Job 1

Ilonggo (Maayong Balita nga Biblia (2012))

Jump to: Chapter 2 →

1Sang una anay may isa ka tawo nga ginahingalanan kay Job nga nag-estar sa duta sang Uz. Isa sia ka maayo gid nga tawo kag nagalikaw gid sa paghimo sang bisan ano nga malaut. Nagasimba sia sa Dios kag matutom sa iya.

2May pito sia ka mga anak nga lalaki kag tatlo ka mga anak nga babayi.

3May 7,000 sia ka mga karnero, 3,000 ka mga kamelyo, kabakahan nga 1,000, kag 500 ka mga asno. May madamo man sia nga mga suloguon, kag sia ang labing manggaranon nga tawo sa Sidlangan.

4Kinabatasan sang iya mga anak nga lalaki ang pagbulosbulos sa paghiwat sing punsyon, sa diin sila tanan nagakadto sa pagtambong kag ila man pirme ginaagda ang ila tatlo ka mga utod nga babayi.

5Sa tapos sang tagsa ka punsyon, si Job nagabugtaw sing aga pa gid sa madason nga adlaw kag nagadulot sing mga halad nga sinunog agod mapatawad ang mga sala sang iya mga kaanakan. Ginhimo niya ini pirme tungod kay naghunahuna sia nga basi ang isa sang iya mga anak nagpakasala paagi sa pagpasipala sa Dios sing indi hungod.

6Sang pag-abot sang adlaw nga ang langitnon nga mga tinuga magaatubang sa Ginoo, si Satanas didto man upod sa ila.

7Ang Ginoo nagpamangkot sa iya, “Diin ka maghalin?” Si Satanas nagsabat, “Naglagawlagaw ako pakadto-pakari nga nagalibutlibot sa duta.”

8Ang Ginoo nagpamangkot, “Natalupangdan mo bala ang akon alagad nga si Job? Wala sing isa sa duta nga maayo kag matutom subong sa iya. Ginasimba niya ako kag nagalikaw gid sia sa paghimo sang bisan ano nga malaut.”

9Nagsabat si Satanas sa Ginoo, “Simbahon ka bala ni Job kon wala sia sing may makuha?

10Ginaapinan mo sia pirme kag ang iya panimalay kag ang tanan niya nga pagkabutang. Ginapauswag mo ang iya tanan nga ginahimo, kag ginahatagan mo sia sing madamo gid nga mga kasapatan nga nagpuno sang bug-os nga duta.

11Pero abi kuhaa ini tanan nga mga butang sa iya kag tan-awon ta kon indi ka niya pagpakamalauton sa imo atubang!”

12Ang Ginoo nagsiling kay Satanas, “Sigi, ang iya tanan nga mga pagkabutang ginatugyan ko sa imo gahom, pero indi lang sia pag-anha.” Gani naghalin si Satanas.

13Isa ka adlaw sang nagakinaon kag nagaininom ang mga kabataan ni Job sa balay sang ila kamagulangan nga utod nga lalaki,

14may mensahero nga nagdalagan pakadto kay Job. Nagsiling sia, “Samtang nagaarado kami sa uma, kag ang mga asno nagahalab sa malapit lamang nga lugar,

15sa hinali lamang ginsalakay kami sang mga Sabeanhon kag ginkuha nila ang tanan nga mga kahayupan. Ginpamatay nila ang tanan mo nga mga suloguon, kag ako lang ang nakapalagyo sa pagsugid sa imo.”

16Sa wala pa sia makatapos hambal, nag-abot ang isa ka suloguon kag nagsiling, “Naigo sang kilat ang mga karnero kag ang mga manugbantay kag nagkalamatay sila tanan. Ako lang ang naluwas sa pagsugid sa imo.”

17Sa wala pa sia makatapos hambal, nag-abot ang isa ka suloguon kag nagsiling, “Ginsalakay kami sang tatlo ka grupo sang mga Caldeanhon, ginpamatay nila ang tanan mo nga mga suloguon, gindala nila ang tanan nga mga kamelyo, kag ako lang ang nakapalagyo sa pagsugid sa imo.”

18Sa wala pa sia makatapos hambal, nag-abot ang isa pa gid ka suloguon kag nagsiling, “Samtang nagakinaon kag nagaininom ang tanan mo nga mga kabataan sa balay sang imo kamagulangan nga anak nga lalaki,

19nag-abot sing hinali ang mabaskog nga buhawi halin sa desierto. Ginhakwat kag ginlampos sang buhawi ang balay kag nagkalamatay sila tanan kag ako lang ang naluwas sa pagsugid sa imo.”

20Dayon nagtindog si Job kag gingisi niya ang iya bayu sa daku nga kasubo. Ginkiskisan niya ang iya ulo kag naghapa sa duta.

21Nagsiling sia, “Natawo ako nga wala sing dala kag mapatay man nga wala gid sing dala. Ang Ginoo nagahatag, kag sia man ang nagabawi. Dayawon ang iya ngalan!”

22Wala sapayan sang tanan nga natabo, si Job wala magpakasala paagi sa pagbasol sa Dios.

Jump to: Chapter 2 →