Daniel 7

Guarani 2015 (Ñanderuete Ñe’ẽ Porã 2015)

← Chapter 6 Jump to: Chapter 8 →

1Belsasar, Babilónia retã ruvicha, oisãmbyhy aja hi’áño peteĩháme, Daniel ohecha iképe, ha umi mba’e ojehechaukáva ichupe payetépe (visiónpe) ou iñakãme oĩ aja hupápe, ha’e ohai peteĩ kuatiañe’ẽme.

2Ko’ã mba’e che, Daniel, ahecha: Ama’ẽ’aína che ke pegua ra’ãnga rehe, ha péina umi irundy yvytu oñorãirõ yguasúpe.

3Ha irundy mymba tuicháva, ndojojoguáiva, ojupi yguasúgui.

4Pe mymba peteĩha ojogua leõme, ha ipepo ñapykanícha. Ha che ama’ẽ jave ipepokuéra rehe, oñemondoro umía ichugui, oñemopu’ã yvýgui ha oñembo’y ipy rehe kuimba’éicha ha oñeme’ẽ ichupe peteĩ tapicha py’a.

5Ha péina ápe pe mymba mokõiha, ojogua peteĩ ósope, ha oñemoñembo’ýnte ipýre ha oguereko mbohapy ñarukã (costílla) ijurúpe, hãinguéra pa’ũme, ha péicha oje’e ichupe: Epu’ã ha he’u heta so’o.

6Ko’ã mba’e rire ama’ẽ, ha péina ápe ahecha ambue mymba, ojoguáva jaguarete hũme, ipepo irundy ijapére guyráicha, ko mymba kóva avei iñakã irundy, ha oñeme’ẽ ichupe pu’aka ndetuicháva.

7Ko’ã mba’e ko’ãva rire ama’ẽvo pe ojehechaukávare payetépe pyharépe, ha péina ápe ahecha pe mymba irundyha, iñarõ ha oporomongyhyjéva ha imbareteiterei ha hãi tuicha hiérrogui; oporomokõ ha oporopehe’ãmba, ha hembýva rehe opyrũmba, ha ojuavyeterei umi ambue mymba ahechava’ekuégui, ha’e ningo 10 hatĩ.

8Ha ama’ẽvo hatĩ rehe, péina ápe peteĩ hatĩ michĩva osẽ ambue hatĩnguéra pa’ũme, ha péva omondoro mbohapy hatĩ tenondeveguaréva, ko hatĩ kóva hesa kuimba’éicha, ha peteĩ juru he’íva mba’e tuicháva.

9Ha ama’ẽvévo ahecha oñemoĩ guapyhaguasúpe peteĩ Itujaitéva oguapy hag̃ua, ijao morotĩ ama rayvi rypy’áicha, ha iñakã rague imorotĩ ovecha rague ñemopotĩmbyréicha, iguapyhaguasu ha iruéda tata rendýicha.

10Peteĩ ysyry tataguiguáva osẽ henondégui; heta millónes oservi ichupe; ha heta 100 millónes oñembo’y henondépe, ha oguapy rire umi oporombojovakéva avei ojepe’a umi kuatiañe’ẽ.

11Ha che ajapysaka jave umi ñe’ẽguasueta pe hatĩ michĩ he’íva rehe, ahecha ojejukaha pe mymbápe, ha hete oñepehe’ãmba, ha upéi oñemombo tatápe okái hag̃ua.

12Ha umi ambue mymba pu’aka ojepe’a avei ha ojeheja ichupekuéra oikove hag̃ua hi’ára ha hi’óra paha og̃uahẽ mevénte.

13Ama’ẽve pe ojehechaukava’ekue rehe payetépe pyharekuépe, ha péina ápe ahecha umi arai apytépe ouhína pe Yvyarigua Ra’y, ha omog̃uahẽ ichupe pe itujaitéva renondépe.

14Ha oñeme’ẽ ichupe pu’aka, teko jajaipa, tetãguasu, opaite tetãnguéra, tribukuéra ha opaichagua ñe’ẽ oiko hag̃ua ipoguýpe, hembiguaikuéra ramo, ipu’aka opyta hag̃ua tapiaite g̃uarã, ndohasaiva’erã, ha hetãguasuete noñehundiriva’erã araka’eve.

15Che, Daniel, che ánga iñangekõieterei chepype, ha umi mba’e ojehechaukava’ekue chéve payetépe chembopy’andýi.

16Upérõ añemboja peteĩva upépe oñembyatýva rehe, ha aporandu ichupe ko’ã mba’e rehe, ha’e omombe’u hag̃ua chéve mba’épa he’ise. Ha ha’e oñe’ẽ chéve, ha oikuaauka chéve umi mba’e he’iséva:

17Ko’ã irundy mymba tuicháva irundy tetã ruvicha, opu’ãtava ko yvy apére.

18Uperire pe tetãguasuete oñeme’ẽ pe Ijyvatetéva retãyguakuérape ha heko potĩvape g̃uarã, opytapa hag̃ua tapiaite imba’erã ramo.

19Ha upéi aikuaase mba’épa oiko pe mymba irundyhágui, péva ndojoguaiete ambue mymbakuérape, ha oporomongyhyjeitereíva, hãinguéra hiérrogui ha ipyapẽnguéra bróncegui, oporomokõva ha oporopehe’ãmbáva, ha opyrũmba avei hembýva rehe,

20ha aikuaase avei mba’épa he’ise umi 10 hatĩ iñakã rehe oĩva, ha peteĩ osẽ jevyva’ekue iñakãgui ambue mbohapy rendaguépe. Ko hatĩ kóva hesáma, ha avei ijurúma, ha he’íva mba’eguasu, ha ha’ete ituichaveha iñirũnguéragui.

21Ha che ahecha ko hatĩ kóva oñorãirõha umi heko potĩva ndive, ha ipu’aka hikuái umíva rehe,

22ou peve pe Karaiguasu, Itujaitéva, hi’ára hetaitéva, oipytyvõ hag̃ua heko potĩvape, oporombojovake hag̃ua, ha og̃uahẽvo pe ára, umi heko potĩva oñepyrũ oisãmbyhy pe tetãguasuete.

23Ha péicha he’i: Pe mymba irundyha ha’e pe tetãguasu irundyha, oútava ko yvy apére, ha iñambuetéta ambue tetãguasúgui, ha omokõmbáta oĩva guive yvy apére, ha oipehe’ãmbáta ha omongu’ipáta ojohúva guive.

24Ha umi 10 hatĩ he’ise pe tetãguasúgui opu’ãta 10 tetã ruvicha; ha upéi opu’ãta ambue tetã ruvicha iñambuéva umi 10 tetã ruvicha apytégui, ha upéva oitýta mbohapy tetã ruvichápe.

25Ha oñe’ẽvaíta pe Ijyvatetéva rehe, ha’e ohundíta umi ojeroviáva Ijyvatetéva rehe, omoambuéta umi arete ára ha tembiapoukapykuéra. Ko tetã ruvicha kóvape oñeme’ẽta pe tetã ruvicha guapyha oisãmbyhy hag̃ua mbohapy áño imédio pukukue (3 tiémpos imédio).

26Uperire oguapýta umi mbojovakehára oipe’a hag̃ua ichugui ipu’aka ha ohundíta avei ichupe.

27Ha oñeme’ẽta umi Ijyvatetéva retãygua heko potĩvape pe tetãguasu, pe pu’aka ha pe mburuvicha reko ha opaite tetãnguéra oĩva guive yvága guýpe. Upe ára guive Ñanderuete retãguasu ndopamo’ãvéima araka’eve, ha opaite pu’aka oservíta Ñanderuetépe ha iñe’ẽrendúta ichupe.

28Ápe iñe’ẽ opa. Ha che, Daniel, che pensamientokuéra katu chemyangekõi ha che rova oñemoambuepa chehegui; opaite ko’ã mba’e ko’ãva katu añongatu che py’apýpe.

← Chapter 6 Jump to: Chapter 8 →