2 Kings 10

hadiyya

← Chapter 9 Jump to: Chapter 11 →

1Xig lamarayye ikkam qax Aki'aab shumo'i Samaare'i beero'onne hee'llam hee'llo'o. Iyyu'u assi kitaaba kitaabaa ee beero'i gassaanina, uulli lommanninaa Aki'aab ooso li'issammi keeninaa asse'ukko. Oo assi kurim

2«Adi'l shumo'i ki'nnuwwi anganne yo'i bikkina faradii faraxxi gaarre'ii, o'l mu'uttuwwii girbamaakkoo beero'uwwii hundim ki'nnuwwi angannette. Ee bikkina ku assi kur ki'nnuwwi anganne afukkisam.

3Adi'l shumo'iinsi e'llookkoka doo'llitakka'a adil issehe. Ixxenam agaaggakka'a orammehe» yoohan hee'ukko.

4Eehanniinsi ki'aa Samaare'i beero'i gassaan baa'lla'a «Adil Yooraamii adil Akaaziyaasii uullixxanteena xantobee'i Iyyu'u neese hinkid issinaa uullixxameena xannoommo?» yito'o.

5Ee bikkina adi'l mi'n gassaanchii ee beero'i gassaanchii la'anto'oo uulli lommanninnee adi'l ooso li'issam keeninnee maqirem Iyyu'una «Neese kiina awwaadaano; at neese ijaajjoo luwwi hundam issineena gundaammo. Neese ayyem adil issinoommoyyo; at kiina eran ihaa moo'amu luwwi hundam isse» yita'a asso asse'llo'o.

6Iyyu'um «Ki'nnuwwi iinninne iittantakkolasii i ijaajom egettakkeena guddakko'oo keen ikkakkolasii soodo kido'i ammanenne adil Aki'aab shumo'i hundikam horoore muttakka'a amaddakka'a i beyyo Yizra'eela waallehe» yaa mulli assi kitaaba kitaabukko. Adil Aki'aabik lamarayyem oosim Samaare'i beero'i ixxuwwa li'isaan ikko'i la'anto'oo lommanni anganne egeranta'a hee'llo'o.

7Samaare'i beero'i awwonsaan Iyyu'i assi kur ixxuwwi beyyo afukkisam Aki'aabika lamarayyem oosom shito'o. Ixxuwwikam horoore mutta'a sanannanne issita'a Yizra'ee'l uullanne hee'oo Iyyu'i beyyo asse'llo'o.

8Aki'aab oosik horoor muramaa waarukkisa Iyyu'u macceesu ammanenne beero'i ooxxi gooc gadanonne lam ogoranne tuubamaa la'm balli dar afeebe'e afuurona ijaajukko.

9La'm balla daram ee beero'i ooxxi gooca maraa ee beyyonne wixxito'i minaadabina «Adil Yooraama dollotaa shummok anette hee'ummo. Ee bikkina ki'nnuwwi ee quuxonne xa'mmantakkamoyyo. Ihukkaarem ka manna hundam shukkok ayyette?

10Ku hundim Waa'i Aki'aab shumo'i bikkina wocu sagar hanqo'an ihukkisa moo'isookko. Waa'i hiraagaanchi Eeliyaasennetti ihaa wocu sagara wonshaakko» yaa wocukko.

11Ee lasage Iyyu'u Yizra'eelanne hee'llam mulli Aki'aab qarmanna, ixxi gassaano, ixxi beshshuwwaa qeessuwwaa matim gattambee'isa hundam shukko.

12Iyyu'u Yizra'ee'l uulliinsi ki'aa Samaare'i uulla marukko. Googonne hee'ukkuuyyim «Allaaraa'n hegeego» yakkam beyyo afaa

13lehu Yihuxxi adil Akaaziyaas qarmanni lambe'iinsi hofqax mannam siidaa «Ki'nnuwwi ayyayyaamo?» yaa xa'mmukko. Ixxuwwim «Neese Akaaziyaas qarmanna; kabadem adil Eelzaabeel oosoo gatto'i adi'l mi'n abaroosaa xa'mmineena Yizra'ee'l uulla malloommuulla» yita'a dabatto'o.

14Iyyu'um «Ka manna foorinne hee'llonam amaddehe!» yaa ixxi gaadano ijaajukko. Ixxi gaadaanim amaddo'aare Iyyu'u ee beyyonnem wo'i ba'l gadanonne shukko. Ixxuwwikim xig hundoomim soree lamoo ihaa ixxuwwiinsi matim foorinne gatukkoyyo.

15Iyyu'u ee beyyiinsi ki'aa odim taakke'imma asheerukko. Googonne hee'ukkuuyyim Reekaab beeto Yoonaadaaba siidukko. Iyyu'um xummaatisaa lasonne «Anii atii sawwitinne matome. Eehannah iina hara'mmiteena xantoohonnihe?» yaa xa'mmukko. Yoonaadaabim «Eeyya xanoommo» yaa dabarukko. Iyyu'um «Eehannata'i ki anga uwwe» yukko. Ee lasage angi anga amaxxanta'a Iyyu'u bakkiisaakka ixxi faraxxi gaarre'enne afuussaa

16«Iinninne maqire ikkaa an Waa'ina hinkaa'nna amma'nnamaammoohanda'e ihummisa at ki gagoomim moo'e» yukko. Ixxuwwim matikka'a faraxxi gaarre'inne matto'o.

17Ee beyyo affa'a lasage Iyyu'u Aki'aab abaroosiinsi matim gatoobee'isa hundam shukko. Ku hundim ihukkok hiraagaanchi Eeliyaasinne kuramu Waa'i saga'llisannette.

18Iyyu'u Samaare'i beero'i minaadaba mat issaa weeshaa «Adil Aki'aab Ba'aalina awwaadukkok hofqaxam hee'ukko. Ihukkaarem an ixxeensi lonsaa awwaadeena hasoommo.

19Ee bikkina Ba'aa'l hiraagaano, awwaadaanoo qeessuwwaa hundam weeshshehe. Ba'aalina kee'mmaalli kitima hincaa'oommi bikkina mat manchim gatoo'n waarona; waaroo'n gatukkok hundim lehinne guzumo'amookko» yukko. Ihukkaarem Iyyu'u eehid yukkok Ba'aa'l awwaadaano hundam guulleena sawwaa hee'u bikkinatte.

20Iyyu'um «Ba'aa'l lombina alallaattakka'a minaadaba weeshshehe» yukko. Ixxuwwim minaadabina alallaatto'o.

21Ixxim eekka Isra'eel hundinam asse'ukko. Ba'aa'l awwaadaan hundim matim gatoo'n waaraa Ba'aalina otossakkam mine aagukko. Ixxuwwim ee minenne aagga'a tochchiins tochchi afeebe'e wo'mmito'o.

22Iyyu'um eddechchi mi'n gaassaanchina «Ba'aa'l awwaadaanina hundinam eddechcha fisse» yukko. Ixxim ee eddechcha fissaa Ba'aa'l awwaadaanina hundinam uwwukko.

23Ee lasage Iyyu'u Reekaab beet Yoonaadaabinne maqirem Ba'aalina otossakkam mine aagukko. Ba'aa'l awwaadaaninam «Xale'i Ba'aa'l awwaadaaniinsi bagaan Waa'i awwaadaan ki'nnuwwinne maqire bee'isa qoossehe» yukko.

24Ee lasage shokkiisakka'a hincaa'akkam kitimaa mulli kitimaa hincaa'lleena aaggo'o. Ee ammanenne Iyyu'u biiranne gudisaa hee'u sadeentayyi manchina «Ki'nnuwwi anganne higisaa uwwummi manniinsi matichchim xoroo'isa issookkok ixxi gagim ee manchi bikkenne lehookko!» yaa qoxxisaa kuraa hee'ukko.

25Shokkiisakka'a hincaa'akkam kitima hincaa'akka'a guullakko'isam Iyyu'u egeraanoo gaaxxi awwonsaanoo «Kaba aaggakka'a ee manna mat manchim xooroobee'isa shi'llehe!» yaa ijaajukko. Ixxuwwim bisa'inne shita'a guullito'o. Egeraanii gaaxxi awwonsaanii ee mannika leesha hundam biiranne fissita'a uunjito'o. Ee lasage ixxuwwi Ba'aalina otossakkam mi'n koshoro aaggo'o.

26Kiniinsi baxamu otossakkam misilluwwam Ba'aalina otossakkam miniinsi fissita'a shokkiisso'o.

27Ba'aalina otossakkam misila iiqansito'o; otossakkam minem gindito'o; oo beyyim kaballi afeebe'e manni shume'oo beyyi ihukko.

28Ee'isinne Iyyu'u Ba'aa'l otossaato Isra'ee'l uulliinsi bi'isukko.

29Ihukkaarem Naabaax beet Yoorbi'aam Beeteelannee Daanannee worqinne baxamaakkoo wo'l misilina otossitamisa issimminne Isra'eela huushisu baaxiiliinsi Iyyu'u qee'llukkoyyo.

30Waa'im Iyyu'una «I illagenne er luwwa issitti bikkinaa Aki'aab mine guzumo'eena sawwaa hee'ummoka issitti bikkinaa ki shumo'i soor beet afeebe'e Isra'eelanne adil ihookko» yukko.

31Ihukkaarem Iyyu'u Isra'ee'l Moollanni Waa'ika Seera guullaa egerukkoyyo; Yoorbi'aam Isra'ee'l minaadaba huushisu baaxiiliinsim qee'llukkoyyo.

32Ee doollenne Waa'i Isra'ee'l uulla qoroshimma asheerukko; Azaaheel Isra'eela tochchiinsi tochchi afeebe'e qasukko.

33Oohim Yoordaanoosiinsi eelliinchi firinne yoo Gala'aaxxi uulla hundam Arnoo'n daajji gadanonne yoo Aro'eeriinsi ki'isaa Gaadika, Roobeelikaa Minaas ullaa Baasaanam edaa amadukko.

34Iyyu'u ixxi adilla'n doollenne baxukkokii taaphansu luwwii hundim Isra'ee'l Adilluwwi Aganni Kitaabanne kitaabammaakko.

35Iyyu'um ixxi anno'isam lehukko; Samaare'ennem waammamukko. Ixxi beyyonnem ixxi beet Yoo'aakaaz adil ihukko.

36Iyyu'u Samaare'enne afuuraa Isra'eela lamiyyee sadeenti hiinchoo adillaninne gassukko.

← Chapter 9 Jump to: Chapter 11 →