2 Chronicles 16

Gussi (EBIBILIA ENCHENU) 2020

← Chapter 15 Jump to: Chapter 17 →

1Ase omwaka bw’emerongo etato, na etano nomo, bw’okogamba gwa Asa, Baasa, omoruoti bw’Abaisraeli, akagenda korwania Abayuda, akaagacha na kogitera omochie o Rama chindwaki ng’a nario ribaga ritabaise gotoka ase omonto onde bwensi gosoka, gose gosoa kogenda ase Asa, omoruoti bw’Abayuda.

2Erio Asa akarusia chifeta ne chitahabu korwa ase chikungo chi’enyomba y’Omonene na korwa ase echi’enyomba y’omoruoti, agachitoma gochia ase Beni‐Hadadi, omoruoti o Siiria omenyete agwo Damesiki, agateba,

3“Tiga okobwatana kw’ogotianania kobe ase egati yane naye, buna kwarenge ase egati ya tata na iso. Rora nagotomeire chifeta ne chitahabu. Genda osarie okobwatana kwao gwakorete na Baasa, omoruoti bw’Abaisraeli, erinde arue ase ense yane, antigane.”

4Beni‐Hadadi akaigwera Asa omoruoti, agatoma abatang’ani b’abarwani baye, bakagenda bakarwania emechie y’Abaisraeli, bakabua Iyoni, na Dani, na Abeli‐Maimu, na emechie yonsi ase ebinto biagachire agwo ase orogongo rwa Nafutali.

5Ekero Baasa aigwete amang’ana ayio, agatiga kogita omochie o Rama, na emeremo yaye aroro egatenena.

6Erio Asa omoruoti akaira Abayuda bonsi, na barabwo bakagenda bakabogoria amagena onsi a Rama, ne chibao, ebinto biria Baasa arenge koagachera, na ase ebio Asa akaagachera Geba na Misipa.

7Ase engaki eria Hanani omorori agacha ase Asa, omoruoti bw’Abayuda, akamotebia, “Ekiagera gwasemeretie omoruoti o Siiria, na tigwasemeria Omonene, Nyasae oo, abarwani esegi b’omoruoti o Siiria batamire betooririe korwa ase okoboko kwao.

8Inee! Abanto b’Etiopia na aba Libia tibarenge omoganda omonene bw’abarwani esegi, naende tibabwate chigari chinyinge, na abariini chibarasi abange? Korende nonya naboigo, ekiagera aye gwasemeretie Omonene, akababeka ase okoboko kwao.

9Amaiso ’Omonene nigo origereretie aande onsi ase ense yonsi ase okoorokia okoboko kwaye kw’ogokonya abanto baria chinkoro chiabo chire chinyegenwa asare. Aye gwakorire amang’ana ’oboriri ase ogokora egento eke; na korwa bono na kogenderera nobe ne chisegi.”

10Erio Asa akaba nendamwamu ase omorori oria, akamobwata, akamobeka ase echela, agasoyia amagoro aye ase rikorogoto. Nigo agechete omorori oria mono, ekiagera akwanete amang’ana aria. Boigo ase engencho eyio Asa akaba omotindi mono, agachanda abanto bande.

11Aya onsi Asa akorete, korwa omochakano goika omoerio, nigo arikire ase Ebuku y’Abaruoti b’Abayuda na ab’Abaisraeli.

12Ase omwaka bw’emerongo etato na kianda bw’okogamba kwaye, Asa akanyora oborwaire ase amagoro aye, na oborwaire obo bokaba obonene; korende nonya obete omorwaire, tarigetie Omonene, korende akarigia ogokonywa korwa ase abarwaria.

13Asa agakwa ase omwaka bw’emerongo ene nomo bw’okogamba kwaye, akarara ase chisokoro chiaye chiararete.

14Erio agatindekwa ase oboina eroiseretie ere omonyene, agwo ase Omochie o Daudi. Bakamwareria ase ekerarero giaichoretigwe ebinsari na amarembo ao ao, ebinto bigotioka buya, biaroisetigwe nabaroisia abang’aini. Abanto bagauta omorero omonene ase okworokia amasikani ase engencho ya Asa.

← Chapter 15 Jump to: Chapter 17 →