Daniel 9

Gussi (EBIBILIA ENCHENU) 2020

← Chapter 8 Jump to: Chapter 10 →

1Ase omwaka bwe ritang’ani bw’okogamba kwa Dario, mosinto bw’Ahaswero bw’ororeria rw’Abamedi, oyobegetwe akaba omoruoti kogambera Abakalidayo,

2ee, ase omwaka bwe ritang’ani bw’okogamba kwaye, inche Danieli nkamanya korwa ase Amariko Amachenu igoro y’omobaro bw’emiaka eria ring’ana ri’Omonene riatebetie Yeremia omobani, ng’a emiaka emerongo etano na ebere nigo yarenge gocha koera, Yerusalemu ogendererete koba rituuri.

3Erio nkamorigereria Omonene Nyasae, nkamorigia nogosaba, na okoboria kw’oboitongo, na ase okweng’ata, nkeboyia chigunia na kweaka ribu.

4Nkamosaba Omonene, Nyasae one, nkaorokia ebibe biaito, ngateba: “Aye Omonene, ore Nyasae omonene, naende ore bw’okoorokia, aye okorenda okobwatana kwao kw’ogotianania na koorokia obwanchani bwao botari koera ase baria bagwanchete na kobwata amachiko ao.

5“Intwe twakorire ebibe na ayare amabe, twakorire obokayayu na ogosaria; twaonchokire, twatigire amachiko ao, na emeroberio yao echikire.

6Titwaigwerete abasomba bao ababani, baria barenge gokwana ase erieta riao ase abaruoti baito, na abanene baito, ne chisokoro chiaito, na ase abanto bonsi b’ense eye.

7Aye Omonene, nigo ogokora oboronge botambe, korende intwe botambe nigo tokwerentera obosooku buna iga rero, intwe abanto ba Yakobo, na abanto bamenyete Yerusalemu, na Abaisraeli bonsi, baria bare ang’e na abare aare ase chinse chionsi ase kwabaseretie gochia, ekiagera titwabete abegenwa asore.

8Aye Omonene, obosooku nigo bore asetore, na ase abaruoti baito, na ase abagambi baito, na ase chisokoro chiaito, ekiagera twakorire ebibe asore.

9Aye Omonene, Nyasae oito, nigo obwate amabera, naende nigo ogotwabera, nonya twasaririe asore.

10Titwaigwerete eriogi riao aye Omonene, Nyasae oito, ase okobwatia amachiko ao, ayio gwatochigete goetera ase abasomba bao ababani.

11Abaisraeli bonsi basaririe amachiko ao, baonchokire tibari koigwera eriogi riao. Ase ayio okoragererigwa okwo gwatianete koumora igoro yaito, okwo korikire ase amachiko a Musa, omosomba oo, aye Nyasae, gwatocheire, ekiagera intwe twakorire ebibe asore.

12Gwaikeranirie amang’ana ao, ayio gwakwanete asetore, na ase abagambi baria barenge gotogambera, ase ogotorentera amaakwa amanene. Inse y’erioba ayio akorekanire ase Yerusalemu tana gokorekana aande.

13Koreng’ana buna arikire ase amachiko a Musa, amaakwa ayio onsi atocheire. Nonya nabo titwasabete Omonene, Nyasae oito, atororere amabera; titwaonchogete korwa ase amabe aito na titwaigwete ekeene kiao.

14Ase ayio, aye Omonene nigo kwarenge nobomaene bw’ogotorentera amaakwa ayio, ekiagera aye Omonene, Nyasae oito, nigo ore omonyene oboronge ase ogokora kwao gwonsi, korende intwe titwaigwerete eriogi riao.

15“Na bono aye Omonene, Nyasae oito, aye kwarusetie abanto bao korwa ase ense ya Misiri nokoboko kwao kore nokobua, na kwemanyekanirie goika rituko ria rero. Intwe twakorire ebibe na ayare amabe.

16Aye Omonene, koreng’ana nogokora kwao gwonsi kw’oboronge koranche orusie endamwamu yao, na ekeririanda kiao, korwa ase Yerusalemu, omochie oo, ee, korwa ase egetunwa kiao egechenu. Ase engencho y’ebibe biaito, na ebie chisokoro chiaito, Yerusalemu amo nabanto bao babeire bagokwanwa bobe, ase egati y’abanto baria bonsi batoetanaine.

17Ase ayio bono, aye Nyasae oito, igwa ogosaba kwane inche omosomba oo, na ogosorora kwane, na ase engencho yao aye Omonene oraberie Obomenyo bwao Obochenu ase obosio bwao, Obomenyo obwo bore rituuri.

18Aye Nyasae one, tegerera oigwe, rigereria orore ogosirigwa gwaito, na omochie oyo okorokwa ase erieta riao. Intwe titori korenta ogosaba gwaito asore ng’a nabanyaboronge tore, korende nase engencho y’amabera ao amange.

19Aye Omonene, igwa! Aye Omonene, abera! Aye Omonene, tegerera oigwe, na okore emeremo yao; ase engencho yao aye omonyene totebana! Aye Nyasae one, kora ayio, ekiagera omochie oo nigo okorokwa ase erieta riao, na abanto bao boigo.”

20Erio agwo nkagenderera gokwana na gosaba, nkaorokia ebibe biane, na ebi’abanto baane Abaisraeli na korenta ogosorora kwane ase obosio bw’Omonene, Nyasae one, ase engencho y’egetunwa egechenu kia Nyasae one.

21Ekero nagendererete gosaba, Gabirieli, omonto oria konya narorire ase okorora koria kwe ritang’ani, aganchichera bwango okoiruruka. Nigo yarenge engaki y’okoruegwa gw’ekeng’wanso kia mogoroba.

22Akanyorokereria, agantebia, “Aye Danieli, bono nigo nachire nkoe obong’aini na okomanya.

23Ekero gwachagete ogosorora kwao, ring’ana rikaruegwa, na bono inche nachire gokoritebia, ekiagera aye nigo bwanchire mono; ase ayio rengereria igoro ye ring’ana riria, na omanye engencho y’okorora koria.

24“Chichuma emerongo etano na ebere nachio chiachikirwe ase abanto bao, na ase omochie oo omochenu, gokoora ogosaria na gosiria ebibe, na gokora okobwatanigwa ase engencho y’obobe, naende korenta oboronge bwa kare na kare na kobeka okorora koria na obobani boria ekemanyererio, boigo goaka Aase Aachenu Mono amaguta na koachena.

25Ase ayio, omanye na korengereria ng’a korwa engaki eria ring’ana riaruetwe igoro ya Yerusalemu ng’a noagachwe naende, goika ase engaki y’ogocha kw’oyomo Omoakwa Amaguta, oyore omogambi, nachibe chichuma isano na ibere. Naende ase chichuma emerongo etano nomo, na ibere, omochie noagachwe amo ne chinchera chiaye ne chiburi chiaye, korende ase engaki y’emechando emenene.

26Nyuma ye chichuma echio emerongo etano nomo, na ibere, Omoakwa Amaguta oria naitwe, tari ase engencho yaye ere omonyene. Abanto b’omogambi orache mbasirie omochie oyo amo n’Obomenyo Obochenu. Omoerio oye noche buna chiooro, na goika omoerio esegi nebeo, ekiagera nigo ochikeretwe ogosirigwa korwa kare.

27Ere nakore okobwatana ogokong’u kw’ogotianania nabanto abange ase echuma eyemo; na ase egati‐gati y’echuma eyio nakoore ebing’wanso na okoruegwa gwonsi tibiruegwa naende. Oyokorenta obobe bw’okogechia nigo arache okoiruruka gosiria. Ayio nigo aragenderere goika egesusuro ki’ogosirigwa achikeretwe korwa kare geikeranigwe.”

← Chapter 8 Jump to: Chapter 10 →