Daniel 4

Guarani 2015 (Ñanderuete Ñe’ẽ Porã 2015)

← Chapter 3 Jump to: Chapter 5 →

1Upéicha che, Nabucodonosor, amoherakuã opaite tetãnguérape ha opaichagua tetã oñe’ẽva ambue ñe’ẽme ko yvy apére oikóva guive: Py’aguapy toñemboheta hetave peẽme.

2Iporã ningo, che amombe’u peẽme techapyrã (señal) ha milágro pe Yvagakuéra Jára tuichavéva ojapova’ekue cherehe.

3Hetaiterei techapyrã ha milágro tuicháva ojapo che rekovépe. Ipu’aka ndopamo’ãi. Hetãguasuteéva oikóta tapia g̃uarã, ha imburuvicha reko oikóta peteĩ ára atyguasu guive ambue ára atyguasu peve.

4Che, Nabucodonosor, aĩkuri py’aguapypópe ha po’a pa’ũme che rogaguasúpe,

5upérõ ahecha peteĩ che ke pegua chemondyiva’ekue ajepyso jave che rupápe, umi mba’e che akãme oúva chejopyeterei ha umi che páype (vision) chemyangekõi vaiete.

6Upévagui ahenoiuka opaite Babiloniaygua iñarandúva guivépe, ohechauka hag̃ua chéve mba’épa he’ise che képe ahechava’ekue.

7Ha ou umi iñarandúva, umi oma’ẽva mbyja rapekuéra rehe, umi Caldeaygua (umi imba’ekuaáva) ha umi paje apohára, ha amombe’u ichupekuéra che ke peguare, ha’ekuéra katu ndaikatúi oikuaauka chéve mba’épa he’ise.

8Ipahápe ou che rendápe Daniel, hérava Beltsasar, che ahenoiva’ekue ichupe che jára réraicha, ha ipype oĩ yvága jarakuéra Pytu Porãite. Ha amombe’u ichupe che ke peguare, ha’évo:

9Beltsasar, nde ningo umi iñarandúva ruvicha, ahechakuaáma ndepype oĩha yvága jarakuéra Pytu Porãite, ha ndehegui nokañýi mba’eveichagua iñemimbýva, emombe’úna mba’épa he’ise umi mba’e ahechava’ekue che képe:

10Pe ahechava’ekue payetépe ou che akãme aĩ ramoguare che rupápe, kóva: Ahecha ko yvy tuichakue mbytépe peteĩ yvyra ijyvateitereíva.

11Ko yvyra okakuaave ha oñemombarete ohóvo, hu’ã og̃uahẽ yvága peve, ha ikatu ojehecha ko yvyra kóva opaite yvy apýra guive.

12Hoguekuéra iporãiterei ha hi’a heta, ha opavave okaru ichugui. Ikuarahy’ã guýpe opytu’u mymba ñu rupigua, ha hakã rehe ojaitypo guyrakuéra, ha opaichagua tekove okaru hese.

13Ha ajepy’amongeta jave pe ojehechaukáva chéve payete rehe, aĩ jave che rupápe, péina ápe oguejy yvágagui peteĩ temimbou heko porãva oma’ẽva opaite mba’e rehe.

14Ha péva osapukái hatã he’ívo: Peity pe yvyra, peikytĩ hakãnguéra, pehogue’o ha pemosarambi hi’akue, tokañymba umi mymba oĩva iguýpe ha guyrakuéra tovevepa hakãnguéragui.

15Hapoguasu katu pehejáta yvy rehe, ojejokuáta hiérro ha bróncepe pe ñu rupigua ñananguéra apytépe, tahykue ysapy araguiguápe, ha mymbakuéra apytépe katu tokaru kapi’ipére.

16Ikuimba’e py’a oĩva ipype toñemoambue ha toñeme’ẽ ichupe mymba hesaitéva py’a ohasa peve 7 áño.

17Upéicha pe yvága remimbou ogueru ko yvága rembiapoukapy, umi oikovéva guive ko yvy apére oikuaa hag̃ua Yvagakuéra Jára oisãmbyhyha yvy tuichakue retãnguérape ha Ha’e omboguapy tetã ruvicha guapyhaguasúpe Ha’e oipotáva guivépe, Ha’e oiporavo ramojepe pe kuimba’e imichĩvévape.

18Ko’ã mba’e che, Nabucodonosor, Babilónia retã ruvicha, ahecha che képe, ha nde Beltsasar emombe’u chéve mba’épa péva he’ise, che retãygua iñaranduvéva jepe ndaikatúi ohechauka chéve mba’épa he’ise ko che kepeguáre: Nde ningo ikatu, oĩgui ndepype Yvága Jarakuéra Pytu Porãite.

19Upéramo Daniel, hérava Beltsasar, opyta are ijurujái, ha omyangekõi ichupe pe iñakãme og̃uahẽva. Pe tetã ruvicha oñe’ẽ katu ichupe ha he’i: Beltsasar, ani nemyangekõi pe ke peguare he’iséva. Ha Beltsasar he’i ichupe: Nde, che jára, nde ke pegua toiko nderehe ija’e’ỹvare, ha upe he’iséva tojehu umi oñemoĩvape nderehe.

20Upe yvyra rehechava’ekue, okakuaa ha oñemombareteve ohóvo, hu’ã og̃uahẽ yvága peve, ha ojehechakuaáma opaite yvy apýra guive,

21hoguekuéra iporãiteva’ekue, hi’a hetaiterei, ha maymávape g̃uarã ome’ẽ hembi’urã, ha iguýpe oiko umi mymba ñu rupigua, ha hakã rehe ojaitypo guyrakuéra.

22Che retã ruvicha, nde voi ningo pe yvyra, nde rekakuaa, reñemombarete ha reñembotuicha ne retã ruvicha reko og̃uahẽ yvága peve, rembopoguýgui opaite tetãnguérape.

23Ha pe yvága remimbou oguejyva’ekue ha tetã ruvicha ohechava’ekuépe he’i: Peikytĩ pe yvyra ha pembosa’ipa, hapo guasu katu peheja yvy guýpe ha pejokua ichupe cadéna hiérro ha bronceguiguápe ha toiko ñanandy mbytépe; tahykue ha’e ysapýpe, ha mymbakuéra ñu rupigua ndive tokaru kapi’ipére ohasa peve 7 áño.

24Ko’ã mba’e ningo he’ise nde kepeguare, ha Yvagakuéra Jára he’iuka ndéve ko’ã mba’e ojehútava Babilónia retã ruvicha rekoverãme.

25Reñemosẽta ne retãyguakuéra apytégui, ha reikóta mymbakuéra ñu rupiguáva ndive, kapi’ipére rekarúta guéicha, rejahúta ára pegua ysapýpe, ohasa peve 7 áño, rehechakuaa peve pe Ijyvatetéva poguýpe oĩmbaha yvy tuichakue retãnguéra, ha Ha’e ome’ẽha pe tetã ruvicha guapyha Ha’e ome’ẽsévape.

26Ha pe yvyra rapoguasu ojehejáva yvyguýpe katu he’ise ne retã ruvicha guapyha opyta jevytaha ndéve, rehechakuaa peve Yvága Jára oisãmbyhyha opaite mba’e ko yvy ári.

27Upévagui ajerure che retã ruvichápe, ejapo che ha’étava ndéve: Ne angaipa rendaguépe eporoporiahuvereko ha embojovake hekópe, ha nde reko ñaña rendaguépe eipytyvõ umi imboriahúvape, umi mba’e rupi ikatu rembopukumive jevy nde py’aguapy.

28Opaite ko’ã mba’e oñemombe’u haguéicha ojehu tetã ruvicha Nabucodonosor rekovépe.

29Ohasa rire peteĩ áño Nabucodonosor oguata hogaguasu apére oĩva Babilónia tavaguasúpe,

30ha he’i sapy’a: Ndachéi piko amopu’ãva’ekue ko tavaguasu ha che rogaguasu che pu’aka mbarete rupi, toñemoherakuã porã opárupi che réra tuichaitéva.

31Ha Nabucodonosor jurúpe oĩ ramoguare gueteri iñe’ẽ, yvágagui ou peteĩ ñe’ẽ he’íva: Oje’e ndéve, tetã ruvicha Nabucodonosor ojepe’amaha ndehegui ne retã ruvicha guapyha,

32ha reñemosẽtaha ne retãyguakuéra apytégui, mymbakuéra ñu rupigua ndive reikóta, vakakuéra okaru háicha nde rekarúta avei, 7 áño ohasava’erã rehechakuaa peve pe Ijyvatetéva poguýpe oĩha tetã ruvicha guapyhakuéra ha umía Ha’e ome’ẽ Ha’e ome’ẽsévape.

33Ha upevove ojehu pe ñe’ẽ oñemombe’u haguéicha Nabucodonosórpe, ha oñemosẽ ichupe hetãyguakuéra apytégui, ha vakáicha Nabucodonosor okaru kapi’ipére, ha hete hykuepa ysapy ára peguápe, hague okakuaa ku ñapykani raguéicha, ha ipyapẽnguéra guyra pyapẽicha.

34Ha ohasapávo umi áño, che, Nabucodonosor, ajesaupi yvága rehe, ha che akã porã jevýma, upéi agradece pe Ijyvatetévape, amomba’eguasu ha amboete pe tapia Oikovévape, ha ipu’akapa ndaijapýrai, ha hetãguasu ndopamo’ãi araka’eve.

35Henondépe opaite tetãygua ikangypa, Ha’e ojapopa ojaposéva ijyvága pegua rembiguái aty ndive ha yvyariguakuéra ndaikatúi he’i ichupe: Mba’éiko rejapo.

36Upepete che akã okuera jevy ha oñeme’ẽ jevy chéve: Akãguapy, che mburuvicha reko, che retã pu’aka, che mburuvicha rerakuã porã. Ha umi tetã sãmbyhyhára oĩva’ekue che poguýpe ha umi che rekombo’ehára oupa che rendápe chemoĩ jevy hag̃ua che retã ruvicha guapyhaguasúpe, ha uperire oñeme’ẽ chéve pu’aka tuichave gueteri ymaguarégui.

37Ko’ág̃a che, Nabucodonosor, amomba’eguasu, ambotuicha ha amboete Yvagakuéra Ruvichaguasúpe, mayma hembiapo añete, opaite hapekuéra heko pegua ha Ha’e omomirĩkuaa umi oñembotuichávape.

← Chapter 3 Jump to: Chapter 5 →