Job 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1Natak-an na ako sa pagkabuhi. Ipautwas ko ang akon reklamo, magahambal ako nga may kalain sang buot.

2Indi ako pagkondenaha, O Dios. Sugiri ako kon ano ang imo panumbongon batok sa akon.

3Maayo bala nga ikaw magmapintas? Nga ikaw magtamay sang imo mismo ginhimo? Kag ikaw magkalipay sa mga padihot sang malaut nga mga tawo?

4Makakita ka bala subong sang pagkakita sang tawo, kag makahangop ka bala subong sang paghangop sang tawo?

5Malip-ot bala ang imo kabuhi subong sang amon?

6Karon, ngaa bala ginabantayan mo ang tanan ko nga mga kasal-anan kag ginausisa mo ang tagsa ko ka sayop?

7Nahibaluan mo nga wala ako sing sala, nga wala sing may makaluwas sa akon gikan sa imo.

8Ang imo mga kamot naghimo kag nagdihon sa akon, kag karon ina man nga mga kamot nagalaglag sa akon.

9Dumdoma, O Dios, nga ginhimo mo ako gikan sa lunang, imo bala ako dugmokon liwat pabalik sa yab-ok?

10Ginhatagan mo sing kusog ang akon amay sa paghimo sa akon, ginpatubo mo ako sa tiyan sang akon iloy.

11Ginbuhat mo ang akon lawas nga may mga tul-an kag mga ugat kag ginputos mo ang akon mga tul-an sing mga unod kag panit.

12Ginhatagan mo ako sing kabuhi kag malig-on nga gugma, kag ang imo pagtatap nagatipig sang akon kabuhi.

13Pero karon nahibaluan ko nga sa tanan nga tion sadto may sekrito ikaw nga tinutuyo sa paghalit sa akon.

14Nagbantay ikaw kon bala magapakasala ako, agod indi mo ako pagpatawaron.

15Sa tion nga makasala ako, makaluluoy ako sa imo, pero kon maghimo ako sing matarong, wala man ako sing ipabugal. Makaluluoy ako kag napun-an sing kahuy-anan.

16Kon magmadinalag-on gid man ako, ginalagas mo ako subong sang leon, nagahimo ikaw sing mga milagro sa paghalit sa akon.

17Sa gihapon may saksi ikaw batok sa akon, ang imo kaakig sa akon nagadugang nga nagadugang, wala nagauntat ang imo pagpadala sang mga soldado nga handa sa pagsalakay sa akon.

18Ngaa bala, O Dios, gintugot mo nga matawo ako? Kuntani maayo pa nga napatay ako sa wala pa sing may nakakita sa akon.

19Kuntani napatay na lang ako kag sa gilayon ginlubong nila ako. Mas maayo pa ini sang sa pagkabuhi.

20Indi bala ilisipon na lang ang akon mga inadlaw? Pabay-i lang ako! Tugoti ako nga magkalipay sa akon nabilin nga mga tion.

21Sa indi madugay magataliwan ako kag indi na gid magbalik, pakadto sa madulom, kag masubo nga duta,

22isa ka duta sang kadudulman, mga landong, kag kagamo, sa diin bisan ang kapawa kadudulman.

← Chapter 9 Jump to: Chapter 11 →