Daniel 7

Ilonggo (Maayong Balita nga Biblia (2012))

← Chapter 6 Jump to: Chapter 8 →

1Sang nahauna nga tuig sang paghari ni Belsasar sang Babilonia, nagdamgo ako kag nakakita sang isa ka palanan-awon sa kagab-ihon. Ginsulat ko ini, kag yari ang nasulat

2nahanungod sang akon nakita sadto nga gab-i: May mga hangin nga nagahuyop gikan sa aminhan, bagatnan, sidlangan kag nakatundan kag nagalaslas ini sa kadaygan sang dagat.

3Ang apat ka dalagku nga mga sapat naggwa sa dagat, nga ang kada-isa sa ila lainlain ang hitsura.

4Ang nahauna daw leon kag may mga pakpak pareho sang agila. Samtang nagatan-aw ako, ang mga pakpak nakuha. Ang sapat ginhakwat kag ginpatindog sa iya duha ka mga tiil kaangay sang isa ka tawo. Dayon ginhatagan sia sang panghunahuna nga iya sang tawo.

5Ang ikaduha nga sapat daw uso kon tan-awon nga nagatindog sa iya duha ka pangulihi nga mga tiil. May ginataban sia nga tatlo ka gusok, kag may isa ka tingog nga nagsiling sa iya, “Sigi, busga ang imo kaugalingon sang karne!”

6Samtang nagatan-aw ako nakita ko ang isa pa ka sapat. Daw pareho ini sang leopardo, pero sa iya likod may apat ka mga pakpak kaangay sang mga pakpak sang pispis. May apat ini ka ulo, kag may awtoridad sa paggahom.

7Samtang nagatan-aw ako nakita ko ang ikap-at nga sapat. Ini nga sapat makahaladlok, makakulogmat kag gamhanan. Ang iya ngipon dalagku nga mga salsalon, kag nagdugmok kag naghalunhon sang iya mga biktima kag nagtasak sa ila. Indi ini kaangay sang iban nga mga sapat. Ini iya may napulo ka sungay,

8kag samtang ginahimutaran ko ang mga sungay, nakita ko ang isa ka diutay nga sungay nagtubo kag nagpungal sang tatlo ka mga sungay nga yadto na didto. Ini nga sungay may mga mata sang tawo kag may baba, kag nagahambal sing hinambog.

9Samtang nagatan-aw ako, may ginbutang didto nga mga trono. Ang isa nga nagakabuhi sing walay katapusan nagpungko sa isa sang mga trono. Ang iya mga bayu maputi kaangay sang yelo kag ang iya buhok kaangay sang bulbol sang karnero. Ang iya trono makasililaw kag may mga rueda nga nagadabadaba nga kalayo kag

10ang kalayo nagakawigit gikan sa sini. May mga linibo ka mga tawo didto sa pag-alagad sa iya, kag mga minilyon ka mga tawo nagtindog sa atubang niya. Ang paghukom nagsugod kag ang mga libro ginbuksan.

11Samtang nagatan-aw ako mabatian ko pa ang diutay nga sungay nga nagapabugal. Nakita ko nga ang ikap-at nga sapat ginpatay kag ang iya lawas ginhaboy sa kalayo kag ginsunog.

12Ang iban nga mga sapat ginkuhaan sing gahom, pero gintugotan sila sa pagkabuhi sa malip-ot nga tion.

13Sa akon palanan-awon sa sadto nga gab-i, may nakita ako nga daw tawo. Nagapalapit sia sa akon nga ginalikupan sang panganod, kag nagkadto sia sa isa nga nagakabuhi sing walay katapusan kag gindala sia sa iya presensya.

14Dayon ginhatagan sia sing awtoridad, kadungganan, kag harianon nga gahom, agod nga ang mga tawo sang tanan nga mga pungsod, rasa, kag linggwahe magaalagad sa iya. Ang iya gahom magapadayon sa walay katubtoban, kag ang iya ginharian wala sing katapusan.

15Hinadlukan kag natublag gid ako sang mga palanan-awon nga akon nakita.

16Nagkadto ako sa isa sang mga nagatindog didto kag ginpangabay ko sia sa pagsaysay sadto tanan. Gani ginsugiran niya ako sang kahulogan sadto.

17Nagsiling sia, “Ining apat ka dalagku nga mga sapat amo ang apat ka mga ginharian nga magatindog sa duta.

18Kag ang mga tawo sang Labing Mataas nga Dios magabaton sing harianon nga gahom nga mangin-ila sa walay katapusan.”

19Dayon luyag ko pa gid mahibal-an ang nahanungod sang ikap-at nga sapat nga tuhay sang sa iban, pero makahaladlok, nga ang iya mga ngipon salsalon kag ang iya mga kuko bronsi. Gindugmok niya kag ginhalunhon ang iya mga biktima kag gintasak sila.

20Kag luyag ko mahibal-an ang nahanungod sang napulo ka mga sungay sa iya ulo, kag ang isa ka sungay nga nagtubo sang ulihi kag nagpungal sang tatlo ka mga sungay. May mga mata ini kag baba kag nagahambal sing hinambog. Mas makahaladlok ini sang sa iban.

21Samtang nagatan-aw ako, ang sungay nagpakig-away sa mga tawo sang Dios kag nadaog niya sila.

22Dayon ang isa nga nagakabuhi sa walay katapusan nag-abot kag nagpamatbat pabor sa mga tawo sang Labing Mataas nga Dios. Nag-abot ang tion nga ang mga tawo sang Dios magabaton sang harianon nga gahom.

23Amo ini ang kasaysayan nga ginhatag sa akon: “Ang ikap-at nga sapat amo ang ikap-at nga ginharian diri sa duta nga lain sang sa iban nga mga ginharian. Magadugmok ini sang bug-os nga duta kag magatasak sini.

24Ang napulo ka mga sungay amo ang napulo ka mga hari nga magagahom sa sadto nga ginharian. Dayon ang isa ka hari magatindog nga lain gid sang sa nahauna nga mga hari, kag magapukan sang tatlo ka mga hari.

25Magahambal sia batok sa Labing Mataas nga Dios kag magapigos sang mga tawo sang Dios. Magatinguha sia sa pagbaylo sang ila mga kasugoan sa pagtuluohan kag sang ila mga piesta, kag ang mga tawo sang Dios magapaidalom sa iya gahom sa sulod sang tatlo kag tunga ka tuig.

26Dayon ang langitnon nga korte magahukom, kag magakuha sang iya gahom kag magalaglag sa iya sing bug-os.

27Ang gahom kag kadungganan sang tanan nga mga ginharian sa duta igahatag sa mga tawo sang Labing Mataas nga Dios. Ang ila harianon nga gahom wala sing katapusan kag ang tanan nga manuggahom sa duta magaalagad kag magatuman sa ila.”

28Amo ini ang katapusan sang akon ginsugid. Kinulbaan gid ako kag nagpalanglapsi, pero ginhuptan ko lang ini sa akon kaugalingon.

← Chapter 6 Jump to: Chapter 8 →