1 Kings 1 — hadiyya

1Adil Daawiit lobakata lomma'nnaa hee'u bikkina ixxi gassaan lobakat eddechcha tuubba'a eddeesso'o. Ihukkaarem iibba uwweena xanukkoyyi hee'ukko.

2Ee bikkina adi'l gassaan «Ni adila, kiinninne ikka'a keese abooyyitam baajaam landichcho hansaa eemboommo; isem kiinninne maqire iinse'lla'a keese iibbissamo» yito'o.

3Isra'ee'l uullanne hundannem hassa'a Shuunaam yakkam beyyonne Abishaage yakkam mat danaam landichcho siidda'a adilina eebbo'o.

4Isem lobakata mishissamotan hee'llo'o. Adilinne maqire afuutta'a abooyyitu'uuyyi awwaaddam hee'llo'o. Ihukkaarem adil issenne eebaqqanchi edancha edamukkoyyo.

5Abiseeloomiinsi lasage Daawiit Hagiit yamantam meentichchonne qaru wona awwonaanchi foorinne yoo beet Adooniyaasatte hee'ukko. Ixxim qoocci mishisoo danaam hee'ukko. Daawiit ixxo ayyi luwwinam sogaahii axeeraahii la'ooyyo. Ee bikkina Adooniyaas adil iheena hasukko. Ee mixano wonsheenam faraxxi gaarre'e, faradoo o'l mu'uta iyyaa'nneka ontayyee gudisukko.

7Ee bikkina Xaruy beet Yoo'aabinnee qeessichchi Abiyaataarinnee maqire a'llamukko. Ixxuwwim ixxi sawwitenne iittanto'o.

8Ihukkaarem qeessichchi Saadooq, Yoodaah beet Baanaay, hiraagaanchi Naataan, Shiimi'i, Ree'iinii Daawiit lombi waardiyyii Adooniyaas woshshanne iittanto'oyyo.

9Mat balla Adooniyaas Eniroogeela yakkam wo'i bu'i gadanonne Zoheeleet kina yakkam beyyonne gereebba, mirgo'uwwaa di'ir labeennuwwaa duraa kitima hincaa'ukko; adi'l oos ikko'i ixxi abbaayyuwwaa Yihuxxi uulli gassaanoo hundam ee kiti'm ugudina waattona weeshukko.

10Ihukkaarem hiraagaanchi Naataana, Baanaayaa adi'l lombi waardiyyuwwaa ixxi abbaayyi Salamoonaa weeshukkoyyo.

11Ee lasage Naataan Salamoon am Bersaabeh beyyo maraa «Ni moollanni Daawiit la'oo'nnim Hagiit beet Adooniyaas adil ihukkisa macceessittoyyonnihe?» yaa xa'mmukko.

12«Ki gagaa ki beet Salamoonaa gatisseena xantoo sogitano sogoommo.

13Adil Daawiit beyyo mattaa ‹Ki beet Salamoon i lasage adil ihaa i adilla'n barcumanne afuurookko› yitaa iina ki awwaadaanchona hidi'l sagara aaggaa hee'llittoyyonnihe? Eehannah kaba Adooniyaas hinkid adil iheena xanukko?» yihe.

14Odim Naataan «At adil Daawiitinne woccittuuyyim anim aagaa at woccittok hundim hanqi ihukkisa qoxxisaa kuroommo» yukko.

15Ee bikkina Bersaabeh adila atoorassiteena ixxi yoo jagara aaggo'o; adil Daawiit lobakata lomma'nnu bikkina Shuunaa'm uulli landichcho Abiishaage erisa abooyyitam hee'llo'o.

16Bersaabehem uullanne aad heeshita'a anga ki'isso'o. Adilim maha hassoolla?» yukko.

17Bersaabehem «I moollanna, i beet Salamoon ki adillano lago aa'aa adil ihoo'isaa adilla'n barcumannem afuuroo'isaa ki Moollanni Waa'i summinne iina hide'llaa hee'llito.

18Ihukkaarem kaba at laqqoo'nnim Adooniyaas adil ihaakko.

19Ee bikkina lobakat mirgo'uwwa, di'ir labeennuwwaa gereebbaa kitimina hincaa'aakko; ee ugudannem siidantona adi'l ooso, qeessichchi Abiyaataaraa ki gogoxxi ijaajaanchi Yoo'aabaa weeshaakko. Ihukkaarem ki awwaadaanchi Salamoona weeshukkoyyo.

20I moollanna, adila, Isra'ee'l minaadab hundim kiinniinsi lasonne adil ihookkok ayyetda'e ihukkisa kuttoo'isina egeraakko.

21Kakamidu issittibeelas at letoohaare ee ammanem i beet Salomoonii anii bi'isaan inkaa xigammoommo» yito'o.

22Bersaabeh woccu'uuyyim hiraagaanchi Naataan aagukko.

23Adilinam hiraagaanchi waarukkisa kurakko'o; Naataanim adi'l illagenne hincaa aad heeshaa anga ki'isukko.

24Ee lasage «I moollanna, Adooniyaas kiinniinsi lasage adil ihaa ki adillanonne afuuroo'isa issitaahinnihe?

25Ixxi kaballa lobakat mirgo'uwwa, di'ir labeennuwwaa gereebbaa duraa kitima hincaa'aakko; mulli ki ooso, ki gogoxxi ijaajaanchi Yoo'aabaa qeessichchi Abiyaataaraa weeshaakko. Oono'o, kaba ka ammanenne ‹Adil Adooniyaas heer heerina hee'ona!› yitu'uuyyi damfitu'uuyyi ixxenne maqire ittamuullaa aggamuulla.

26Ihukkaarem eese ki awwaadaancho, qeessichchi Saadooqa, Yoodaah beet Baanaayaa ki awwaadaanchi Salamoonaa ee maaddina weeshukkoyyo.

27I moollanna, adila, kiinniinsi lasonne adil ihookkoka ki gassaaninam kuttoo'nnim ku Adooniyaas adil ihimmi at issitaattoohanennihe?» yukko.

28Adil Daawiitim «Bersaabeh keyye weeshshehe» yaa ijaajukko. Isem waatta'a ixxi illagenne uullito'o.

29Isenam «Eesenne afu hawwi hundiinsim gatisu hee'oo Waa'i summinne kiina sagara aagoommo.

30Hanqinam ki beet Salamoon iinniinsi losonne adil ihaa i adilla'n barcumanne afuuroo'isa Isra'ee'l Moollanni Waa'i summinne kanniinsi illageen kiina aagummi sagara kaballa gullaa wonshoommisa la'isoommo» yukko.

31Bersaabehem uullanne heeshita'a anga ki'issa'a «I moollanni adil Daawiit heer heerina foorinne hee'ona» yito'o.

32Ee lasage adil Daawiit qeessichchi Saadooqa, hiraagaanchi Naataanaa Yoodaah beet Baanaayaa weeshisukko. Ixxuwwim aagga'a ixxi kolli hincito'aare

33Adilim «I adilla'n minenne siidantam i gassaaninne maqirem mallehe. I beet Salamoona an saa'lloommi baquchchonne saa'llissakka'a kibbitakka'a Giiyoo'n bu'i beyyo dillehe.

34Ee beyyonnem qeessichchi Saadooqii hiraagaanchi Naataanii labba'a Isra'eelina adil issitona. Ee lasage buuxxi xurumba fuggakku'uuyyi sagara iimaa'llakka'a Salamoon ‹Heer heerina adil ihona› yi'llehe.

35I adillanonne afuureena daba'llaa keyye waaroo ammane kibbitakka'a wollehe. I bikkennem adil ihaa i adilla'n barcumanne afuurona. Isra'eelinaa Yihudinaa i lasonne adil ihoo'isina an ixxo doo'llaammo» yukko.

36Yoodaah beet Baanaayim «I moollanni adil yukkisam ihona; eekkam ki Moollanni Waa'i wonshona.

37Adila, Waa'i kiinninne maqir ihukkisam Salamooninnem maqir ihona. Ixxi adillanom ki adilla'n doollenne hee'ukkaanniinsi loboka lophphaakkoohan issona» yukko.

38Ee bikkina qeessichchi Saadooq, hiraagaanchi Naataan, Yoodaah beet Baanaayii adi'l lombi waardiyyuwwii Salamoona Daawiit saa'lloo baquchchonne saa'llissa'a Giiyoo'n bu'i beyyo massito'o.

39Qeessichchi Saadooq Keesammi Dukkaaniinsi amadaa waaru labakkam zayti yoo buudo ki'isaa Salamoonanne labukko. Ee ammanenne xurumba fuggo'o; minaadabim sagara iimaa'aa «Adil Salamoon heer heerina hee'ona!» yukko.

40Adilla'n minem daba'llita'a waattu'uuyyi ixxo kibbita'a waatto'o. Lobakat liiranchinne xurumba fuggu'uuyyii kaddu'uuyyii lomba uwwitam hee'llo'i bikkina lobakata shuurimmiinsi ki'ukkok uulli heekke'am hee'ukko.

41Adooniyaasii ixxi weeshu mannii hundim maadda itta'a guulliteena ikko'oohaannonne corochchi sagara macceesso'o. Yoo'aabim xurumbi sagara macceesaa «Ku ka beero'onne macceesamoo corochchi mahane?» yaa xa'mmukko.

42Ixxi wocaa guulloo'nnim dangonnem qeessichchi Abiyaataar beet Yoonaataan afukko. Adooniyaasim «Hino'o, keyye waare er manchi ikki bikkina iina er woshsha amaddaa waattoo'n uttooyyo» yukko.

43Yoonaataanim «Er woshsha amadaa waarummoyyo. Ni hibbaam adil Daawiit Salamoona adil issaakko.

44Adilim ixxo kibbitona qeessichchi Saadooqa, hiraagaanchi Naataana, Yoodaay beet Baanaaya, adilla'n mi'n lombi waaridiyyuwwa, Kaalite'i mannaa Faalite'i mannaa asse'aakko. Ixxuwwim ixxo adi'l baquchchonne saa'llisso'ookko.

45Qeessichchi Saadooqii hiraagaanchi Naataanii Giiyoo'n bu'onne massita'a labba'a adil issito'ookko. Ee lasage minaadab hundim liiranchinne wo'mmita'a ilil yitu'uuyyii hoo yiitu'uuyyii sagara shiqaa'lla'a kaddu'uuyyi beero'o daba'llito'ookko. Kaba macceessakkamokim ee sagara.

46Oono'o, Salamoon adil ihaa adilla'n barcumanne afuuraakko.

47Eehanniinsim loboka la'anto'oo adi'l gassaan adil Daawiit beyyo hincita'a ‹Ki Moollanni Waa'i Salamoona kiinniinsi loboka sad la'amaakkoohanee adillanim haraaraakkoohanee issona› yita'a maasse'llo'ookko. Ee lasage adil Daawiit ara'anne hee'ukkisam Waa'ina otossukko.

48Odim ‹Kaballa i shumo'iinsi mat eese bikkaa adil ihoo'isa issukkokii kakam moo'oona hara'mmukkokii Isra'ee'l Moollanni Waa'i lombaa galataa aa'ona!› yaa Waa'a galaxxaakko» yukko.

49Ee ammane Adooniyaas weeshu manni hundim eekka macceessa'a lobakata baddito'o; hundim ki'lla'a goog googom binnito'o.

50Adooniyaasim Salamoona lobakata baddu bikkina Keesammi Dukkaana maraa kiti'm buudduwwa amadaa magannaato aagukko.

51Salamooninam «Adooniyaas keese baddu bikkina kiti'm beyyika buudduwwa amadaa ‹Mahiinsim gaassaa adil Salamoon eese shoobee'isina sagara aagona› yaa magannaato aagaakko» yito'o.

52Adil Salamoonim «Ixxi jor googiinsi daba'llaa eroomma issulas ixxi horoo'l saraatiinsi matim nakkamooyyo. Ihukkaarem jora baxulas lehookko› yaa dabarukko.

53Ee lasage adil Salamoon Adooniyaasa kiti'm beyyiinsi dilliissa'a wottona manna asse'ukko. Adooniyaasim adi'l illagenne hincaa heeshaa otossukko. Adilim «Mine elle'e» yukko.