Job 39

Ilonggo (Maayong Balita nga Biblia (2012))

← Chapter 38 Jump to: Chapter 40 →

1Nakahibalo ka bala kon san-o nagabata ang talunon nga mga kanding? Nakabantay ka bala sang pagbata sang usa?

2Ginaisip mo bala ang mga binulan sang ila pagbusong, kag nakahibalo ka bala sang tion sang ila pagbata?

3Nakahibalo ka bala kon san-o sila magkatinkatin sa pagbata sang ila tinday sa kalibutan?

4Ang ila mga tinday nagatubo sing mabakod sa talon, nagalakat sila kag wala na nagabalik.

5Sin-o bala ang nagapahilway sang mga asno nga talunon? Sin-o bala ang nagahubad sang ila higot kag nagapalayaw sa ila?

6Ginhatag ko sa ila ang desierto nga mangin-ila ilistaran, kag ginpaestar sila sa maasin nga kapatagan.

7Nagapalayo sila sa magahod nga mga siudad kag wala sing may makaanta ukon makapaobra sa ila.

8Ang mga kabukiran amo ang ila halalban, sa diin sila nagapangita sang bisan ano nga ila mahalab.

9Mapaobra mo bala ang simaron nga baka? Luyag bala sia magtener sing isa ka gab-i sa imo toril?

10Mahigtan mo bala sia kag mapaarado? Ukon mapakaras mo bala sia sa imo talamnan?

11Makasalig ka bala sa iya daku nga kusog kag makapaabot ka bala nga sia ang magaobra sang imo mabug-at nga obra?

12Nagapaabot ka bala nga sia ang magatipon sang imo patubas kag magahakot sang uyas sa imo linasan?

13Ang mga pakpak sang ostrit madasig magkapaykapay! Pero wala sing ostrit nga makalupad kaangay sang tulabong.

14Ang ostrit nagabilin sang iya mga itlog sa duta agod mainitan ini sang duta.

15Wala sia nagapanumdom nga matapakan ini, ukon ang talunon nga sapat magabuka sini.

16Ginakabig niya nga ang itlog daw indi iya, kag wala sia nagakabalaka nga ang iya pagpangabudlay manginwala sing pulos.

17Ako ang naghimo sa iya nga buangbuang kag wala maghatag sa iya sing kaalam.

18Pero kon magsugod na sia sa pagdalagan, pagakadlawan lang niya ang kabayo kag ang nagasakay sini.

19Job, ikaw bala ang naghimo sang mga kabayo nga makusog, kag naghatag sang ila nagabalod nga bungaybungay?

20Ikaw bala ang nagpalumpat sa ila kaangay sang mga apan kag nagapahadlok sang mga tawo sang ila hirihiri?

21May kapagsik sila sa pagpangahig sang duta sa kapatagan, nagadalagan sila pakadto sa inaway sa bug-os nila nga kusog.

22Wala sila makakilala sang kahadlok, wala sing espada nga makapadalagan sa ila pabalik.

23Ang mga hinganiban nga ginadala sang mga nagasakay sa ila nagalinagtik kag nagaidlab sa silak sang adlaw.

24Ang mga kabayo nga nagaharahara sa kakunyag, nagadalagan sa pag-abanse, kon maghuni ang trumpeta indi sila makapahimuyong.

25Sa tagsa ka paghuni sang trumpeta nagahirihiri sila, makapanimaho sila sang inaway bisan malayo pa sila, kag mabatian nila ang mga opisyales nga nagamando.

26Sa imo bala nagatuon ang dapay sa paglupad kon maglupad ini pa bagatnan?

27Nagahulat bala ang agila sang imo mando sa paghimo sang iya pugad sa mataas nga mga bukid?

28Nagahimo ini sang iya ilistaran sa pinakamataas nga mga bato sa pil-as kag nagahimo sang putokputokan sang bato sa pil-as nga iya palalipdan.

29Gikan didto nagalantaw sia sa malapit kag malayo sang iya mapatay kag makaon.

30Sa palibot sang patay nga mga lawas yara sila nagatipon, kag ang ila mga buto nagasuyop sang dugo.

← Chapter 38 Jump to: Chapter 40 →