Daniel 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1Sa ikatlo nga tuig sang paghari ni Ciro sa Persia, may isa ka mensahe nga ginpahayag kay Daniel nga ginatawag man Beltesasar. Ang mensahe matuod, pero mabudlay gid hangpon. Ginsaysay ini sa iya sa isa ka palanan-awon.

2Sa sadto nga tion, nagalalaw ako sa sulod sang tatlo ka simana.

3Wala ako magkaon sang bisan ano nga maayo nga pagkaon ukon karne, wala ako mag-inom sang bino, ukon maghusay sang akon buhok tubtob nakaligad ang tatlo ka simana.

4Sang ika-24 nga adlaw sang nahauna nga bulan sang tuig nagtindog ako sa pangpang sang daku nga Suba sang Tigris.

5Nagtangla ako kag nakita ko ang isa ka tawo nga nagabayo sang lino kag may paha nga bulawan.

6Ang iya lawas nagaidlak kaangay sang isa ka malahalon nga bato. Ang iya nawong nagaidlab kaangay sang kilat, kag ang iya mga mata nagadabdab kaangay sang kalayo. Ang iya mga kamot kag mga tiil nagabadlak kaangay sang ginpahining nga bronsi, kag ang iya tingog kaangay sang ginahod sang madamo nga mga tawo.

7Ako lamang ang nakakita sang palanan-awon. Ang mga tawo nga kaupod ko wala gid sing may nakita, pero hinadlukan sila, kag nagdalagan kag nagpalanago.

8Isa lamang ako ang nabilin didto nga nagatan-aw sining makatilingala nga palanan-awon. Nadulaan ako sing kusog, kag nagbaylo ang akon guya nga wala sing may makakilala sa akon.

9Sang pagkabati ko sang iya tingog nalipong ako kag natumba sa duta nga nagahapaon.

10Dayon may isa ka kamot nga nag-uyat sa akon kag nagpabangon sa akon tubtob nakaluhod ako kag nakapanukod nga nagapalangurog gihapon.

11Ang anghel nagsiling sa akon, “Daniel, ang Dios nagahigugma sa imo. Magtindog ka kag magpamati sing maayo sang akon isiling sa imo. Ginpadala ako sa imo.” Sang masiling niya ini, nagtindog ako nga nagakurog gihapon.

12Dayon nagsiling sia, “Daniel, indi ka magkahadlok. Ang Dios nagpamati sang imo mga pangamuyo halin sa nahauna nga adlaw nga nagtapat ikaw sa pagpaubos sang imo kaugalingon agod makahangop ka. Nag-abot ako subong sabat sa imo pangamuyo.

13Ang manugbantay nga anghel sang ginharian sang Persia nagsumpong sa akon sa sulod sang baynte uno ka adlaw. Dayon si Miguel, ang isa sang pangulo nga mga anghel, nag-abot sa pagbulig sa akon, tungod kay nabilin ako nga isahanon lang didto sa ginharian sang Persia.

14Nag-abot ako agod imo mahangpan kon ano ang matabo sa imo mga tawo sa ulihi. Ini nga palanan-awon nahanungod sang palaabuton.”

15Sang pagsiling niya sini, naurongan ako nga nagtulok sa duta kag wala makahambal.

16Dayon ang anghel nga kasubong sang isa ka tawo, nagdawhat sa akon kag nagtandog sang akon mga bibig. Nagsiling ako sa iya, “Ini nga palanan-awon nagapaluya gid sa akon kag indi ko mapunggan ang pagkurog.

17Kaangay ako sang isa ka ulipon sa atubang sang iya agalon. Ano ang pagpakighambal ko sa imo? Wala na gid ako sing nabilin nga kusog ukon ginhawa.”

18Sa liwat gin-uyatan niya ako, kag nagbakod ako.

19Nagsiling sia, “Ang Dios nagahigugma sa imo, gani indi ka magpalibog ukon magkahadlok sa bisan ano.” Sang pagsiling niya sini nagbakod pa gid ako kag nagsiling, “Sir, sugiri ako sang imo inugsiling. Gin-ayo mo ang akon pamatyag.”

20Nagsiling sia, “Nakahibalo ka bala kon ngaa nagkadto ako sa imo? Nag-abot ako sa pagpahayag sa imo kon ano ang nasulat sa Libro sang Kamatuoran. Karon dapat ako magbalik kag magpakig-away sa manugbantay nga anghel sang Persia. Sa tapos sina ang manugbantay nga anghel sang Gresia magapakita. Wala sing isa nga magabulig sa akon kundi si Miguel lamang, ang manugbantay nga anghel sang Israel.

← Chapter 9 Jump to: Chapter 11 →