Daniel 5

Gussi (EBIBILIA ENCHENU) 2020

← Chapter 4 Jump to: Chapter 6 →

1Omoruoti Belisasari agakora omoyega omonene, akarangeria abanto abanene koreng’ana elifu eyemo b’oboruoti bwaye, akaba okonywa edivai amo nabanto abwo elifu.

2Ekero anyure edivai atindire, agachika ng’a ebikorero biria bie chitahabu na ebie chifeta ebio Nebukadinesaro ise asakorete korwa ase Hekalu agwo Yerusalemu, birentwe, erinde ere, na abanene b’oboruoti bwaye, na abakungu baye, na abakungu baye ba sere‐sere, banywere ebikorero ebio edivai.

3Erio bakarenta ebikorero biria bie chitahabu na ebie chifeta, ebio biasakoretwe korwa ase Hekalu, enyomba eria ya Nyasae agwo Yerusalemu; omoruoti, na abanene baria, na abakungu baye, na abakungu baye ba sere‐sere, bakabinywera.

4Bakanywa edivai na bagatogia chinyasae chiroisirie korwa ase chitahabu, ne chifeta, ne chitaai, na ebioma, na emete, na amagena.

5Mobosokano ebiara bi’okoboko kw’omonto bikaoroka, bikarika ase rioomo ri’enyasi y’enyomba y’omoruoti kororia ase ekebekerero gi’etaya, na omoruoti akarora okoboko koria gokorika.

6Erio agwo obosio bw’omoruoti bokaonchoka bokarachoka, na ebirengererio biaye bikamochanda; ebiimo bi’omobere oye bikororoba, na amaru aye agaakana.

7Omoruoti agaaka eriogi rinene, agachika ng’a abaragori na Abakalidayo bamanyete oborogi, na abamanyete igoro ye ching’enang’eni, barentwe, Agatebia abang’aini baria ba Babeli, “Omonto onde bwensi orasome amariko aya, naende antebie engencho yaye, ere nabekerwe eanga emonyinga, naende abekerwe chisonoi chie chitahabu igoti riaye, ere oyio nabekwe abe omogambi o gatato ase oboruoti obo.”

8Erio abanto abang’aini bonsi b’omoruoti bagasoa ime, korende tibanyarete gosoma amariko aria, gose gotebia omoruoti engencho yaye.

9Belisasari omoruoti agachandeka mono ore nomooondoko, na obosio bwaye bokaonchoka bokarachoka, na abanene b’oboruoti bwaye bakaondoka.

10Eting’ana, ng’ina omoruoti, akaigwa amang’ana aya omoruoti na abanene baria barenge gokwana, erio agasoa ase enyomba eria y’omoyega agateba, “Aye omoruoti ochie kare! Tobaisa gochandeka ase ebirengererio biao, gose obosio bwao boonchoke borachoke.

11Omonto oyomo nare aiga ase oboruoti bwao, omoika bwe chinyasae chinchenu ore ime yaye. Ase engaki eria iso arenge kogamba, omonto oyio akarorekana ore noborabu, na okomanya, na obong’aini bore buna obwe chinyasae, ime yaye. Omoruoti Nebukadinesaro iso akamobeka akaba omonene bw’abaringoria, na abarogi, na Abakalidayo bamanyete oborogi, na abamanyete igoro ye ching’enang’eni, ee, nabo omoruoti iso akorete,

12ekiagera omoika omuya mono, na okomanya, na obong’aini bw’okomanya engencho ye chindoto, na koorokia engencho y’emebayeno, na korongeyia obokong’u, biarenge ime ase omonto oria Danieli, oria omoruoti arogete Beli‐Tesasari. Bono tiga Danieli arangerigwe, nere oratebe engencho y’amariko aya.”

13Erio Danieli akarentwa ase obosio bw’omoruoti, na omoruoti akamoboria: “Inee! Naye Danieli oria, oyomo bw’abanto baria boosetwe korwa ase ense y’Abayuda, oria omoruoti tata arentete korwa ase ense eria?

14Naigure igoro yao ng’a omoika bwe chinyasae chinchenu nigo ore ime yao, naende ng’a oborabu, na okomanya, na obong’aini obuya mono, nigo bikonyorekana ime yao

15Bono abanto abang’aini na abarogi mbarentwa ase obosio bwane basome amariko aya, naende bantebie engencho yaye, korende tibanyarete gontebia engencho y’amang’ana aya.

16Korende naigure ng’a aye nonyare koorokia engencho y’amang’ana, na korongeyia obokong’u. Bono koranyare gosoma amariko ayio na komanyia engencho yaye, rirorio nobekerwe eanga emonyinga, na obekerwe chisonoi chie chitahabu igoti riao, aye nobe omogambi o gatato ase oboruoti obo.”

17Erio agwo Danieli akairaneria omoruoti, akamotebia, “Gacha ebiegwa biao, na kae omonto omoao ebio oganetie kong’a. Korende nonya naboigo, inche ningosomere aye omoruoti amariko aya, naende ngotebie engencho yaye.

18“Aye omoruoti, Nyasae Ore Igoro Mono naete Nebukadinesaro iso oboruoti, na obonene, na ogotogigwa, na okobua okonene,

19na ase engencho y’obonene obwo amoete, abanto bonsi, na ebisaku, na abanto b’emenwa ao ao, bakaba bagotengechigwa na koiroka ase obosio bwaye. Omonto onde bwensi ere aganetie goita, nigo arenge komoita, na oyo aganetie gotiga abe moyo, nigo arenge komotiga oba moyo; na oyo aganetie gokinia abe omonene, nigo arenge komokinia, na oyo aganetie gokeyia, nigo arenge komokeyia.

20Korende ekero enkoro yaye yeimokereretie igoro, na omoika oye okong’ete na koenena, nigo aseretigwe korwa ase ekerogo kiaye ki’oboruoti, akaurwa obonene bwaye.

21Nigo aseretigwe korwa ase mwanyabanto, na enkoro yaye ekaonchorwa ekaba buna eye ching’iti, akabetererigwa komenya amo ne chitigere chi’orosana na korisia obonyansi buna eng’ombe; omobere oye okanyirirerwa ne riime rikorwa igoro, goika ekereo amanyete ng’a Nyasae Ore Igoro Mono nere okogambera oboruoti bwa mwanyabanto, na nere okobeka onde bwensi anchire abe omogambi.

22“Aye Belisasari ore omwana oye, tibwekeeti ase enkoro yao nonya kwamanyete amang’ana ayio onsi,

23korende kweimokereirie igoro mamincha y’Omonene ore igoro. Ebikorero bi’enyomba yaye biarentirwe ase obosio bwao; aye amo nabanto b’oboruoti bwao, na abakungu bao, na abakungu bao ba sere‐sere, babinywereire edivai. Aye kwabeire kogotogia chinyasae chiroisirie korwa ase chitahabu, ne chifeta, ne chitaai, na ebioma, na emete na amagena, echio chitari korora, gose koigwa, gose chitamanyeti gento, korende Nyasae oria obomoyo bwao bore ase okoboko kwaye, ne chinchera chiao chionsi chire ase okobua kwaye, tomotogeti.

24Ayio naro agerete Nyasae agatoma okoboko koria gokarika amariko aya.

25“Amariko arigetwe naro aya: MENE, MENE, TEKELI, NA‐PARISINI.

26Engencho y’amang’ana ayio nero eye: MENE, engencho yaye: Nyasae obarire amatuko ’oboruoti bwao obokoorire;

27TEKELI, engencho yaye: kwarengirwe ase ekerengero na kwanyorekanire noremeire;

28PARISINI, engencho yaye: oboruoti bwao bwatananirwe, bwaeirwe Abamedi na Abaayemi.”

29Erio Belisasari akarua ogochika ng’a Danieli abekerwe eanga emonyinga, ne chisonoi chie chitahabu igoti riaye, na ararigwe ng’a ere nomogambi o gatato ase obogambi obo.

30Ase obotuko obwo obwo Belisasari, omoruoti bw’Abakalidayo, agaitwa agakwa,

31na Dario Omomedi akaira oboruoti obwo. Ere nigo arenge nemiaka emerongo etano nomo, na ebere.

← Chapter 4 Jump to: Chapter 6 →