Job 24

Ilonggo (Maayong Balita nga Biblia (2012))

← Chapter 23 Jump to: Chapter 25 →

1Ngaa ang Dios nga Makagagahom wala nagatalana sing tion sa paghukom, kag ngaa wala sia nagatalana sing adlaw nga ang mga nagaalagad sa iya makakita sang iya matarong nga paghukom?

2Ang malaut nga mga tawo nagahalin sang mga muhon sa paghugakom sang dugang pa nga mga duta, nagapangawat sila sing mga karnero kag ginasimpon nila ini sa ila mga panong.

3Ginakawat nila ang mga asno sang mga ilo, kag ginakuha nila ang baka sang balo nga babayi tubtob makabayad sia sang iya mga utang.

4Ginaupangan nila ang paghatag sang kinamatarong sa mga imol, kag ginapilit nila ang mga nawad-an sa pagdalagan kag pagpanago.

5Gani ang mga imol, kaangay sang talunon nga mga asno, nagapangita sang ila kalan-on sa kigas nga mga kawayangan, bisan diin indi sila makakita sing pagkaon para sa ila mga kabataan.

6Mapilitan sila sa pagpangani sa mga uma nga indi ila, kag sa pagpamupo sang mga ubas sa talamnan sang malaut nga mga tawo.

7Kon gab-i nagatulog sila nga wala sing habol, wala gid sing makaamlig sa ila sa tugnaw.

8Nagakabasa sila sang ulan nga nagatupa sa mga kabukiran, kag nagatumpok sila sa pagpasilong sa dalagku nga mga bato.

9Ang malaut nga mga tawo nagaulipon sang mga kabataan nga wala sing amay, kag ginakuha ang mga kabataan sang mga imol subong nga bayad sang mga utang.

10Pero ang mga imol nagadalangdalang nga nagaubauba, kag bisan ginagutom, nagaani sang trigo.

11Nagapuga sila sang mga olivo sa pagkuha sing lana, kag sang ubas sa pagkuha sing bino, pero sila ila ginauhaw.

12Sa mga siudad mabatian ang pag-ugayong sang mga pilason kag mga tagumatayon, pero ang Dios wala nagasapak sang ila mga pangamuyo.

13May mga tawo nga nagasikway sang kapawa, wala sila makahangop sini kag wala nagapabilin sa iya mga dalanon.

14Sa kaagahon ang manugpatay nagagwa sa pagpatay sang mga imol, kag sa kagab-ihon nagapangawat sia.

15Ang babayidor nagahulat sang pag-abot sang kasisidmon, kag ginatabunan niya ang iya nawong agod wala sing may makakita sa iya.

16Sa kagab-ihon ang mga makawat nagasulod sa mga balay, pero kon adlaw nagapanago sila kag nagalikaw sa kapawa.

17Nagakahadlok sila sa kapawa sang adlaw, pero wala sila ginakugmat sang kadudulman.

18Ang malaut nga tawo ginaanod sang baha, kag ang iya duta ginapakamalaut sang Dios, wala na sia nagakadto sa pag-obra sa iya talamnan sang ubas.

19Subong nga ang yelo nagakatunaw sa init kag sa tingadlaw, amo man ang makasasala nagakadula gikan sa duta sang mga buhi.

20Wala sing may nagadumdom sa iya, bisan gani ang iya iloy, ang mga ulod nagakaon sa iya, kag nalaglag sia subong sang napukan nga kahoy.

21Nagakahanabo ini tungod kay wala niya gintratar sing maayo ang mga babayi nga balo kag wala sia magkaluoy sa mga babayi nga baw-as.

22Ang Dios, sa iya kusog, nagalaglag sang mga gamhanan, kon ang Dios maghulag, ang malaut nga tawo nagakapatay.

23Ayhan ang Dios magatugot nga magkabuhi sia nga indi maano, pero ginabantayan gid sang Dios ang tanan niya nga hulag sa tanan nga tion.

24Sa malip-ot nga tion ang malaut nga tawo nagauswag, pero sa indi madugay nagakalaya sia subong sang hilamon, kaangay sang dagami nga gingarab.

25May makapanghiwala bala sini? May makapamatuod bala nga kabutigan ang akon mga ginapanghambal?

← Chapter 23 Jump to: Chapter 25 →