Judges 5

Gussi (EBIBILIA ENCHENU) 2020

← Chapter 4 Jump to: Chapter 6 →

1Ase rituko riria Debora na Baraki, mosinto bw’Abinoamu, bagatera ogotera oko:

2Motogie Omonene, ekiagera abaraai batang’anete Abaisraeli, na abanto beruete ase ogwancha kwabo!

3Inwe abaruoti, igwa! Inwe abagambi, tegerera! Inche ninterere Omonene ase okomobaka, nintogie Omonene, Nyasae bw’Abaisraeli!

4Omonene, ekero kwarwete ebitunwa bia Seiri, na ogataara korwa ense ya Edomu, ense egatengechigwa, ne embura egatwa korwa igoro. Ee, amare agaitera amache.

5Ebitunwa bikanyegerigwa ase obosio bw’Omonene, ee, nonya negetunwa keria gia Sinai, ase obosio bwa Nyasae bw’Abaisraeli.

6Ase amatuko a Samigari, mosinto bw’Anati, na ase amatuko a Yaeli, chinchera chinene nigo chiariibete, abagendi nigo baare goeta ase chinsana.

7Emechie y’Abaisraeli nigo yaraire, kende tikiarenge gokorekao goika aye Debora okaimoka, ee, goika okaimoka, okaba ng’ina ase Abaisraeli.

8Barabwo bagachora chinyasae chinyia, erio chisegi chikaba ase ebiita biabo. Ase abanto chilifu emerongo ene ase Abaisraeli, inee, onde obo narorekanete ore nenguba gose ritimo?

9Enkoro yane nigo ere amo nabatang’ani b’Abaisraeli, na ase abanto abwo beruete ase ogwancha. Motogie Omonene!

10Inwe abamokoriina chitigere chindabu, nainwe abamogoikaransa ase emegeeke yaino, nainwe abamogotaara ase chinchera, morarie amang’ana ayio!

11Tegerera! Abwo bagoaka amariogi ase bagosangererekana kobuucha amache, nigo bagokwana igoro y’obobui bw’Omonene, ee, igoro y’ogokora kwaye okoronge gokogambera Abaisraeli. Erio abanto b’Omonene bagatirimboka gochia ase ebiita.

12Imoka, Debora, imoka! Imoka, otere ogotera! Naye Baraki, mosinto bw’Abinoamu, tenena, oire abanto abwo gwosire.

13Abatigarete bagatirimboka gochia ase abatang’ani babo; Omonene agacha ase engencho yane arwanie chituoni.

14Abwo ritina riabo riarenge ase ense y’Abaameleki, bagatirimboka korwa ase Efraimu, abanto b’egesaku kia Benjamin bagakobwatia. Abatang’ani b’abarwani bagatirimboka korwa Makiri, na abarenge abariki ase esegi korwa Sabuloni.

15Abanene b’Abaisakaru nigo babwatetie Debora, na buna Abaisakaru bakorete, naboigo na Baraki, bagatirimboka gochia ase ense omweya, bakabwatia chimbaratero chiabo. Korende ase chindooche chi’abanto b’egesaku kia Reuben, okogamba na okoroberia okonene nigo biarengeo.

16Nase ki moikaransete ase eero ye ching’ondi, mokoigwa abarisia bakobugia ebiroria bakorangeria ching’ondi? Ee, ase chindooche chi’abanto b’egesaku kia Reuben; okogamba na okoroberia okonene nigo biarengeo, nigo kwarenge okoamererania okonene.

17Abanto ba Gileadi, moocha ya Yorodan, mbaikaranseteo. Na abanto b’egesaku kia Dani, nase ki babeerete ase chimeeri chiabo? Abanto b’egesaku gi’Aseri bagaikaransa enyancha mbarabare, bagakira‐kiri, bakabeera ase emesomo yabo.

18Abasabuloni bakerua nonya ngoika ogokwa, na Abanafutali boigo ase okorwana esegi ase ebitunwa.

19Abaruoti bagacha, bakarwana, ee, abaruoti ba Kanani bakarwana ase Taanaki, agwo ase chindooche chia Megido, korende tibasakorete chifeta.

20Korwa igoro esegi ekarwana, ching’enang’eni chikarwania Sisera ekero chiare ase orogendo rwabo.

21Orooche rwa Kisoni rokabaira, orwo norooche rwa kare rwa Kisoni. Omoyo one, genderera ne chinguru!

22Erio chibarasi chiare gotitiria nebitaago biabo, chituoni chiachiriinete chiare gocharara‐charara.

23Omomalaika bw’Omonene nigo agoteba, “Ragereria Merosi, ragereria abanto bamenyeteo, ekiagera tibachete gokonya Omonene, komokonya korwania abare ne chinguru.”

24Yaeli, moka Heberi Omokeni, nasesenirie kobua abakungu bande, ee, nasesenirie kobua abakungu bande bamenyete ase chiema.

25Sisera agasaba amache, erio Yaeli akamoa amabeere, akamoa amaguta amabeere are ase egetaabo ekiya.

26Akarambora okoboko kwaye, akaimokia ekerochi ki’eema, na ase okoboko kwaye gw’okorio akaimokia ekegogi, agaakera Sisera nakerokio, agakong’onta omotwe oye, akabeta chintakunero chiaye gochia ime.

27Sisera akeringa akagwa inse, akagwa inse ase amagoro a Yaeli, akarambereria inse ase amagoro aye, agwo ase agwete agakwa.

28Ng’ina Sisera akarigereria korwa ase ekebao, agatengera goetera ase ekebao kiabekire ebitange, akarera, “Nase ki chigari chiaye chiatebanire gocha? Nase ki amagoro e chibarasi chiaye chie chigari chiatebanire koirana?

29Abaiseke abang’aini abarenge amo nere bakamoiraneria, na ere omonyene akaba okoiranerera amang’ana aya:”

30“Ande, nigo banyorire ebisakorwa bakare gwatanana ase egati yabo, kera omonto aire omoiseke oyomo, gose babere; Sisera ere aire ebitambaa bi’ebieni ebiya, egetambaa keroisirie ekiya, ekemo gose bibere, bibe ebisakorwa ase rigoti riaye.”

31“Omonene, tiga ababisa bao bonsi basire buna igo, korende baria bagwanchete babe buna erioba rire ekero rigosoka ne chinguru.” Na ense eria ekaba nobotoereru ase engaki y’emiaka emerongo ene.

← Chapter 4 Jump to: Chapter 6 →