2 Kings 19

hadiyya

← Chapter 18 Jump to: Chapter 20 →

1Adil Hizqiyaas ee woshsha macceesaa kichche'aa ixxeka eddechcha dereerukko; xiddi eddechcham edde'aa Keesammi Mine marukko.

2Ee lasage adi'l mi'n gassaanchi ihu Eeliyaaqeem, adil mi'n kitaabaanchi Sheebinaanii qeessuwwi awwonsaanii xiddi eddechcha edde'lla'a Aamoox beet hiraagaanchi Issaayyaas beyyo mattona asse'ukko.

3Issaayyaasinam «Kaballi kee'mmaalli hawwi balla; guzumo'ii sholle'nnii neesenne afeenatte; qattam amman afaa qatteena malaayyi bee'u meentichchosa inkaammo.

4Asoo'l adil hee'oo Waa'inne game'llamona ixxeka gaaxxi awwonsaancho asse'aakko; ki Moollanni Waa'i eekka macceesaa ixxo guzumo'eena xanookko; ee bikkina gatto'i ka ni minaadabina Waa'a uunxe› yaakko» yita'a kutto'o.

5Issaayyaasim adil Hizqiyaasa asso aa'aa lasage

6«Waa'i kiina ‹Ki'nnuwwa gatiseena xanooyyo› yitu'uuyyii eese game'llitu'uuyyii Aasoo'l gaaxxi awwonsaan woccam sha'llancha baddititte.

7Oono'o, an ixxena dambaqisoo ayyaana asse'oommo; ixxim uulla daba'llaa maroo'isaa ixxi gaqqi uullannem bisa'inne aphphisamaa lehoo'isaa issoommo› yoolla» yukko.

8Aasoo'l gaaxxi awwonsaanchi, adil Laakiisha yakkam beyyiinsi ki'aa Libina'i beero'onne orameena marukkisa macceesaa ixxenne a'llameena ee beyyo marukko.

9Tophphe'i adil Tiirihaaq awwonsoo Gibxi gogot ixxuwwa qaseena waarukkuuyyi yoo'isa Aasoo'l adil macceesaa ee ammanem Hizqiyaas beyyo

10«Yihuxxi adil Hizqiyaasa, at amma'nnantoo Waa'i ‹Yerusaaleem Aasoo'l adil anganne ubooyyo› yaa keese qawwisoone.

11Aasoo'l adil mat uulla bi'iseena hasoo ammane hundam mah issooda'e macceessaatto. Atdu xottoottoka labissaatennihe?

12Gaassi iyyanno'i Goozaa'nneka, Kaaraa'nnikaa Reexeefikaa beero'uwwa bi'isso'ookko. Talaasaaranne hee'llam Ede'n minaadaba shito'ookko. Oo hundim ihukkuuyyi ixxuwwi waa'uwwiinsi matim gatiseena xanukkoyyo.

13Ee'isam Haamaatik, Arfaadik, Safaarwaayimik, Heenaa'inikii Iiwa'ikii beero'uwwi adilluwwi hannonne yo'o?» yoo assikitaaba asse'amaa'n anganne asse'ukko.

14Adil Hizqiyaasim ee askitaaba asse'amaaniinsi aa'aa qananaa'aa Keesammi Mine massaa Waa'i illagenne biddiqaa'aa

15«Isra'ee'l Waa'a! Kiruubeela yakkam asse'amaa'n hanenne afuuttitti Moollanni xale'i atette; ka uulli adilluwwam awwonsitoottok atette; uullaa iimanee qooccittok atette.

16Kabadem Waa'a! neesenne afu hawwo hundam moo'e; keese hee'lloo Moollanni Waa'a gamme'llukkuuyyi Sanaakireem wocu sha'llancha hundam macceese.

17Waa'a! Aasoo'l adilluwwi lobakat minaadabaa uullaa bi'isso'is hanqa.

18Haqqaa kinaa cabbarakka'a baxakko'i malaaybee'i waa'uwwa giirinne shokkiissa'a bi'isso'ookko.

19I Moollanni Waa'a! Xale'i at Moollanni ikkittisa uulli hundannem yo'i adilluwwi laqqamisina kaba Aasoo'l minaadaphphi angiinsi neese gatise» yaa uunxukko.

20Ee lasage Aamoox beet Issaayyaas adil Hizqiyaasina «Isra'ee'l Moollanni ihu Waa'i ‹Aasoo'l adil Sanaakireem sha'llanchi bikkina uunxitti uunxato macceesaammo.

21Ee'isam Sanaakireemina «Xiyoo'n baajaammuwwi keese gaddamoo keesennem osattamo; at gibbittuuyyi Yerusaalee'm landi moo'lla'a horoore heekkeessamo.

22At game'llittokii iggittokii ayyette? Shaaqqaa woccittokii sholliissaa moo'llittokii ayyette? Isra'eelina keesammi ihummi eesette.

23Ee'isam ki asse'amaano asse'llaa ‹An faraxxi gaarre'uwwinne lob duunnuwwanne firaammo; Liibaanoos ludom afaammo; lob qeeraa'l liibaanoos haqquwwaa doo'l digibbuwwaa muraammo. Tochchiinsi tochchoo tiiwwi haqqoroo afaammo.

24Allaggi uullanne bare hinaa wo'o agaammo; i konte'innem hancaacaa Gibxi uulli daajjuwwa gokkisaammo› yitaa amaadinne Waa'inne uullixxantaatto.

25Macceessittoyyonnihe? An eraarem sawwummokaa qoodummokaa kaba issoommuullak anette. At girbamaakkoo beero'uwwa gindansitaa ubbuussoo'isa issummok anette.

26Ee uullanne hee'llo'i minaadaphphek hundikim malaayyi hoogukko; hundim muggita'a jallito'o; udma'i uullanne mutu hixisa, mi'n iimanenne mutu bochchisaa quubaa gogu hurbaaxxisaa ikko'ookko.

27An kiikka aagimma, firimma, uullitoo'isa, afuuttoo'isaa eese sabbittisaa la'oommo.

28Eese sabbittisaa amaaddittisaa la'aammo; kaba ee bikkina an ki sanenne guma'a ki aqonnem hakkamma issaa waattitti googinnem dabaroommo» yukko.

29Ee lasage Issaayyaas adil Hizqiyaasina «Eehanninam mare'i ihoo'isina ka maaragee la'm maaragee gobbe'e ittakkamo. Ihukkaarem saxxi maarage ki'nnuwwi gaqqi hurbaata wixxakka'a atoota wixxaa'llakkamo; woyinam kaassakka'a misha ittakkamo.

30Bichchiinsi gatu Yihuxxi minaadab haqqisa uullanne xapha kaasaa misha mishookko.

31Yerusaaleemannee Xiyoo'n duunannee bichchiinsi xotta'a gatto'i minaadab hee'llamo. Gogoxxi Moollanni Waa'ik to'achchi eekka issookko» yukko.

32Waa'i Aasoo'l adilina «Sanaakireem ka beero'o hore'em aagooyyo; mat xiyyam ihuta'n darabooyyo; agira amadu gaadaanchim ixxonne hincooyyo; buchchi dichchirinnem kibbamooyyo.

33Ixxi ka beero'o aagoo'nnim waaru googinnem daba'llaa marookko. Kaka wocummok an Waa'a.

34I gaqqi lombi bikkinaa i awwaadaanchi Daawiitinaa uwwummi saga'l neeyyaxxi bikkina ka beero'ina an i gagoomim uullixamaa gatisoommo› yoolla» yukko.

35Ee hiimom Waa'i asse'amaanchi Aasoo'l gaadaan wiiddanto'i beyyo maraa 185,000 gaadaanoo shukko; la'm balli daram manni ki'aa moo'oohaare wiidda'n beyyonne leesh wo'mmaa hee'ukko.

36Ee lasage Aasoo'l adil Sanaakireem laso daba'llaa Naanaawe'i beero'o maraa eekke'enne afuurukko.

37Ixxim mat balla Niisirooka yakkam qophpha'n waa'i minenne aagaa otossukkuuyyim ixxi oosiinsi lam Adiraameeleekii Saareexeerii bisa'inne shito'o. Ixxuwwim Araaraata yakkam uulla gibba'a matto'o. Ixxi beyyonnem ixxi beet Asiraad adil ihukko.

← Chapter 18 Jump to: Chapter 20 →