter 2 Jump to: Chapter 4 →