Leviticus 10

Ilonggo (Maayong Balita nga Biblia (2012))

← Chapter 9 Jump to: Chapter 11 →

1Karon ang mga anak nga lalaki ni Aaron, nga amo sanday Nadab kag Abiu, nagkuha sang ila tagsa ka insensario, ginbutangan nila ini sing mga baga, kag gindugangan sing insyenso, kag ginhalad ini sa Ginoo. Pero ini nga kalayo indi balaan, tungod kay ang Ginoo wala magsugo sa ila sa paghalad sini.

2Sa hinali ang Ginoo nagpadala sing kalayo kag ginsunog sila, gani napatay sila didto sa presensya sang Ginoo.

3Dayon ginsingganan ni Moises si Aaron, “Amo ini ang buot silingon sang Ginoo sang paghambal niya, ‘Ang tanan nga nagaalagad sa akon kinahanglan magtahod sang akon pagkabalaan, kay ipahayag ko ang akon kadungganan sa akon mga tawo.’” pero si Aaron naghipos lamang.

4Gintawag ni Moises si Misael kag si Elzafan, mga anak nga lalaki ni Uziel nga tiyo ni Aaron, kag ginsingganan sila, “Dali kamo kag kuhaa ninyo ang mga bangkay sang inyo mga pakaisa halin sa balaan nga Tolda kag ibutang sila sa gwa sang kampo.”

5Gani nagpalapit sila kag gindala nila ang mga bangkay paagi sa pag-uyat sa ila mga bayu pakadto sa gwa sang kampo, suno sa ginsugo ni Moises.

6Dayon ginsingganan ni Moises si Aaron kag ang iya mga anak nga amo sanday Eleazar kag Itamar, “Indi ninyo paggumona ang inyo mga buhok ukon paggision ang inyo mga bayu sa pagpakita sang inyo pagpangasubo. Kon himuon ninyo ini, magakalamatay kamo kag ang Ginoo maakig sa bug-os nga katilingban. Pero ang inyo tanan nga mga kasimanwa nga Israelinhon ginapahanugotan nga maglalaw sini nga kamatayon nga ang ginbangdan amo ang kalayo nga ginpadala sang Ginoo.

7Indi kamo maghalin sa pwertahan sang Tolda, basi magakalamatay kamo, tungod kay ginpakabalaan kamo paagi sa lana sang Ginoo nga inughaplas.” Gintuman nila ang ginsiling ni Moises.

8Ang Ginoo nagsiling kay Aaron:

9“Ikaw kag ang imo mga anak nga lalaki indi magsulod sa Tolda sang akon presensya kon makainom kamo sing bino ukon makahulobog nga ilimnon. Kon himuon ninyo ini, magakalamatay kamo. Amo ini ang isa ka kasugoan nga pagatumanon sang tanan ninyo nga mga kaliwatan.

10Dapat ninyo kilalahon kon ano ang balaan kag kon ano ang di-balaan, subong man kon ano ang matinlo kag kon ano ang di-matinlo.

11Kinahanglan tudloan mo ang mga tawo sang Israel sang tanan nga mga kasugoan nga akon ginhatag sa imo paagi kay Moises.”

12Si Moises nagsiling kay Aaron kag sa iya duha ka anak nga nabilin nga amo sanday Eleazar kag Itamar, “Kuhaa ninyo ang nabilin sang halad nga kalan-on nga ginhalad sa Ginoo paagi sa kalayo, kag maghimo kamo gikan sini sing tinapay nga wala sing lebadora, kag kauna ninyo ini sa tupad sang altar, tungod kay ini nga halad tama ka balaan.

13Kauna ninyo ini sa balaan nga duog, kay amo ini ang inyo bahin kag sang inyo mga anak nga lalaki sa halad nga kalan-on nga ginhalad sa Ginoo paagi sa kalayo. Amo ini ang ginsugo sang Ginoo sa akon.

14Pero ikaw kag ang imo mga panimalay sarang makakaon sang dughan kag sang pangulihi nga tiil nga ginhalad subong pinasahi nga dulot kag pinasahi nga bahin sa Ginoo para sa mga pari. Sarang ninyo ini makaon sa bisan diin nga lugar nga matinlo. Ini nga mga halad ginhatag sa inyo kag sa inyo mga kaanakan nga lalaki kag babayi subong inyo bahin gikan sa mga halad sa paghiambit sang mga tawo sang Israel.

15Dalhon nila ang pangulihi nga tiil kag ang dughan sa tion nga ginahalad ang sapay subong nga halad nga kalan-on sa Ginoo paagi sa kalayo. Amo ini ang inyo bahin kag sang inyo mga kaanakan sa walay katapusan, suno sa ginsugo sang Ginoo.”

16Nagpamangkot si Moises nahanungod sang kanding para ihalad tungod sa sala kag nahibal-an niya nga ginsunog na ini. Tungod sini naakig sia kay Eleazar kag kay Itamar, kag ginsuknaan niya sila,

17“Ngaa bala wala ninyo pagkauna ang halad tungod sa sala sa isa ka lugar nga balaan? Tama ini ka balaan, kag ang Ginoo naghatag sini sa inyo agod sa pagkuha sang sala sang katilingban.

18Tungod kay ang dugo wala madala sa sulod sang balaan nga Tolda, dapat ninyo kuntani ginkaon ang halad didto, suno sa akon ginsugo.”

19Nagsabat si Aaron, “Abi, kon ginkaon ko ang halad tungod sa sala karon nga adlaw, malipay bala sini ang Ginoo? Ang mga tawo nagdulot sa Ginoo sang ila halad tungod sa sala karon nga adlaw kag nagdala sila sang ila halad nga sinunog, pero nahanabo pa ining malain nga mga butang sa akon.”

20Sang pagkabati sini ni Moises, kumpormi man sia.

← Chapter 9 Jump to: Chapter 11 →