2 Kings 21

hadiyya

← Chapter 20 Jump to: Chapter 22 →

1Minaase Yihudanne adil ihu ammane ixxek umur tommoo lam hiinchoo hee'ukko; ixxi heechchi beyyom Yerusaaleemanne issaa ontayyee onti hiinchoo gassukko. Ixxi amakim summi Heefxiibatti hee'ukko.

2Waa'i Isra'ee'l oos illagiinsi xoqolaa bi'isu mulli minaadaphpheka shigigaa'oo losano awwonaa Minaas Waa'a kichche'isukko.

3Ixxi anni Hizqiyaas gindaa hee'u duunnuwwanne yoo otossakkam beyyuwwa dabaraa baxukko; Isra'ee'l adil Aki'aabisam Ba'aala yakkam qophpha'n waa'ina kitima hincaa'akkam beyyoo Asheera yakkam meentichchi waa'i misilaa baxukko; Iima'n boollaankinam otossukko.

4Waa'i «Yerusaaleemanne i summa hee'isoommo» yu Keesammi Minenne qophpha'n waa'uwwina kiti'm beyyuwwa baxukko.

5Keesammi Mi'nnaannonne lamem wixxixxi beyyonnem iima'n boollaankuwwina otossakkam kiti'm beyyuwwa baxukko.

6Ixxi gaqqi beetom kitim issaa hincaa'ukko; ixxi gagim gennaanchoo karo'aanchoo ihaa kiiraaniinsii wiidda weeshsham keeniinsii sogitano xa'mmam hee'ukko; eehido'i jor baxo baximminne Waa'a quuqisukko.

7Keesammi Minennem Asheeraa yakkam qophpha'n waa'ika misila dissukko; oo Keesammi Minim, Waa'i Daawiitinaa ixxi beet Salamooninaa «Ku Yerusaaleemanne yoo Keesammi Min iina heer heerina otossakkamisina tommii lamem Isra'ee'l sulli gattam uulli hundiinsim doo'llaammoo beyyo.

8Isra'ee'l minaadab iina ijaajantolasii i awwaadaanchi Muse'ena uwwummi seeram egettolasii gaassi ixxuwwi anno'ina uwwummi ka uulliinsi xoqolanta'a bi'llamisa issoommoyyo» yaa kuraa hee'ukkane.

9Ihukkaarem Ayihuxxi minaadab Waa'ina ijaajanto'oyyo. Hore'oomam Isra'ee'l minaadab illagenne gafe'llu'uuyyi waatto'i ammane Waa'i ixxuwwi illagiinsi xoqolaa bi'isu hanqo'i Waa'a laqqambee'i minaadab issitam hee'llo'aanniinsi lophphoo baaxiilonne Minaase awwonsukko.

10Waa'im ixxi awwaadaan ikko'i hiraagaaninne

11«Minaas lobakata haashaaramaakkoo baxo baxukko; oohim gaassi Kana'aa'n minaadab baxxo'aanniinsi hundiinsim lophphoo jor baxo baxukko; Yihuxxi minaadabam ixxi baxu qophpha'n waa'uwwinne baaxiilonne awwonsukko.

12Ee bikkina Isra'ee'l Moollanni Waa'i «Oono'o, macceesukkok hundam muggisaa jallaa'oo kee'mmaalli boobana Yerusaaleemannee Yihudannee eeboommo.

13Samaare'i uullaa Isra'ee'l adil Aki'aabaa ixxuwwi shumo'inne maqire guzumo'ummisam Yerusaaleemam guzumo'oommo; wocita aanshakka'a lasage qubbaa'akka'a dissakkamisa anim Yerusaalee'm minaadaba baaxiiliinsi aanshoommo.

14Bichchiinsi gatto'i i minaadabam diina'ina higisaa uwwoommo; oo keenim ixxuwwika amaxxa boggamoo qeefaddamoo.

15I minaadabanne ka hundam issoommi mashka'i gaassi ixxuwwi anno'i Gibxiinsi fitto'i ammaniinsi ki'isaa kabad afeebe'e baaxiilo baxxa'a eese kichche'isso'i bikkinattee quuqisso'i bikkinattee» yukko.

16Odim Minaase Yihuxxi minaadaba qophpha'n waa'ina otossitamisa issukkaanniinsi mulleka Yerusaalee'm beero'onne lobakat muccur mannika xiiga dunimminne Waa'i illagenne jor baaxiilo baxaakko.

17Minaas baxu mulli luwwii issu baaxiilii hundim Yihuxxi adilluwwi Aganni Kitaabanne kitaabamaakko.

18Minaasem lehukko. Adilla'n mi'n qash woronne «Uuza'i duubbi kaashshi beyyo» yakkam beyyonne waammamukko. Ixxi beyyonnem ixxi beet Amoon adil ihukko.

19Amoon Ayihuxxi uullanne adil ihu ammane ixxek umur lamiyyee lam hiinchoo hee'ukko; ixxi heechchi beyyom Yerusaaleemanne issaa lam hiincho gassukko; ixxi amam Yaaxib beero'i Haruux landichcho Mashulaamette hee'llo'o.

20Amoonim ixxi anni Minaasisam Waa'i illagenne jor baxo baxukko.

21Ixxi annika jor kobi'lla hundam awwonukko; ixxi annisam qophpha'n waa'uwwina otossukko.

22Gaassi ixxi anno'i Moollanni Waa'a lagukko; Waa'i sagarinam ijaajancha sabukko.

23Ixxi gassaanim dollotta'a adilla'n minenne shito'o.

24Ayihuxxi minaadabim Amoona shito'i manna guullita'a ixxi beet Iyyoosiyaasa adil issito'o.

25Amoon issu mulli luwwi hundim Yihuxxi Adilluwwi Aganni Kitaabanne kitaabamaakko.

26Amoon «Uuza'i duubbi kaashshi beyyo» yakkam waammi beyyonne waammamukko; ixxi beyyonnem ixxi beet Iyyoosiyaas adil ihukko.

← Chapter 20 Jump to: Chapter 22 →