Judges 16

Gussi (EBIBILIA ENCHENU) 2020

← Chapter 15 Jump to: Chapter 17 →

1Samison akagenda Gasa, na aroro akarora omokungu omotayayi, akagenda akarara nere.

2Ekero abanto ba Gasa baigwete ng’a Samison nao are, bagaetanana aase aria, bakamoboera ase egeita ki’omochie obotuko obogima. Bagakira‐kiri obotuko bwonsi, bagateba, “Tiga toganye goika bokie mambia, erio tomoite.”

3Korende Samison akarara goika botuko gati, erio akaimoka, akabwata ebisieri bibere bi’egeita ki’omochie amo nemetobwa yaye ebere; erio akabisimora amo nebioma na ebisiekero, akabibeka ase amareko aye, akabiira igoro ase egetunwa keria kerochie Heburoni.

4Naende nyuma y’ayio Samison akaba ogwancha omokungu ore korokwa Delila, omenyete ase ense omweya ya Soreki.

5Abanto abatang’ani b’Abafilisti bakagenda ase omokungu oria, bakamotebia, “Gachie omoebererie Samison agotebie obobisi bwe chinguru chiaye, naende buna toranyare komobua; erio tonyare komosiba na komobeka inse asetore. Kera oyomo asetore nakoe chisekeli chie chifeta elifu eyemo ne rigana erimo.”

6Ase ayio Delila agatebia Samison, “Koranche, ontebie obobisi bwe chinguru chiao, naende ontebie buna omonto aranyare kogosiba akobue.”

7Samison akamoiraneria, “Kabaransibe ne chingori chi’emenyiki isano na ibere chinyia chitaroma, erio nainche nimbe omworo, na imbe buna monto onde bwensi.”

8Erio abatang’ani b’Abafilisti bakarentera omokungu oria chingori chi’emenyiki isano na ibere chinyia chitaroma, agasibera Samison nachirochio.

9Omokungu oria nabisete abanto baganyete ase akanyomba ka ime. Erio akamorangeria, “Samison! Abafilisti aba bachire gokobwata!” Korende Samison akabutora chingori chiria buna eusi enyororo ekorurwa nomorero. Ase ayio, obobisi bwe chinguru chiaye tibwamanyekanete.

10Delila agatebia Samison, “Rora, gwankoreire echeche, naende gwantebirie oborimo. Koranche ontebie buna oranyare gosibwa.”

11Samison akamotebia, “Kobaransibe ne chingori chinyia chitarakorerwa emeremo, erio nimbe omworo, na imbe buna monto onde bwensi.”

12Erio Delila akaimokia chingori chinyia, akamosibera. Naende akamorangeria, “Samison! Abafilisti aba bachire gokobwata!” Abanto nigo bebisete baganyete ase enyomba ende. Korende Samison akabutora chingori chiria korwa ase amaboko aye buna eusi enyororo.

13Naende Delila agatebia Samison, “Goika bono gwankoreire echeche, na gontebia oborimo. Ntebie buna oranyare gosibwa.” Samison akamoiraneria, “Korasiberanie ebikundo biria bitano na bibere bi’etukia yane ase egetambaa keria okoroisia na kobisiba bokong’u nekegobanio, tibikorusigwao, erio nimbe omworo, na imbe buna monto onde bwensi.” Ekero Samison ararete, Delila akabwata ebikundo biria bitano na bibere bi’etukia yaye,

14akabisiberania ase egetambaa are koroisia, akabisiba bokong’u nekegobanio. Naende akamorangeria, “Samison! Abafilisti aba bachire gokobwata!” Korende Samison akaboka, akang’usa etukia yaye korwa aase yasiberanetigwe na gokong’igwa.

15Omokungu oria akamoboria, “Naki oranyare goteba ng’a nonyanchete, ekero enkoro yao etari amo nainche? Gwankoreire echeche chintunda isato na torantebia obobisi bwe chinguru chiao.”

16Na ekero omokungu oria arenge kona‐komoboraboria amang’ana ayio rituko ase rituko, Samison akarosa kegima, goika akerusia moyo.

17Ase igo omoerio akamotebia obobisi bwaye bwonsi, akabora, “Onde tana gokigita etukia y’omotwe one, ekiagera inche nigo naatananetwe ase Nyasae buna Omwerwa oye korwa ase enda ya baba. Inse gokigitwa etukia y’omotwe one, chinguru chiane nigo chirarue asende, naende imbe omworo, na imbe buna monto onde bwensi.”

18Ekero Delila aroche ng’a Samison omotebirie obobisi bwaye bwonsi, agatoma abanto barangerie abatang’ani b’Abafilisti, babatebie, “Inchuo naende rimo, ekiagera ere ontebirie obobisi bwaye bwonsi.” Erio abatang’ani b’Abafilisti bagacha ase omokungu oria, bakarentana chibesa chiria.

19Bono Delila akaareria Samison ase amagoro aye, akarangeria omonto ache agingire ebikundo biria bitano na bibere bi’etukia ya Samison. Erio Delila agachaka komotura, korende chinguru chia Samison konya chiarure asare.

20Erio akarangeria, “Samison! Abafilisti aba bachire gokobwata!” Samison akaboka korwa ase chitoro chiaye, akarengereria ng’a “Bono ninyesibore buna botambe, ngende,” ekiagera tamanyete ng’a Omonene omotigire.

21Abafilisti bakamobwata, bakamokonora amaiso, naende bakamoira gochia Gasa, bakamosiba ne chingataare chie chitaai. Bakamobeka gosia obosie agwo ase enyomba y’obosibwa.

22Korende etukia yaye egachaka komera naende nyuma gakigitirwe.

23Abatang’ani b’Afilisti bagasangererekana koruera Dagoni, enyasae yabo, ekeng’wanso ekenene, na gochenga, bagoteba, “Enyasae yaito yabekire omobisa oito Samison ase amaboko aito.”

24Na ekero abanto baroche Samison, bagatogia enyasae yabo, bagateba, “Enyasae yaito yabekire omobisa oito ase amaboko aito, omobisa oria osaririe ense yaito na oitire abanto baito abange.”

25Na ekero chinkoro chiabo chiabete nomochengo, bagateba, “Torentere Samison atokorere chigosori!” Ase ayio bakarenta Samison korwa enyomba y’obosibwa, ere akabakorera chigosori. Bakamobeka agatenena gati‐gati ye chisiiro.

26Samison agatebia omosae oria omobwatete okoboko kwaye, “Ntige ntaba‐tabe, nkune chisiiro chisiirete enyomba, inyesiirere ase chirochio.”

27Enyomba nigo yaichire nabanto, abasacha na abakungu, na abatang’ani bonsi b’Abafilisti nao barenge, na igoro ase ekerama mbarengeo abanto koreng’ana chilifu isato, abasacha na abakungu na barabwo nigo basonchete buna Samison agokora chigosori.

28Erio Samison akarangeria Omonene, akabora, “Omonene Nyasae, nagosabire, ong’inyore, ong’e chinguru ase engaki eye yoka. Aye Nyasae, erio inyeruserie egesiomba ase amaiso aane abere igoro y’Abafilisti!”

29Agwo Samison akaboania chisiiro chiria ibere chia gati‐gati, chiasiirete enyomba, agachibwata bokong’u, esiiro eyemo nokoboko okomo, na eyende nokoboko konde.

30Erio agateba, “Tiga nkwe amo n’Abafilisti aba.” Naende agekumba ne chinguru chiaye chionsi, na enyomba eria ekagwera abatang’ani b’Abafilisti amo nabanto bande bonsi abarengeo. Abanto baria Samison aitete ekero akwete omonyene nigo barenge abange kobua baria bonsi abaitete ekero arenge moyo.

31Abamura bamwabo amo nabanto bonsi b’eamate yaye bagatirimboka kwoyia omobere oye. Bakamoira, bakamotindeka ase egati ya Sora na Esitaoli, ase embeera ya Manoa ise. Samison konya ogambeire Abaisraeli ase engaki y’emiaka emerongo ebere.

← Chapter 15 Jump to: Chapter 17 →