Daniel 4

Gussi (EBIBILIA ENCHENU) 2020

← Chapter 3 Jump to: Chapter 5 →

1Omoruoti Nebukadinesaro agatoma amang’ana gochia ase abanto b’ebisaku bionsi, na ab’emenwa yonsi, baria bamenyete ase ense yonsi, akabatebia: “Omorembe omentekane asemore!

2Inche narorire ng’a mbuya ing’orokie ebimanyererio na amakumia Nyasae Ore Igoro Mono ankoreire.”

3“Naki ebimanyererio biaye bire ebinene, na amakumia aye are nokobua okonene! Oboruoti bwaye nigo bore obwa kare na kare, na obogambi bwaye nigo bogendererete ekiaare ase ekiaare.

4“Inche Nebukadinesaro nigo namenyete nomogoko ase enyomba yane, nkaba ngendererete goseseneka ase enyomba yane y’oboruoti.

5Nkarota okorota kwang’ondogetie; ekero naraire borere bwane, nkarora okorora gokaba kogonchanda ase ebirengererio biane.

6Ase ayio nkarua ogochika ng’a abanto abang’aini bonsi ba Babeli barentwe ase obosio bwane, erinde bantebie engencho ye chindoto chiria.

7Erio abaringoria, na abaragori, na Abakalidayo bamanyete oborogi, na abamanyete igoro ye ching’enang’eni, bagacha asende. Inche nkabatebia chindoto chiria, korende tibanyarete gontebia engencho yaye.

8Omoerio oye Danieli agacha ase obosio bwane, ere oria okorokwa Beli‐Tesasari, erieta ri’enyasae yane, na omoika bwe chinyasae chinchenu nigo ore ime yaye. Nkamoorokeria chindoto chiria, nkamotebia:

9Aye Beli‐Tesasari, omonene bw’abaringoria, namanyire ng’a omoika bwe chinyasae chinchenu nigo ore ime yao, naende namanyire ng’a obobisi tibori bore obokong’u asore. Chindoto narotete nachio echi, na aye intebie engencho yaye.

10“Oko nakwo okorora naroche ekero naraire borere bwane: Nkarora omote omonene orenge omotambe mono oteneine ase egati‐gati y’ense.

11Omote oria nigo ogendererete gokina, okaba ne chinguru, ogatambea gochia igoro, okarorekana ase chinsinyo chionsi chi’ense.

12Amato aye nigo arenge amaya, na amatunda aye nigo arenge amange; ase omote oria endagera nao yarenge goisanekia abanto bonsi. Ching’iti chi’orosana nao chiare konyora ekiriri chigokenderera inse yaye, ne chinyoni chikaba chikomenya ime ase chinsagia chiaye, na kera egetongwa kere moyo gekanyora endagera yaye korwao.

13“Ekero naraire borere bwane, nkarora ase okorora kwane omorendi omochenu ogoika korwa igoro.

14Ere agaaka eriogi rinene, agateba: Gecha omote oyio na onache chinsagia chiaye, osose amato aye na osiarere amatunda aye; ching’iti chi’orosana chitame korwa aroro, ne chinyoni chirue ase chinsagia chiaye.

15Korende otige egesike kere nemeri yaye ase riroba, kebe gesibire nekenyuri gi’ekioma na etaai, agwo ase obonyansi oborere bw’orosana. “Egesike ekio tiga kenyirirerwe ne riime rikorwa igoro, na egetari ki’omoruoti oyio kebe amo ne ching’iti chi’orosana, agwo ase egati y’ebimeri bi’ense.

16Enkoro yaye neonchorwe teba eya mwanyabanto naende; naegwe enkoro buna eye ching’iti ase ebiro bitano na bibere.

17Okonachwa kw’amang’ana aya kwarurwe nabarendi baria abachenu, na ogochika oko nigo kwarurwe na baria abachenu. Ase igo abare moyo banyare komanya ng’a Oyore Igoro Mono nere okogambera oboruoti bwa mwanyabanto, naende nere okoa oboruoti obwo ase onde bwensi aranche, naende nigo akobeka oria ore omoke mono ase egati y’abanto agambe ase oboruoti obwo.

18“Echio nachio chindoto inche Nebukadinesaro omoruoti narota. Aye Beli‐Tesasari, intebie engencho yaye, ekiagera abanto abang’aini bonsi bare ase oboruoti bwane basinyirwe gontebia engencho yaye, korende aye nonyare, ekiagera omoika bwe chinyasae chinchenu nigo ore ime yao.”

19Erio Danieli, oyo orenge korokwa Beli‐Tesasari, agaichanigwa ase ekero egeke ase engencho y’amang’ana aria, na ebirengererio biaye bikamoichania. Omoruoti akamotebia, “Beli‐Tesasari, chindoto echi na engencho yaye, tibigoichania.” Beli‐Tesasari akairaneria, akamotebia, “Omonene one, naki yare koba buya onye chindoto echi nchiaba igoro y’abwo bakogechete, na engencho yaye ebe igoro y’ababisa bao.

20Omote oria kwaroche orenge omonene mono, na omotambe gochia igoro, naende okarorekana ase chinsinyo chionsi chi’ense;

21amato aye arenge amaya, na amatunda aye namange, na ase omote oria endagera nao yarenge goisanekia abanto bonsi. Inse yaye ching’iti chi’orosana nao chiare konyora ekiriri chigokenderera, na ase chinsagia chiaye chinyoni chikaba chikomenyao.

22“Aye omoruoti, omote oria naye omonyene. Aye gwakinire, kwabeire ne chinguru. Obonene bwao bwakinire, bwaikire igoro, na obogambi bwao bwaikire ase chinsinyo chionsi chi’ense.

23Naende aye omoruoti, ekero kwarigereretie, okarora omorendi oria omochenu ogoika korwa igoro ogoteba: Gecha omote oyo oyosirie, korende otige egesike kiaye kere nemeri yaye ase riroba. Ogetige gesibire nekenyuri gi’ekioma na etaai, agwo ase obonyansi oborere bw’orosana, kenyirirerwe ne riime rikorwa igoro; egetari ki’omoruoti oyio kebe amo ne ching’iti chi’orosana ase ebiro bitano na bibere.

24“Aye omoruoti, engencho ye chindoto chiria neye: Okonachwa kw’amang’ana aya nigo kwarurwe n’Oyore Igoro Mono gocha asore, aye omoruoti, omonene one.

25Noserigwe gochia aare korwa ase mwanyabanto, na obomenyo bwao nigo borabe amo ne ching’iti chi’orosana. Nobetererigwe orisie obonyansi buna eng’ombe, na nonyirirerwe ne riime rikorwa igoro, ase ebiro bitano na bibere, goika onyare komanya ng’a Oyore Igoro Mono nere okogambera oboruoti bwa mwanyabanto, naende nere okoa oboruoti obwo ase onde bwensi aranche.

26Na buna amang’ana achigetwe ng’a egesike ki’omote getigwe amo nemeri, oboruoti bwao nabokoiranere ekero keria oramanye ng’a Oyore Igoro Mono nere okogamba.

27“Ase ayio, aye omoruoti, ancha ogosemia oko kwane. Tokora ebibe, na chaka gokora oboronge; tiga obobe bwao, na ororere abagokorerwa bobe amabera. Ande nabo oranyare komenterwa ogosesenigwa ase amatuko ao.”

28Ayio onsi akamonyora Nebukadinesaro omoruoti.

29Ekero emetienyi ikomi na ebere yachia koera, akariina kerama igoro ki’enyomba y’oboruoti agwo Babeli, agataara aroro,

30agaaka eriogi, akabora, “Inee! Oyo tari Babeli omochie omonene, oyo inche naagachire ne chinguru chiane, na okobua kwane, obe obomenyo bw’omoruoti, erinde obe ogotogigwa kw’obonene bwane?”

31Ekero agendererete gokwana, eriogi rikarwa igoro, rigoteba “Aye omoruoti Nebukadinesaro, aya naro ogotebigwa: Oboruoti bwarusigwe asore;

32aye noserigwe korwa ase mwanyabanto, omenye amo ne ching’iti chi’orosana, nobe gokorisia obonyansi buna eng’ombe. Okoore ebiro bitano na bibere goika ekero oramanye ng’a Oyore Igoro Mono nere okogambera oboruoti bwa mwanyabanto, na nere okoa oboruoti obwo ase onde bwensi aranche.”

33Ase engaki eyio ring’ana riria rigaikeranigwa igoro ya Nebukadinesaro. Agaserigwa korwa ase mwanyabanto, akaba okorisia obonyansi buna eng’ombe; omobere oye okaba okonyirirerwa ne riime rikorwa igoro, goika etukia yaye egakina ekaba entambe buna amarionya ’ensoti, ne chinchara chiaye chigakina chikaba buna echie chinyoni.

34“Ekero engaki eyio yaerete, inche Nebukadinesaro nkarigereria gochia igoro, na obong’aini bwane bokang’iranera. Erio nkamotogia Oyore Igoro Mono, nkamobaka na komosika ere oyoreo goika kare na kare.” “Okogamba kwaye nigo kore ogwa kare na kare, na oboruoti bwaye nigo bogendererete ekiaare ase ekiaare.

35Abanto bonsi bamenyete ase ense nigo babarire ng’a nigo bare bosa. Ere nigo agokorera emeganda ya igoro buna anchete, akorera na mwanyabanto bare ase ense boigo. Onde tari oramotange, gose komoboria: Ngento ki ekio ogokora?”

36Ase engaki eyio obong’aini bwane bokang’iranera, na obonene bw’oboruoti bwane, na obw’amasikani aane, bikang’iranera boigo. Abasemia baane, na abanto baane abanene bagacha kondigia, na inche nkairanerigwa oboruoti bwane, na nkamenterwa okobua okonene goetania.

37Bono inche Nebukadinesaro nigo nkomotogia Omoruoti ore igoro na komobaka, ekiagera ogokora kwaye gwonsi nokwa boronge, ne chinchera chiaye boigo, na abwo bare abaenenu nigo akobakeyia.

← Chapter 3 Jump to: Chapter 5 →