Daniel 12

Ilonggo (Maayong Balita nga Biblia (2012))

← Chapter 11 Jump to:

1Ang anghel nga nagabayo sang lino nagsiling, “Sa sadto nga panahon, ang gamhanan nga anghel nga si Miguel, nga nagabantay sang imo mga tawo, magapakita. Dayon magaabot ang labing magamo nga panahon nga wala pa gid mahanabo halin sang pagsugod sang mga pungsod. Kon mag-abot ina nga panahon, ang tanan nga mga tawo sang imo pungsod nga ang ila mga ngalan nasulat sa libro sang Dios maluwas.

2Madamo sang mga nagkalamatay na ang mabanhaw: ang iban sa ila magakabuhi sa wala sing katapusan, kag ang iban magaagom sing walay katubtoban nga kahuloy-an.

3Ang maalam nga mga pangulo magasiga sa bug-os nga kasanag sang langit. Kag ang nagtudlo sang madamo nga mga tawo sa paghimo sang matarong magasiga kaangay sang mga bituon sa walay katubtoban.

4Nagsiling sia sa akon, “Kag karon, Daniel, itakop ang libro kag butangi ini sing selyo tubtob mag-abot ang katapusan nga panahon. Sa wala pa mag-abot ina nga panahon, madamo ang mga tawo nga magatinguha sa paghangop sang mga nagakahanabo.”

5Dayon nakita ko ang duha pa ka tawo nga ang kada-isa nagatindog sa tagsa ka pangpang sang suba.

6Ang isa sa ila nagpamangkot sa anghel nga nagatindog sa ilaya sang suba, “Tubtob pa bala san-o matapos ini nga mga makatilingala nga mga hitabo?”

7Ang anghel nagbayaw sang iya duha ka kamot pa langit kag nagpanumpa sa ngalan sang walay katubtoban nga Dios. Nabatian ko sia nga nagsiling, “Tatlo kag tunga pa ini ka tuig. Kon matapos na ang paghingabot sa mga tawo sang Dios, ini nga mga butang matapos na.”

8Nabatian ko ang iya ginsiling, pero wala ako makahangop sini. Gani namangkot ako, “Pero, ano ang katapusan sini tanan?”

9Nagsabat sia, “Daniel, sarang na ikaw makalakat, tungod kay ini nga mga pulong manginsekrito kag pagataguon tubtob mag-abot ang katapusan.

10Madamo nga mga tawo ang pagatinluan. Ang malaut nga mga tawo indi makahangop, kag magapadayon sila nga malaut, pero ang mga maalam makahangop.

11“Halin sa tion nga nag-untat sila sang adlaw-adlaw nga paghalad, nga amo ang tion halin sa Makakulogmat nga Kangil-aran, 1,290 ka adlaw ang magaligad.

12Malipayon yadtong nagpadayon nga matutom tubtob magligad ang 1,335 ka adlaw.

13“Kag ikaw, Daniel, magmatutom ka tubtob sa katapusan. Dayon mapatay ka, pero mabanhaw ka sa pagbaton sang imo balos sa katapusan sang panahon.”

← Chapter 11 Jump to: