Daniel 11 — Ilonggo (Maayong Balita nga Biblia (2012))

1Sia ang may katungdanan sa pagbulig kag sa pag-apin sa akon.

2Karon ang akon isugid sa imo matuod.” Ang anghel nagsiling, “May tatlo pa ka mga hari nga magagahom sa Persia, pagasundan ini sang ikap-at nga manginmanggaranon pa sang sa ila tanan. Kag kon yara na sia sa putokputokan sang iya gahom kag manggad pagahangkaton niya ang ginharian sang Gresia.

3“Dayon may magaabot nga isa ka hari nga isganan nga magagahom sa isa ka daku nga ginharian kag magahimo sia sang bisan ano nga luyag niya.

4Pero sang yara na sia sa putokputokan sang iya gahom, ang iya ginharian maguba kag mabahinbahin sa apat ka parti. Ang mga hari nga indi niya kaliwat amo ang magagahom sini, pero indi sila makaangkon sang gahom nga pareho sang iya gahom.

5“Ang hari sang Ehipto mangingamhanan. Pero ang isa sang iya mga heneral mangingamhanan pa gid kag magahari sang mas gamhanan pa nga ginharian.

6Sa tapos ang pila ka tuig, ang hari sang Ehipto magapakigdampig sa hari sang Siria, kag ipaasawa niya ang iya anak sa hari sang Siria. Pero ang ila pag-apinay indi magdugay, kag sia, ang iya bana, ang iya anak, kag ang iya mga suloguon nga nag-upod sa iya pagapatyon.

7Dayon sa indi madugay ang isa sang mga pariente sang rayna manginhari. Salakayon niya ang mga hangaway sang hari sang Siria, magasulod sia sa pamakod, kag magalutos sa ila.

8Dalhon niya balik sa Ehipto ang mga estatwa sang ila mga dios lakip ang malahalon nga mga pagkabutang nga nahimo sa bulawan kag pilak, nga nahalad sa sadto nga mga dios. Sa tapos ang mga tinuig sang paghidait,

9ang hari sang Siria magagubat sa Ehipto, pero mapilitan sia sa pag-isol.

10“Ang mga anak nga lalaki sang hari sang Siria magahanda para sa inaway kag magatipon sing madamo nga mga hangaway. Ang isa sa ila magapanglambas kaangay sang baha kag magapadayon sa pagsalakay sang pamakod sang mga kaaway.

11Sa iya kaakig, ang hari sang Ehipto magapakig-away batok sa hari sang Siria kag magabihag sang iya madamo nga mga hangaway.

12Magabugalon sia tungod sang iya pagdaog kag tungod sang madamo nga mga soldado nga iya ginpamatay, pero indi sia magpadayon nga madinalag-on.

13“Ang hari sang Siria magapauli kag magatipon sing mga hangaway nga mas madamo pa sang sa una. Kon ang nagakaigo nga tion mag-abot magabalik sia nga may madamo kag mas armado pa nga mga hangaway.

14Dayon madamo ang magarebelde sa hari sang Ehipto. Daniel, ang pila ka mapintas nga mga tawo gikan sa imo pungsod magarebelde tungod sang palanan-awon nga ila nakita, pero malutos sila.

15Gani ang hari sang Siria magakibon kag magasalakay sang napamakuran nga siudad kag ila ini agawon. Ang mga soldado sang Ehipto indi magpadayon sa pag-away, kag bisan ang labing maayo sa ila madulaan sing kusog sa pagpakig-away.

16Ang manuggubat nga Sirianhon magapagusto lang sang iya himuon sa ila kag wala gid sing may magabato. Magahari sia sa Duta nga Ginsaad kag pagagamhan niya ini sing bug-os.

17“Ang hari sang Siria magaplano sa pagpanggubat nga nagagamit sang bug-os niya nga hangaway. Dayon magahimo sia sing kasugtanan kag magahatag sang iya anak nga ipaasawa sa iya kaaway sa paghalit sa iya, pero ang iya plano indi magmadinalag-on.

18Sa tapos sini salakayon niya ang mga pungsod sa higad sang dagat kag madaog niya ang madamo sa ila. Pero ang isa ka dumoluong nga pangulo magalutos sa iya kag magapauntat sang iya pagpabugal. Magaantos sia tungod sang iya kabugalon.

19Ang hari magabalik sa mga pamakod sang iya kaugalingon nga duta, pero malutos sia, kag mangin-amo ini ang iya katapusan.

20“Magabulos sa iya ang isa naman ka hari nga magapadala sang opisyal nga magapigos sa mga tawo paagi sa mga buhis agod sa pagdugang sang manggad sang iya ginharian. Sa malip-ot nga tion ang amo nga hari pagapatyon sa tago, kag indi sa inaway.”

21Ang anghel nagpadayon sa pagsaysay: “Ang madason nga hari sang Siria mangin-isa ka malaut nga tawo nga wala sing kinamatarong sa paghari, pero magaabot sia sing hinali kag pagaagawon ang gahom paagi sa daya.

22Ang bisan sin-o nga magasumpong sa iya, bisan ang Pinakamataas nga Pari sang Dios, malutos kag magakalamatay.

23Paagi sa paghimo sing mga kasugtanan dayaan niya ang iban nga mga pungsod, kag magagamhanan pa gid sia, bisan nga diutay lamang nga pungsod ang iya ginagamhan.

24Pagagubaton niya nga wala sing paandam ang isa ka probinsya nga manggaranon kag magahimo sia sang mga butang nga wala gid mahimo sang iya mga katigulangan. Dayon ipanghatag niya sa iya mga sumolunod ang mga pagkabutang nga iya naagaw sa inaway. Magaplano sia sa pagsalakay sang mga pamakod, pero sa malip-ot lamang nga tion.

25“Magapangisog sia sa pagtipon sing madamo nga mga hangaway sa pagsalakay sang hari sang Ehipto, kag ang hari sang Ehipto magahanda sa pagbato nga may madamo kag makusog nga mga hangaway. Pero tungod sang pagluib, ang hari sang Ehipto indi magdaog.

26Ang iya pinakasuod nga mga palamangkutan magalaglag sa iya. Madamo sang iya mga soldado ang magakalamatay sa inaway, kag ang iya hangaway mapapas.

27Dayon ang duha ka hari magakaon sa isa lamang ka lamisa, pero ang ila mga tinutuyo malaut, kag sila nga duha magabutig sa isa kag isa. Indi nila makuha ang luyag nila, tungod kay ang nagakaigo nga tion wala pa mag-abot.

28Ang hari sang Siria magapauli nga dala ang iya napang-agaw kag nagtapat sia sa pagdula sang pagtuluohan sang mga tawo sang Dios. Magahimo sia suno sa luyag niya kag dayon magabalik sia sa iya kaugalingon nga duta.

29“Sa ulihi gubaton niya liwat ang Ehipto pero sa sini nga tion lain na ang matabo sang sa una.

30Ang mga taga-Roma magaabot nga nagasakay sa mga barko kag magasumpong sa iya kag magakahadlok sia. “Dayon magabalik sia nga may kaakig kag magatinguha sa pagdula sang pagtuluohan sang mga tawo sang Dios. Pagasundon niya ang laygay sang mga nagsikway sina nga pagtuluohan.

31Ang iban niya nga mga soldado magatampalas sang Templo. Pauntaton nila ang mga halad adlaw-adlaw kag ipahamtang nila ang Makakulogmat nga Kangil-aran.

32Paagi sa daya ang hari magakuha sang pagsakdag sang mga tawo nga nagbiya sang ila pagtuluohan, pero ang mga tawo nga nagasunod sa Dios magapakig-away sa iya.

33Ang maalam nga mga pangulo sang mga tawo magapaambit sang ila kaalam sa iban. Pero sa malip-ot nga tion ang iban sa ila mapatay sa inaway kag sunogon sa kalayo, kag ang iban sa ila pagaagawan sang mga pagkabutang kag prisuhon.

34Samtang nagapadayon ang pagpamatay, ang mga tawo sang Dios magabaton sing diutay nga bulig, bisan nga ang madamo sang mga nagbuylog sa ila may maiyaiyahon nga mga tinutuyo.

35Ang iban sang maalam nga mga pangulo pagapatyon. Kag tungod sini ang mga tawo pagatinloan. Magapadayon ini tubtob mag-abot ang katapusan, ang tion nga gintalana sang Dios.

36“Ang hari sang Siria magapagusto lang sang iya himuon. Magapabugal sia nga mas gamhanan pa sia sang sa bisan ano nga dios kag magasugid sia nga labaw pa sia sa Labing Gamhanan nga Dios. Mahimo niya ini tubtob sa tion nga pagasilutan sia sang Dios. Ang Dios magahimo sang mga butang nga iya ginpat-od nga himuon.

37Ang hari indi magsapak sang dios nga gin-alagad sang iya mga katigulangan, kag sang dios nga ginahigugma sang mga kababayin-an. Kon sa bagay, indi sia magsapak sang bisan ano nga dios, tungod kay nagahunahuna sia nga mas gamhanan pa sia sang sa ila.

38Sa baylo sini nga mga dios, pasidunggan niya ang dios nga nagaapin sang mga pamakod. Magahalad sia sing bulawan, pilak, malahalon nga mga bato kag madamo nga mga regalo sa dios nga wala gid ginsimba sang iya mga katigulangan.

39Gamiton niya ang mga tawo nga nagasimba sa iban nga dios sa pag-apin sang iya mga pamakod. Hatagan niya sing daku nga kadungganan ang mga tawo nga nagabaton sa iya subong nga pangulo, ibutang niya sila sa matag-as nga mga palangakuan, kag hatagan niya sila sing duta subong nga balos.

40“Kon ang panahon sang hari sang Siria dali na lang matapos, ang hari sang Ehipto magasalakay sa iya, kag magabato ang hari sang Siria sa bug-os niya nga kusog, nga nagagamit sang mga karwahi, mga kabayo, kag madamo nga mga barko. Pagasalakayon niya ang madamo nga mga pungsod kaangay sang baha.

41Pagagubaton niya ang Duta nga Ginsaad kag pamatyon niya ang linibo ka mga tawo. Pero ang mga pungsod sang Edom, Moab, kag ang nabilin sang Amon, indi maano.

42Kon salakayon niya yadto nga mga pungsod, bisan ang Ehipto indi makaluwas.

43Pagakuhaon niya ang natago nga mga manggad nga bulawan kag pilak kag ang malahalon nga mga pagkabutang sang Ehipto. Agawon niya ang Libya kag Etiopia.

44Dayon ang mga balita gikan sa sidlangan kag aminhan magapahadlok sa iya, kag magapakig-away sia sing mabangis, kag magapamatay sang madamo nga mga tawo.

45Ipahamtang niya ang iya dalagku kag harianon nga mga tolda sa gintung-an sang dagat kag bukid sa diin nagatindog ang Templo. Pero mapatay sia nga wala gid sing isa didto nga magabulig sa iya.”