Daniel 2 — Gussi (EBIBILIA ENCHENU) 2020

1Ase omwaka o kabere bw’okogamba kwa Nebukadinesaro ere akarota chindoto; ase ayio agachandeka ase ebirengererio biaye, tarara chitoro.

2Erio omoruoti agachika ng’a abaringoria na abaragori, na abarogi, amo n’Abakalidayo bamanyete oborogi, barentwe, erinde bamotebie chindoto chiaye. Ase ayio abanto abwo bonsi bagacha ase obosio bwaye.

3Ere akabatebia, “Narotete chindoto, na ebirengererio biane nigo bichandegete, Ninganetie montebie chindoto chiria.”

4Abakalidayo baria bagatebia omoruoti ase omonwa bw’Ekearamaik, “Aye omoruoti ochie kare! Totebie intwe abasomba bao chindoto echio, na intwe ntonyare kogotebia engencho yaye.”

5Omoruoti akabairaneria, akabatebia, “Amang’ana aane tari koonchoka, na motantebeti chindoto chiane amo nengencho yaye, nigo morabutoranwe ekiimo ase ekiimo, ne chinyomba chiaino nchitagorwe chibe amatombe.

6Korende komorantebie chindoto chiria amo nengencho yaye, rirorio nimbae ebiegwa, na eng’eria, na amasikani amanene. Bono ntebie chindoto chiria amo nengencho yaye.”

7Bakairaneria omoruoti eria kabere, “Aye omoruoti, tobebie intwe abasomba bao chindoto chiria, na intwe ntogotebie engencho yaye.”

8Omoruoti akairaneria, akabatebia, “Ekeene, namanyire ng’a nigo moganetie koegwa chingaki, ekiagera mwamanyire ng’a amang’ana aane tari koonchoka.

9Korende motantebeti chindoto chiria, ogochika nkore okomo gwoka narure igoro yaino. Mwabeire mokobwatana ase ogontebia oborimo na amang’ana ’obong’ainereria, mosemeretie ng’a chingaki nchionchorwe. Ase ayio goika montebie aya narotete, erio nario ndamanye ng’a mwamanyire engencho yaye moyentebie.”

10Abakalidayo baria bakairaneria omoruoti, bakamotebia, “Monto onde tari ase ense eye oranyare koorokia ring’ana erio aye omoruoti oganetie komanya, ekiagera omoruoti onde tari, nonya ore omonene mono, gose ore nokobua kore naki, oboririe egento kenga buna ekio korwa ase abaringoria, gose abaragori, gose korwa ase Abakalidayo bamanyete oborogi.

11Egento eke aye omoruoti kwaboririe nigo kere egekong’u mono, na onde tari oranyare gokeorokia ase omoruoti otatiga chinyasae, na echio tichimenyeti amo na mwanyabanto.”

12Ase engencho y’amang’ana ayio, omoruoti akaba nendamwamu na ekeririanda ekenene, agachika ng’a abang’aini bonsi ba Babeli basirigwe.

13Ase ayio ogochika gokaruegwa ng’a abanto abwo bonsi baitwe, na Danieli amo na baria bamwabo barigigwe baitwe boigo.

14Ekero Arioki, omochiki bw’abarendi b’omoruoti, agendete ng’a aite abanto abang’aini ba Babeli, Danieli agakwana nere ore nobong’aini na obomanyi bw’amasikani,

15akamoboria, “Nase ki omoruoti arure ogochika ogotindi iga?” Erio Arioki agatebia Danieli amang’ana onsi.

16Danieli akagenda ase obosio bw’omoruoti, akamosaba amoe engaki achiche komotebia engencho ye chindoto chiria.

17Erio Danieli akairana gochia inka, agatebia Hanania, na Mishaeli, na Asaria, abamwabo, amang’ana aria,

18akabatebia ng’a basabe Nyasae ore igoro abarorere amabera, aborokie obobisi boria, erinde ere omonyene na baria bamwabo tibasirigwa amo nabanto baria abang’aini bande ba Babeli.

19Erio obobisi boria bokamaanorwa ase Danieli ase okorora kwa botuko. Ase ayio Danieli akamotogia Nyasae ore igoro, agateba:

20“Erieta ria Nyasae ritogigwe goika kare na kare! Obong’aini na okobua nebiaye.

21Ere nigo akoonchora ebiro ne chingaki; nigo akorusia abaruoti, naende obeka abande; nigo akoa abang’aini obong’aini bwabo, na abamanyi okomanya kwabo.

22Nigo akoorokia ay’obobisi bwa ime, nigo amanyete ayare ime ase omosunte; na omobaso nigo ore amo nere.

23Aye Nyasae bwe chisokoro chiane, nagoakeire ng’a mbuya mono na kogotogia, ekiagera aye kwang’eire obong’aini ne chinguru, bono kwamanyirie inche aya twagosabete, ekiagera gwatoorokeirie aya omoruoti aganetie komanya.”

24Ase engencho eyio Danieli akagenda ase Arioki, oria omoruoti achorete ng’a aite abanto abang’aini ba Babeli, akamotebia, “Tobaisa goita abang’aini ba Babeli; ng’ire ase obosio bw’omoruoti, imotebie engencho ye chindoto chiria.”

25Erio bwango Arioki akaira Danieli ase obosio bw’omoruoti, akamotebia, “Nanyorire omonto korwa ase egati y’abooswa baria b’Abayuda oranyare kogotebia aye omoruoti engencho ye chindoto chiao.”

26Omoruoti akaboria Danieli, oria orogetwe Beli‐Tesasari, “Inee! Aye nonyare gontebia chindoto echio narotete na engencho yaye?”

27Danieli akairaneria omoruoti, akamotebia, “Onde tari ase abanto abang’aini, gose abaragori, gose abaringoria, gose abanto bamanyete igoro ye ching’enang’eni oranyare koorokia obobisi obo aye omoruoti kwaboririe,

28korende Nyasae ore igoro nere oranyare koorokia obobisi. Nere orakomanyie aye omoruoti Nebukadinesaro amang’ana agochia gokorekana ase amatuko agochi‐gocha. Chindoto chiao na okorora kwarora, ekero kwaraire borere, nachio echi:

29“Aye omoruoti, ekero kwaraire borere bwao, okarengereria amang’ana agochia gokorekana ase amatuko agochi‐gocha, na ere oria okoorokia obobisi nigo agokomanyia amang’ana agochia gokorekana.

30Bono obobisi obo bwamaanoirwe asende, tari ng’a inche nigo imbwate obong’aini goetania abanto bande bonsi bare moyo, korende ng’a aye omoruoti omanyigwe engencho ye chindoto chiria, naende onyare komanya ebirengererio bire ase omoyo oo.

31“Aye omoruoti, ase okorora kwao okarora omogwekano omonene mono, oteneine ase obosio bwao. Omogwekano oyio nigo orenge omotambe, okomeka‐meka noborabu obonene, na okororekana kwaye nigo kwarenge gw’okoondokia.

32Omotwe bw’omogwekano oria nigo oroisetigwe korwa ase etahabu engiya mono; egekuba kiaye na amaboko aye nigo biaroisetigwe korwa ase chifeta, na enda yaye na amariagati aye nigo biaroisetigwe korwa ase chitaai.

33Amagoro aye nigo aroisetigwe korwa ase ebioma, na ebisanyi bi’amagoro nigo biarenge ekeng’ese ki’ebioma, na ekeng’ese ki’amaroba.

34Ekero kwarigereretie okarora rigena rigotegoka ritakuniri namaboko a mwanyabanto, rigaaka amagoro ’omogwekano oria arenge ay’ebioma na amaroba, rikayasamunyora akaba ebisamunye.

35Erio ebioma biria, na amaroba, ne chitaai, ne chifeta, ne chitahabu, bionsi ebio bigasamunyoranwa, bikaba buna omoiriro ore ase ekeooreri ekero ki’eguru‐gura. Omwaga okairurukia ebinto biria gochia aare nonya nokoba kwabo tikwarorekana aande. Korende rigena riria riagete omogwekano oria rigakina, rikaba egetunwa ekenene kegaichora ase ense engima.

36“Oko nakwo okorota kwarotete, na bono intwe ntogotebie aye omoruoti engencho yaye.

37Aye omoruoti nigo ore omonene goetania abaruoti bande. Nyasae ore igoro okoeire oboruoti, na okobua, ne chinguru, na obonene,

38naende obekire mwanyabanto ase amaboko ao obagambere aande onsi ase bamenyete; okobekire ogambere boigo ching’iti chi’ense ne chinyoni chionsi; na omotwe oria bw’etahabu kwaroche noro aye.

39Korwa nyuma yao oboruoti bonde bore oboke ase obwao mbooroke, na nyuma y’oboruoti obwo, obonde bwa gatato bore obw’etaai mbooroke, na borobwo mbogambere ense yonsi.

40Naende oboruoti bwa kane mbooroke, bore obokong’u buna ekioma kegoaka na gosenyenta ebinto bionsi. Buna koreng’ana ekioma kegosenyenta ebinto, oboruoti boria nabo borasenyente na gosiria onsi.

41Na buna kwaroche ebisanyi na ebiara bi’amagoro biarenge ekeng’ese ki’amaroba na ekeng’ese ki’ebioma, engencho yaye nero eye: Oboruoti obwo mbwatananekane. Korende chinsemo chinde chire chinkong’u buna ekioma nachibe ime ase oboruoti obwo, buna koreng’ana kwarora ekioma keburukaine namaroba.

42Na buna ebiara bi’amagoro biarenge ekeng’ese ki’ebioma na ekeng’ese ki’amaroba, naboigo oboruoti boria borabe obokong’u ensemo eyemo, na ensemo ende obworo.

43Buna kwarora ekioma keria keburukaine namaroba, naboigo abanto barasang’anane ase okonyuomerana, korende tibakonyara kobwatana amo buna koreng’ana ekioma getari kobwatana namaroba.

44Ase amatuko ’abaruoti abwo Nyasae ore igoro narente oboruoti botanyare gosarigwa, gose okobua kw’oboruoti obwo tibokoegwa egesaku kende. Obwo mbosenyente amaruoti onsi na koyasiria, na borobwo obonyene mbogenderere kobao goika kare na kare,

45buna koreng’ana kwaroche rigena rigotegoka rinyene korwa ase egetunwa, ritategoiri namaboko a mwanyabanto, ne rigena riria rigaaka na gosamunyora ekioma, na etaai, na amaroba, na efeta, na etahabu. Nyasae ore omonene okomanyirie aye omoruoti amang’ana agochi‐gocha. Chindoto chiao nechi’ekeene, na engencho yaye nagotebirie ney’ekeene.”

46Erio Nebukadinesaro omoruoti agatung’ama inse akaumama, akaorokia amasikani ase Danieli, agachika ng’a ekeng’wanso na ubani biruegwe ase Danieli.

47Omoruoti agatebia Danieli, “Ekeene, Nyasae oino nere Nyasae ore igoro ye chinyasae chionsi, na Omonene bw’abaruoti, naende nere okomaanora obobisi. Namanyire aya, ekiagera aye kwamaanoire obobisi obo.”

48Erio omoruoti akaa Danieli amasikani amanene, na ebiegwa ebinene ebinge, naende akamobeka akaba omogambi igoro ase orogongo rwonsi rwa Babeli na omoteneneri omonene igoro y’abang’aini bonsi ba Babeli.

49Danieli akaboria Nebukadinesaro, na ere akabeka Sadaraka, na Meshaka, na Abedi‐Nego, bakaba abanene igoro ase amang’ana ’orogongo rwa Babeli, korende Danieli akabeera ase enyomba y’omoruoti.