Leviticus 9

Ilonggo (Maayong Balita nga Biblia (2012))

← Chapter 8 Jump to: Chapter 10 →

1Sa ikawalo nga adlaw, gintawag ni Moises si Aaron kag ang iya mga anak kag ang mga pangulo sang Israel.

2Ginsingganan niya si Aaron, “Magkuha ka sing isa ka torite nga baka kag isa ka karnero nga lalaki nga wala sing bisan ano nga depekto kag ihalad ini sa Ginoo, ang torite nga baka para sa halad tungod sa sala kag ang karnero nga lalaki para sa halad nga sinunog.

3Dayon singgana ang mga tawo sang Israel, ‘Kuha kamo sang isa ka toro nga kanding para sa halad tungod sa sala, kag isa ka tuig nga torite nga baka, kag isa ka tuig nga kordero nga wala sing bisan ano nga depekto para sa halad nga sinunog,

4kag isa ka toro nga baka kag isa ka karnero nga lalaki para sa halad sa paghiambit. Ihalad nila ini sa Ginoo upod sa halad nga kalan-on nga nasamuan sing lana. Kinahanglan himuon gid nila ini, tungod kay ang Ginoo magapahayag sa ila karon nga adlaw.’”

5Gindala nila sa atubangan sang Tolda ang tanan nga mga butang nga ginsugo ni Moises sa ila, kag ang bug-os nga katilingban nagtipon didto sa pagsimba sa Ginoo.

6Si Moises nagsiling, “Ang Ginoo nagsugo sa inyo sa paghimo sini tanan, agod nga ang makasililaw nga kapawa sang iya presensya magapakita sa inyo.”

7Dayon nagsiling sia kay Aaron, “Kadto ka sa altar kag magdulot sang halad tungod sa sala kag sang halad nga sinunog sa pagkuha sang imo mga sala kag sang mga sala sang mga tawo. Idulot ini nga halad sa pagkuha sang mga sala sang mga tawo, suno sa ginsugo sang Ginoo.”

8Nagkadto si Aaron sa altar kag gin-ihaw niya ang torite nga baka subong halad para sa iya kaugalingon nga sala.

9Ang iya mga anak nagdala sa iya sang dugo, gintum-oy niya ang iya tudlo sa sini, ginhamlit niya ang iban sini sa mga sungaysungay nga yara sa mga pamusod sang altar, kag gin-ula niya ang nabilin nga dugo sa sadsaran sang altar.

10Dayon ginsunog niya sa altar ang sapay, ang mga batubato, kag ang labing maayo nga bahin sang atay, suno sa ginsugo sang Ginoo kay Moises.

11Pero ginsunog niya ang karne kag ang panit sa gwa sang kampo.

12Gin-ihaw niya ang sapat subong halad nga sinunog para sa iya kaugalingon. Ang iya mga anak nga lalaki nagdala sa iya sang dugo, kag gin-ula niya ini sa apat ka mga kilid sang altar.

13Ginduhol nila sa iya ang ulo kag ang iban nga bahin sang sapat, kag ginsunog niya ini sa altar.

14Dayon ginhugasan niya ang mga kasudlan kag ang pangulihi nga mga tiil kag ginsunog niya ini sa altar sa ibabaw sang iban nga mga halad nga sinunog.

15Sa tapos sini, gindulot niya ang mga halad sang mga tawo. Ginkuha niya ang kanding nga ihalad tungod sang mga sala sang mga tawo, gin-ihaw niya ini, kag ginhalad, pareho sang iya ginhimo sa halad para sa iya kaugalingon nga sala.

16Gindala man niya ang sapat para sa halad nga sinunog kag ginhalad ini suno sa mga pagsulondan.

17Dayon gindulot niya ang halad nga kalan-on kag nagkuha sia sang isa ka hakop nga harina kag ginsunog ini sa altar. Ini dugang sa halad nga sinunog adlaw-adlaw.

18Gin-ihaw niya ang toro nga baka kag ang karnero nga lalaki subong isa ka halad sa paghiambit para sa mga tawo. Ang iya mga anak nga lalaki nagdala sa iya sang dugo kag gin-ula niya ini sa apat ka mga kilid sang altar.

19Ginbutang ni Aaron ang sapay sang toro nga baka kag sang karnero nga lalaki

20sa ibabaw sang mga dughan sang mga sapat, kag gindala niya ini tanan sa altar. Ginsunog niya ang sapay sa altar,

21kag ginhalad niya ang mga dughan kag ang tuo nga pangulihi nga mga tiil subong isa ka pinasahi nga dulot sa Ginoo para sa mga pari, suno sa ginsugo ni Moises.

22Sang makatapos si Aaron sa pagdulot sang tanan nga mga halad, ginbayaw niya ang iya mga kamot sa ibabaw sang mga tawo kag ginbendisyunan niya sila, kag dayon nagpanaog sia.

23Si Moises kag si Aaron nagsulod sa Tolda sang presensya sang Ginoo kag sang paggwa nila ginbendisyunan nila ang mga tawo, kag ang makasililaw nga kapawa sang presensya sang Ginoo nagpakita sa tanan nga mga tawo.

24Sa hinali ang Ginoo nagpadala sing kalayo, kag nagsunog ini sang bug-os nga halad kag sang mga sapay sa altar. Sang makita ini sang mga tawo, nagsinggit sila tanan kag nagluhod sila nga ang ila mga guya nagaduot sa duta.

← Chapter 8 Jump to: Chapter 10 →