Daniel 11 — Gussi (EBIBILIA ENCHENU) 2020

1“na inche nigo natenenete komokonya na komobeka chinguru ase omwaka bwe ritang’ani bw’okogamba kwa Dario Omomedi.

2“Bono nkogotebia inde ayare ay’ekeene. Naama! Abaruoti bande batato nabaoroke ase ense y’Ayemi. Naende omoruoti o kane naoroke, nigo arabe omonda kobua abwo batato bonsi. Ekero aranyore chinguru goetera ase obonda bwaye, naseegete bonsi bagende korwania oboruoti bw’Abagiriki.

3“Erio omoruoti ore ne chinguru chinene naoroke, abe okogamba nokobua okonene na akore buna anchete ere omonyene.

4Korende ekero omoruoti oyio aranyore chinguru chinene, oboruoti bwaye mbosareke bwatananeke ase chinsemo inye chi’ense, tibokoegwa abanto b’ororeria rwaye, tibokoba nokobua buna koria ere abwate. Oboruoti bwaye mbotegorwe boegwe abanto abaao.

5“Omoruoti o irianyi nabe ne chinguru, korende oyomo bw’abagambi b’oboruoti bwaye nabe ne chinguru komobua, na oboruoti bwaye mbobe obonene mono.

6Nyuma y’emiaka etari meke, omoruoti o irianyi nakore okobwatana nomoruoti o sugusu. Omoruoti o irianyi nasokie omoiseke oye ase omoruoti o sugusu ase ogokora okobwatana. Omokungu oyio takogenderera koba nokobua okwo araegwe, na omoruoti oria o sugusu takogenderera koba nokobua kwaye. Omokungu oria narusigweo aitwe, ere amo nabwo bamorentete, oyo omoiborete na oria omoete okobua ase engaki eria.

7Erio omonto natoke korwa ase omori bw’omokungu oria, oyio nache arwanie abarwani esegi b’omoruoti o sugusu, asoe ase chiburi chiaye, akore ase abanto buna anchete na kobabua.

8Ere nasakore chinyasae chiabo, na emegwekano yabo bagosasima ebombire, na ebikorero biabo ebiya biroisirie korwa ase chifeta ne chitahabu, abiire Misiri. Erio ase emiaka emeke natige korwania omoruoti o sugusu.

9Nyuma y’ayio omoruoti o sugusu nache korwania omoruoti o irianyi, korende goika airane gochia ase ense yaye omonyene.

10“Abamura b’omoruoti o sugusu mbebeke ang’e, basangererie abarwani esegi abange mono, oyomo agende aumokere ense eria nomoganda oye omonene oresiarere aande onsi, naende bairane eria kabere barwane gochia bosio bw’eburi yaye.

11Erio omoruoti oyio o irianyi nabe nendamwamu enene, nache korwania omoruoti o sugusu, na oria o sugusu nasangererie omoganda omonene bw’abarwani esegi, korende barabwo nababekwe ase okoboko kw’omoruoti o irianyi.

12Ekero omoruoti oyio o irianyi arabe osiririe omoganda oria, enkoro yaye inayeimokererie igoro, korende naisa goita chilifu chinyinge, takonyara kobua.

13“Omoruoti o sugusu nasangererie omoganda omonene bw’abarwani esegi obuete oria bwe ritang’ani, erio nyuma y’emiaka emeke nairane ore nomoganda omonene na ebinto ebinge biganeirie ase esegi.

14Ase engaki eyio eyio abanto bande abange mbaimokere omoruoti o irianyi, naende abanto abasaria b’egesaku kiao nabeimokererie igoro ase ogwetogia, erinde bai keranie okorora koria aye kwaroche, mbagochwe bagwe.

15Erio omoruoti o Sugusu nache aagache chiburi, abue omochie ogiteire chindwaki. Abarwani esegi b’omoruoti o irianyi mbabugwe, nonya nabarwani baye abachore tibakonyara kobua, ekiagera mbaborwe chinguru.

16Omoruoti oria o sugusu orachere oria o irianyi, nakore buna aranche; gose monto onde tari oramobue. Oyio natenene ase ense eria ere engiya mono, na ogosirigwa ngoche goetera ase okoboko kwaye.

17“Omoruoti oyio o sugusu nakore omoroberio, ache nokobua kw’oboruoti bwaye bwonsi, Natoeme gokora okobwatana nomoruoti o irianyi ase okomoa omoiseke oye abe mokaye, erinde asarie oboruoti boria kegima, korende amang’ana ayio tagosesenigwa, gose komokonya ere omonyene.

18Nyuma y’ayio naonchokere korwania ebisinka ne chinse chire ang’e nenyancha, nabue ebisinka ebinge ne chinse boigo. Korende omochiki oyomo bw’abarwani esegi namobue asirie ogochaya kwaye, ee, namoiranerie ogochaya okwo.

19Nairane agende ase chiburi chi’ense yaye omonyene, korende nagochwe agwe, takonyorekana naende.

20“Naende naoroke omoruoti onde ase ribaga riaye, ere natome omobangi bw’ebango aete ase ense eria ere obonene bw’oboruoti bwaye, Ase engaki y’amatuko amake omoruoti oria naitwe, korende tari ase engencho y’endamwamu, gose ase esegi.

21“Naende naoroke omoruoti onde omokorekanu ase ribaga ri’oria oitetwe. Oyio ere takoegwa amasikani ase oboruoti obwo. Nigo arache ng’ora ng’ora ase obong’ainereria bw’okweansia aire oboruoti.

22Ere nasirie abarwani esegi abange baria baramochere; boigo nasirie omogambi oria arakore okobwatana kw’ogotianania nere.

23Nyuma okobwatana kogwakorirwe nere, nakore ay’obong’ainereria, anyore okobua nonya obwate abanto abake boka.

24Nigo arache ng’ora ng’ora, asoe ase chinsemo chintobu chi’ense eria; nigo arakore amang’ana chisokoro ne chisokororia chiaye chitakorete, nasiarere ase egati y’abanto baye ebinto aureretie, na ebi asakorete, ne chinibo. Nakore emeroberio y’okorwania chiburi chinkong’u, korende ase engaki enke yoka.

25“Ere nabe noboremu, asangererie abarwani esegi abange mono gochia korwania omoruoti o irianyi, na omoruoti o irianyi nere nebeke ang’e korwana esegi nomoganda omonene mono ore ne chinguru, korende takobua, ekiagera nakorerwe emeroberio y’obong’ainereria.

26Abanto baria bakoria endagera amo nere mbamosirie, na abarwani baye b’esegi mbaserebekane, na abange mbaitwe bakwe.

27Abaruoti abwo babere mbabe bakoroberia ng’a bakore amabe, baikaranse ase emesa eyemo babe bagotebania oborimo, korende ayio tagosesenigwa, na omoerio nigo oraike ase engaki eria echikire.

28Omoruoti oria o sugusu nairane gochia ase ense yaye, aire ebinto ebinge asakoire, na enkoro yaye neroberie mamincha y’okobwatana koria ogochenu, na ekero arabe oikeranirie ayio, nairane gochia ase ense yaye omonyene.

29“Naende ase engaki echikire nairane gochia ase ense ya irianyi, korende ase engaki eyio amang’ana takoba buna aye ritang’ani.

30Chimeeri chia Kitimu nchiche komorwania, nere noboe atame airane, naonchore ekeririanda kiaye mamincha y’okobwatana ogochenu. “Ekero arabe oiranire nabe ogotegerera na koigwera abwo batigire okobwatana okwo ogochenu.

31Abarwani bande b’esegi batometwe nere mbakore Obomenyo Obochenu bobe botachenegeti, nabarusieo ekeng’wanso ki’ogosambwa gwa kera rituko, na agwo mbatenenie okogechia koria kogosiria.

32Abwo bagokora amabe ase okobwatana okwo ere nabang’use namang’ana ay’okweansia goika bagotige kegima, korende abanto baria bamomanyete Nyasae obo mbatenene bokong’u bakore ayabagwenerete bakore.

33Abwo bare nobong’aini ase egati y’abanto mborokererie abange babe nokomanya. Korende ase engaki enke abande babo nabaitwe nemioro, na abande basambwe nomorero, na abande bairwe ase obosomba, na abande basakorwe ebinto biabo.

34Ekero emechando eyio erabachere, abanto ba Nyasae nabanyore ogokonywa ogoke. Abanto abange mbabwatane nabarabwo ase obong’ainereria bw’okweansia.

35Abande b’abwo bare abang’aini nabanyorwe nemechando eyio, erinde ogocheneka kobe ase egati yabo, basibeke goika engaki y’omoerio oyo oraike ase engaki eria echikire.

36“Omoruoti oria nigo arakore buna anchete. Ase obomwenu bwaye neimokererie igoro ase kera enyasae, nakwane amang’ana ’ogokumia mamincha ya Nyasae oyobuete chinyasae chionsi. Nagenderere konyora chinguru goika ekeririanda kia Nyasae geikeranigwe. Aria aroberetigwe ng’a nabe goika aikeranigwe.

37Omoruoti oria tagosika chinyasae chie chisokoro chiaye, gose eye abakungu banchete, gose enyasae ende yonsi, ekiagera neimokererie igoro ase chionsi.

38Ase ribaga riabo nasike enyasae ekorenda chiburi; enyasae eye chisokoro chiaye chitamanyete nigo arayesike ase okoyeruera chitahabu, ne chifeta, na amagena e rigori rinene, na ebiegwa ebiya mono.

39Ase ogokonywa kw’enyasae engeni nekorere chiburi chinkong’u buna anchete. Abanto baria baranche ng’a nomogambi are, nabae obonene bw’ogosikwa. Nababeke babe abagambi igoro ase abanto abange na nabaatananere ense ebe eng’eria yabo.

40“Ase engaki y’omoerio omoruoti o irianyi namoumokere, korende omoruoti oria o sugusu nigo aramorindokere buna ekembugu‐mbugu ore ne chigari, na abariini be chibarasi, ne chimeeri chinyinge. Nigo arasoe ase chinse ao ao nomoganda omonene, aichore aoorie goeterao.

41“Boigo nasoe ase ense eria engiya, nasirie chinse chinyinge, korende Abaedomu na Abamoabu, na abanto abange b’Abaamoni, barabwo mbatoorigwe korwa ase okoboko kwaye.

42Narambore okoboko kwaye asirie chinse chinyinge, na ense ya Misiri tegotooreka.

43Nabe nokobua igoro ye chikungo chie chitahabu ne chifeta, na igoro y’ebinto bie rigori rinene bia Misiri. Abanto ba Libia na ab’Etiopia mbabe bakobwatia chimbaratero chiaye.

44Korende amang’ana ararwe moocha na sugusu namoichanie, erio asoke ore nekeririanda ekenene aite abanto abange abasirie kegima.

45Natenenie eema yaye y’oboruoti ebe ase egati y’enyancha na egetunwa keria egechenu ki’obonene. Korende nonya naboigo naikere omoerio oye, na monto onde tari oramokonye.