Job 42

Ilonggo (Maayong Balita nga Biblia (2012))

← Chapter 41 Jump to:

1Dayon si Job nagsabat sa Ginoo:

2O Ginoo, nakahibalo ako nga ikaw labi ka gamhanan, nga makahimo ka sang tanan nga luyag mo.

3Nagapamangkot ka kon ngaa nakapangahas ako sa pagpangduhaduha sang imo kaalam nga kon sa bagay ako kulang sa ihibalo. Naghambal ako sang mga butang nga wala ko mahangpi, nahanungod sang mga katingalahan nga labaw sa akon mahibaluan.

4Ginsingganan mo ako sa pagpamati samtang nagahambal ikaw kag sa pagsabat sang imo mga pamangkot.

5Sang una ang nahibal-an ko lamang nahanungod sa imo amo ang ginsugid sang iban sa akon, pero karon nakita ko gid ikaw sang akon mga mata.

6Gani nahuya ako sang tanan nga ginhambal ko kag nagahinulsol ako nga nagapungko sa yab-ok kag sa abo.

7Sa tapos makahambal ang Ginoo sini tanan kay Job, ginsingganan niya si Elifaz, “Naakig ako sa imo kag sa imo duha ka abyan, tungod kay wala kamo maghambal sang kamatuoran nahanungod sa akon, kaangay sang paghambal sang akon alagad nga si Job.

8Karon dala kamo kay Job sing pito ka torite nga mga baka kag pito ka mga karnero nga lalaki kag ihalad ninyo ini subong halad nga sinunog para sa inyo kaugalingon. Si Job magapangamuyo para sa inyo, kag ako magasabat sang iya pangamuyo kag indi ko kamo pagsilutan suno sa nagakabagay sa inyo. Indi husto ang ginhambal ninyo nahanungod sa akon subong sang ginhimo niya.”

9Si Elifaz, si Bildad, kag si Sopar nagtuman sang ginsiling sang Ginoo, kag ang Ginoo nagsabat sang pangamuyo ni Job.

10Dayon, sa tapos si Job makapangamuyo para sa iya tatlo ka mga abyan, ang Ginoo nagpauswag sa iya liwat kag naghatag sa iya sing mga pagkabutang nga pilo ang kadamuon sang sa una.

11Ang tanan nga mga kautoran ni Job nga lalaki kag babayi, kag ang iya mga abyan anay nagbisita sa iya kag nagkinaon sila sa iya balay upod sa iya. Nagpabutyag sila sang ila pagbuylog sa iya kalisdanan kag ginlipay nila sia tungod sang tanan nga kalalat-an nga ginhatag sang Ginoo sa iya. Ang tagsatagsa sa ila naghatag sa iya sing kwarta kag sang isa ka bulawan nga singsing.

12Ang Ginoo nagpabugana sang naulihi nga bahin sang kabuhi ni Job labaw pa sang sa pagpabugana sa iya sang una. Si Job may 14,000 ka mga karnero, 6,000 ka mga kamelyo, 2,000 ka mga baka, kag 1,000 ka mga asno.

13May pito sia ka mga anak nga lalaki kag tatlo ka mga anak nga babayi.

14Ang magulang gid ginhingalanan niya kay Jemima, ang ikaduha kay Kesia, kag ang kamanghuran kay Keren-hapok.

15Wala na sing mga babayi sa bug-os nga kalibutan nga pareho katahom sang mga anak ni Job. Ang ila amay naghatag sa ila sang ila palanublion upod sa ila mga utod nga lalaki.

16Sa tapos sini si Job nagkabuhi sing 140 pa ka tuig, kag nakakita pa sia sang iya mga apo kag mga apo sa tuhod.

17Kag dayon tigulang na gid sia sang mapatay.

← Chapter 41 Jump to: