2 Chronicles 18

Gussi (EBIBILIA ENCHENU) 2020

← Chapter 17 Jump to: Chapter 19 →

1Ekero Yehosafati abete omonda mono naende asikire, akanyuoma omokungu korwa ase enyomba y’Ahabu.

2Nyuma y’emiaka emeke akagenda ase Ahabu agwo Samaria. Nere akanyenyera Yehosafati, amo nabanto barenge amo nere, ching’ondi chinyinge ne chiombe; erio akamoebereria agende amo nere korwania Ramoti o Gileadi.

3Ahabu, omoruoti bw’Abaisraeli, agakwana na Yehosafati, omoruoti bw’Abayuda, akamoboria, “Nogende amo nainche korwania Ramoti o Gileadi?” Yehosafati akamoiraneria, “Inche nigo inde buna aye, na abanto baane nigo bare buna abanto bao. Intwe ntobe amo naye ase okorwana esegi.”

4Naende Yehosafati agatebia omoruoti bw’Abaisraeli, “Ritang’ani toborie Omonene igoro y’amang’ana aya.”

5Erio omoruoti bw’Abaisraeli agasangereria ababani, abanto amagana ane, amo, akababoria, “Nkogenda tore korwania Ramoti o Gileadi, gose yaya?” Barabwo bakamoiraneria, “Genda, ekiagera Nyasae nabeke omochie oyio ase okoboko kwao, aye omoruoti.”

6Korende Yehosafati akaboria, “Inee! Omobani onde bw’Omonene tari aiga, tonyare koboria goetera asare?”

7Omoruoti bw’Abaisraeli akairaneria Yehosafati, “Omonto oyomo natigarete, toraborie Omonene goetera asare, nere Mikaya, mosinto o Imula, korende nigo imogechete, ekiagera ere tari kobana amang’ana amaya igoro yane, korende botambe namabe oka.” Yehosafati akamotebia, “Aye omoruoti, tobaisa gokwana igo.”

8Erio omoruoti bw’Abaisraeli akarangeria omosomba oyomo, akamochika, “Genda bwango orente Mikaya, mosinto o Imula.”

9Bono omoruoti bw’Abaisraeli na Yehosafati, omoruoti bw’Abayuda, nigo baikaransete ase ebirogo biabo bi’oboruoti, baikaransete agwo ase ekeooreri ang’e negeita gia Samaria, babegete chianga chiabo chi’obonene, na ababani baria bonsi nigo barenge korua obobani bwabo ase amaiso ’abaruoti baria.

10Zedekia, mosinto o Kenaana, akeroiseria chingunchara chi’ebioma, agakwana, “Aya naro Omonene atebire: Ase chingunchara echi nobetere Abasiiria goika basirigwe kegima.”

11Ababani baria bonsi bakabana amang’ana ayio ayio, bagateba, “Genda Ramoti o Gileadi, noyobue. Omonene nayobeke ase okoboko kwao, aye omoruoti.”

12Omonto oria otometwe gochia korangeria Mikaya akagenda, akamotebia, “Rora, amang’ana ’ababani bande nigo are ayamo, okoria eira y’egesio ekiya ase omoruoti; tiga ring’ana riao ribe erimo namang’ana abo; naye boigo okwane amang’ana okoria eira y’egesio ekiya ase omoruoti.”

13Korende Mikaya agateba, “Ekeene, buna Omonene are moyo, ring’ana Omonene aranetbie, nario ndakwane.”

14Ekero achete ase omoruoti, omoruoti akamoboria, “Inee! Mikaya, nkogenda tore korwania Ramoti o Gileadi, gose totige?” Ere akamoiraneria, “Genda, obue! Abanto baria nababekwe ase amaboko aino.”

15Omoruoti akamoboria, “Ng’ara karenga nkogotiania ng’a ontebie ekeene gioka ase erieta ri’Omonene?”

16Mikaya akairaneria, “Naroche Abaisraeli bonsi besiarerete igoro y’ebigoro buna ching’ondi chitabwati omorisia, na Omonene agantebia: Abanto aba tibabwati omoraai obo, tiga kera oyomo airane agende nka ore nomorembe!”

17Na omoruoti bw’Abaisraeli agatebia Yehosafati, “Tinagotebia ng’a ere takobana amang’ana amaya igoro yane, korende namabe oka?”

18Naende Mikaya akagenderera gokwana, agateba, “Ase ayio, igwa ring’ana ri’Omonene. Inarora Omonene oikaransete ase ekerogo kiaye ki’obonene, na emeganda yonsi y’abamalaika eteneine ensemo yaye y’okorio na ey’okobee.

19Na Omonene akaboria: Ning’o ogochia koebereria Ahabu, omoruoti bw’Abaisraeli, erinde agende Ramoti o Gileadi abugwe? Oyomo agakwana egento ekemo, na oyonde egento kende.

20Erio omoika ogacha ogatenena bosio bw’Omonene ogateba: Ninche ndamoebererie. Omonene akaboria omoika oria: Nase enchera ere naki oramoebererie?

21Omoika oria okairaneria: Nigo nkoimoka ngende, imbe omoika bw’obong’ainereria ase emenwa y’ababani baria bonsi b’Ahabu. Omonene akayotebia: Genda omoebererie ase enchera eyio. Nobue.

22“Ase ayio rora bono, Omonene obaeire omoika bw’obong’ainereria ase emenwa y’ababani aba bao bonsi, ekiagera ochikire ng’a nonyore egesio ekebe.”

23Erio Zedekia, mosinto o Kenaana, agaika ang’e ase Mikaya, akamoaka oroe ase orosea, akamoboria, “Nase nchera ki omoika oria bw’Omonene orua asende, erinde ogakwana naye?”

24Mikaya akamoiraneria, “Aye norore ayio rituko riria oratame na gosoa ase ekenunchi bwebise.”

25Omoruoti bw’Abaisraeli agateba, “Bwata Mikaya momoiranie ase Amoni, omonene bw’omochie, na ase Yoashi, omomura bw’omoruoti,

26mobatebie ng’a aya naro omoruoti atebire: Beka omonto oyio ime ase echela, momong’ate endagera na amache goika ing’irane inde nomorembe.”

27Mikaya akamoiraneria, “Onye kogochia koirana kore nomorembe, rirorio Omonene takwaneti goetera asende.” Naende agateba, “Inwe abanto bonsi, igwa amang’ana ayio.”

28Bono omoruoti bw’Abaisraeli na Yehosafati, omoruoti bw’Abayuda, bakagenda korwania Ramoti o Gileadi.

29Na omoruoti bw’Abaisraeli agatebia Yehosafati, “Inche nigo ngwekona ase ogwetuba timanyekana, erio ngende ase esegi, korende aye obeke chianga chiao chi’oboruoti.” Omoruoti bw’Abaisraeli agekona ase ogwetuba tamanyekana; erio bakagenda ase esegi.

30Bono omoruoti bw’Abasiiria konya ochikire abateneneri baye be chigari, obatebirie, “Timobaisa korwana na monto onde bwensi, abe omoke gose omonene, korende morwane nomoruoti bw’Abaisraeli bweka.”

31Ekero abateneneri be chigari baroche Yehosafati, bagateba, “Nere omoruoti bw’Abaisraeli.” Ase ayio bakaonchoka bakarwana nere, na Yehosafati akarera mono, na Omonene akamokonya. Nyasae akabang’usa bakarua asare,

32ekiagera ekero abateneneri be chigari baroche ng’a ere tarenge omoruoti bw’Abaisraeli, bakaonchoka, bagatiga komobwatia.

33Korende omonto oyomo akaruta omogwe ase okorengia bosa igo, akabeta omoruoti bw’Abaisraeli ase ribaga riarenge gati y’engobo y’ekioma, ase egekuba kiaye. Erio omoruoti agatebia omogendia bw’egari yaye, “Onchora egari ondusie ase esegi, ekiagera nabetirwe mono.”

34Esegi eria ekaba entindi mono ase rituko riria, na omoruoti agatenena ase egari yaye, origereretie Abasiiria, goika mogoroba; erio ekero erioba riabeire ang’e kogwa agakwa.

← Chapter 17 Jump to: Chapter 19 →