Daniel 3

Gussi (EBIBILIA ENCHENU) 2020

← Chapter 2 Jump to: Chapter 4 →

1Nebukadinesaro omoruoti akaroisia omogwekano korwa ase etahabu; obotambe bw’omogwekanooria nigo bwarenge obw’amaboko emerongo etano nomo, na obogare bwaye obw’amaboko atano na rimo; akayotenenia ase ense omweya ya Dura, agwo ase orogongo rwa Babeli.

2Erio omoruoti Nebukadinesaro agatoma abanto basangererie amo abagambi abanene b’oboruoti bwaye, na abagambi be chingongo chiaye, na abagavuna, na abasemia, na abagachi be chikungo, na abagambi ebina, na abamanyi b’amachiko, na abanene bande bonsi b’oboruoti bwaye. Abwo bonsi nigo barangereretigwe ase ogwatanana na gosesenia omogwekano oria Nebukadinesaro omoruoti konya atenenirie.

3Erio abagambi baria abanene, na abagambi be chingongo, na abagavuna, na abasemia, na abagachi be chikungo, na abagambi ebina, na abamanyi b’amachiko, na abanene bande bonsi b’ense eria, bagacha gwatanana na gosesenia omogwekano oria omoruoti Nebukadinesaro konya atenenirie. Ekero bateneine bosio bw’omogwekano oria,

4omoraria agaaka eriogi rinene, akabora, “Inwe abanto b’ebisaku bionsi, na ab’emenwa yonsi, mwachikirwe

5ng’a ekero moraigwe eriogi ri’ebitureri, na ebiroria, na amakano ao ao, na amarandi, na amariogi a kera egento ki’amatera, goika motung’ame inse, mosasime omogwekano bw’etahabu, oria Nebukadinesaro omoruoti atenenirie.

6Omonto onde bwensi otatung’ameti na koumama ase okoyosasima, erio agwo kegima oyio narutwe ase eriko ri’omorero ekebemberi.”

7Ase ayio ekero abanto b’ebisaku bionsi na ab’emenwa yonsi baigwete eriogi ri’ebitureri, na ebiroria, na amakano ao ao, na amariogi a kera egento ki’amatera, bonsi bakaba bagatung’ama na gosasima omogwekano bw’etahabu, oria omoruoti konya atenenetie.

8Bono abanto bande b’Abakalidayo bakagenda bagasoera Abayahudi.

9Bagakwana, bagatebia Nebukadinesaro omoruoti, “Aye omoruoti, ochie kare!

10Aye omoruoti nigo kwarua ogochika ng’a kera omonto okoigwa eriogi ri’ebitureri, na ebiroria, na amakano ao ao, na amarandi, na amariogi a kera egento ki’amatera, goika atung’ame inse na gosasima omogwekano oria bw’etahabu,

11naende ng’a omonto onde bwensi otatung’ameti inse na koumama ase okoyosasima, oyio goika arutwe ase eriko ri’omorero ekebemberi.

12Bono mbare aa abanto bande b’Abayahudi abwo gwachorete gotenenera amang’ana ’orogongo oro rwa Babeli: Sadaraka, na Meshaka, na Abedi‐Nego. Aye omoruoti, abanto aba bachayire amachiko ao; barabwo tibari gokorera chinyasae chiao gose gotung’ama na koumama ase ogosasima omogwekano oria bw’etahabu aye gwatenenetie.”

13Erio omoruoti Nebukadinesaro akaba nekeririanda egetindi, agachika ng’a Sadaraka, na Meshaka, na Abedi‐Nego, barentwe asare, na abamura baria batato bakarentwa ase obosio bwaye.

14Nebukadinesaro akababoria, “Inwe Sadaraka, na Meshaka, na Abedi‐Nego, Inee, nekeene ng’a inwe timori gokorera chinyasae chiane, gose timori gosasima omogwekano oria bw’etahabu ntenenetie?

15Bono mobe ang’e, ekero moraigwe eriogi ri’ebitureri, na ebiroria, na amakano ao ao, na amarandi, na amariogi a kera egento ki’amatera motung’ame inse moumame ase ogosasima omogwekano oria naroisirie, ayio naro arabe buya asemore; korende onye timokoyosasima, rirorio agwo kegima goika morutwe ase eriko ri’omorero ekebemberi. Inee! Nenyasae ereri eranyare kobatooria korwa ase amaboko aane?”

16Erio Sadaraka, na Meshaka, na Abedi‐Nego, bakairaneria omoruoti oria, bakamotebia, “Aye Nebukadinesaro, titoganeti gokoiraneria igoro y’amang’ana aya.

17Aye omoruoti, Nyasae oito, oria togokorera, nanyare gototooria korwa ase eriko ri’omorero ekebemberi, na korwa ase amaboko ao.

18Korende nonya tagochia gototooria korwa asore aye omoruoti, goika omanye ng’a intwe titogwancha gokorera chinyasae chiao, gose gosasima omogwekano bw’etahabu, oyio gwatenenetie.”

19Erio Nebukadinesaro agaichorwa nekeririanda, na obosio bwaye bokaonchoka igoro ya Sadaraka, na Meshaka, na Abedi‐Nego. Agachika ng’a omorero bw’eriko riria omentwe obe omonene ara gatano na kabere kobua oyo o botambe.

20Agachika abarwani esegi barenge ne chinguru basibe Sadaraka, na Meshaka, na Abedi‐Nego, babarute ime ase eriko riria ri’omorero ekebemberi.

21Ase ayio abamura baria batato bagasibwa bare ne chisirwari chiabo, ne chiganchwa chiabo, na emiambaro yabo, ne chianga chinde, bakarutwa ase eriko riria ri’omorero ekebemberi.

22Bono ekiagera ogochika kw’omoruoti kwarenge ogotindi, na ase ayio omorero bw’eriko riria konya omentirwe obeire omonene mono, chimeme chi’omorero oria chigasamba na goita abanto baria barutete Sadaraka, na Meshaka, na Abedi‐Nego, ase omorero oria.

23Abanto baria batato: Sadaraka, na Meshaka, na Abedi‐Nego, bakagwa ase eriko riria ri’omorero ekebemberi basibire.

24Erio Nebukadinesaro omoruoti agakumia na goichana, agatenena ase obwango, akaboria abasemia baye, “Inee! Titwarutete abanto batato boka ase omorero basibire?” Bakamoiraneria, “Ee, aye omoruoti, ayio namaene.”

25Omoruoti akabairaneria, akabatebia, “Na bono nindoche abanto bane basiboire, bagotaara ime ase omorero, na barabwo tibayieti aande nonya ng’ake; omonto oria o kane nigo akororekana buna omwana bw’enyasae.”

26Ase ayio Nebukadinesaro akagenda ang’e nomonwa bw’eriko riria ri’omorero ekebemberi, agaaka eriogi, akarangeria, “Sadaraka, na Meshaka, na Abedi‐Nego, inwe abasomba ba Nyasae Ore Igoro Mono, soka korwa ime agwo, moche aiga!” Erio Sadaraka, na Meshaka, na Abedi‐Nego, bagasoka korwa ase omorero oria.

27Abagambi abanene b’oboruoti, na abagambi be chingongo, na abagavuna, na abasemia b’omoruoti bagasangererekana amo, bakarora ng’a omorero oria torenge nokobua konde gwonsi igoro ase emebere y’abanto baria; chitukia chi’emetwe yabo tichiarurogete, ne chianga chiabo tichiayiete, gose tibatiogete rimisu ri’omorero.

28Erio Nebukadinesaro agaaka eriogi, agateba, “Atogigwe Nyasae o Sadaraka, na o Meshaka, na bw’Abedi‐Nego, oyio otomire omomalaika oye gotooria abasomba baye abwo bamosemeretie na bangete koigwera ogochika kwane inche omoruoti, bakarua emebere yabo esire kobua gokorera na gosasima enyasae ende yonsi, otatiga Nyasae obo bweka.

29“Bono narure ogochika ng’a omonto onde bwensi bw’egesaku kende gionsi, gose bw’omonwa onde bwensi, orakwane mamincha ya Nyasae o Sadaraka, na o Meshaka, na bw’Abedi‐Nego, oyio nabutoranwe ekiimo ase ekiimo, na enyomba yaye netagorwe ebe rituuri, ekiagera enyasae ende teri eranyare gotooria ase enchera buna eye.”

30Omoruoti akabeka Sadaraka, na Meshaka, na Abedi‐Nego, bakaba abanene ase orogongo rwa Babeli.

← Chapter 2 Jump to: Chapter 4 →