Leviticus 23

Ilonggo (Maayong Balita nga Biblia (2012))

← Chapter 22 Jump to: Chapter 24 →

1Ang Ginoo nagsiling kay Moises:

2“Ihambal sa mga tawo sang Israel ining masunod nga mga pagsulondan para sa akon mga piesta kon sila magtipon sa pagsimba.

3May anom kamo ka adlaw sa paghimo sang inyo mga bulohaton, pero dumdoma ninyo nga ang ikapito nga adlaw amo ang Adlaw nga Inugpahuway. Sa sini nga adlaw indi kamo mag-obra, kundi magtipon kamo sa pagsimba. Ang Adlaw nga Inugpahuway akon, bisan diin kamo nagaestar.

4Ipahibalo ninyo ang masunod nga mga piesta sa natalana nga mga panahon.

5“Ang Pascua nga ginasaulog sa pagpasidungog sa akon, nagasugod sang adlaw sa pagtunod sa ika-14 nga adlaw sang nahauna nga bulan.

6Sa ika-15 nga adlaw nagasugod ang Piesta sang Tinapay nga Wala sing Lebadora, kag sa sulod sang pito ka adlaw magkaon kamo sang tinapay nga wala sing lebadora.

7Sa nahauna nga adlaw magatipon kamo sa pagsimba kag indi kamo maghimo sang inyo adlaw-adlaw nga mga bulohaton.

8Magdulot kamo sing mga halad nga kalan-on sa akon paagi sa kalayo sa sulod sang pito ka adlaw. Sa ikapito nga adlaw magtipon kamo liwat sa pagsimba kag indi kamo maghimo sang inyo adlaw-adlaw nga mga bulohaton.

9“Kon mag-abot kamo sa duta nga ginahatag ko sa inyo kag mag-ani kamo sang inyo mga patubas, ihatag ninyo ang nahauna nga inupong sa pari.

11Ihalad niya ini subong isa ka pinasahi nga dulot sa akon, agod nga batunon kamo. Ang pari magahalad sini sa adlaw pagkatapos sang Adlaw nga Inugpahuway.

12Sa adlaw sang inyo pagdulot sang halad nga kalan-on, magdulot man kamo sing kordero nga wala sing bisan ano nga depekto nga nagaedad sing isa ka tuig subong isa ka halad nga sinunog.

13Lakip sini maghalad kamo sing apat ka libra sang pinili nga harina nga nasamuan sing lana sang olivo subong isa ka halad nga kalan-on paagi sa kalayo. Ang kahamot sini nga halad manginkahalamut-an sa akon. Magdulot man kamo upod sini sing isa ka litro nga bino.

14Indi kamo magkaon sang bag-o nga uhay, bisan hilaw ukon sinanlag, ukon ginhimo nga tinapay, tubtob madala ninyo ang inyo halad sa akon. Ini nga pagsulondan pagatumanon sang tanan mo nga mga kaliwat sa tanan nga panahon nga palaabuton.

15“Mag-isip kamo sing pito ka simana halin sa adlaw sa tapos ang Adlaw nga Inugpahuway sa diin nagdala kamo sing inupong sang mga uhay nga idulot sa akon.

16Sa ika-50 nga adlaw, sa tapos ang ikapito nga Adlaw nga Inugpahuway, magdulot kamo sa akon sing isa ka bag-o nga halad nga kalan-on halin sa bag-o nga patubas.

17Ang tagsa ka panimalay magdala sing duha ka bilog nga tinapay kag idulot ini sa akon subong isa ka pinasahi nga halad. Ang tagsa ka binilog nga tinapay nahimo sa apat ka libra sang pinili nga harina nga naluto nga may lebadora, kag pagaihalad ini sa akon subong isa ka dulot sang nahauna nga patubas nga pagaanihon.

18Kag upod sa tinapay ang katilingban magadulot sing pito ka mga kordero nga nagaedad sing isa ka tuig, isa ka toro nga baka, kag duha ka mga kanding nga lalaki nga wala sing bisan ano nga depekto. Idulot ini sila subong isa ka halad nga sinunog sa akon, lakip ang isa ka halad nga kalan-on kag isa ka halad nga bino. Ang kahamot sini nga halad manginkahalamut-an sa akon.

19Maghalad man kamo sing isa ka toro nga kanding subong isa ka halad tungod sa sala kag duha ka mga kordero nga nagaedad sing isa ka tuig subong isa ka halad sa paghiambit.

20Ang pari magahalad sang tinapay lakip ang duha ka mga kordero subong isa ka pinasahi nga dulot sa akon para sa mga pari. Ini nga mga halad balaan.

21Sa sini nga adlaw wala sing isa sa inyo nga maghimo sang iya adlaw-adlaw nga bulohaton, kundi magtipon kamo sa pagsimba. Ang inyo mga kaliwat kinahanglan magtuman sini nga pagsulondan sa tanan nga panahon nga palaabuton, bisan diin sila nagaestar.

22“Kon mag-ani kamo sa inyo mga uma, indi ninyo paggaraba ang mga uhay sa higad sang mga uma kag indi kamo magbalik sa pagsaghaw sang nabilin nga mga uhay. Ibilin ini sa imol nga mga tawo kag sa mga dumoluong. Ako ang Ginoo nga inyo Dios.

23“Sa nahauna nga adlaw sang ikapito nga bulan, sauloga ninyo ang isa ka pinasahi nga adlaw sang pagpahuway, kag magtipon kamo sing tingob sa pagsimba kon magtunog ang mga trumpeta.

25Indi kamo maghimo sang adlaw-adlaw ninyo nga bulohaton kag magdulot kamo sa akon sing isa ka halad nga kalan-on paagi sa kalayo.

26“Ang ika-10 nga adlaw sang ikapito nga bulan amo ang adlaw nga pagasaulogon ang tuigtuig nga tulomanon sa pagkuha sang mga sala sang mga tawo. Sa amo nga adlaw indi gid kamo magkaon sang bisan ano, magtipon kamo sing tingob sa pagsimba, kag magdulot kamo sa akon sing halad nga kalan-on paagi sa kalayo.

28Indi kamo mag-obra sa sina nga adlaw, tungod kay amo ina ang adlaw sa paghimo sang tulomanon sa pagkuha sang inyo sala sa akon presensya, ang Ginoo nga inyo Dios.

29Ang bisan sin-o nga magkaon sang bisan ano sa sini nga adlaw indi na pagkabigon nga isa sing akon mga tawo.

30Kag ang bisan sin-o nga maghimo sang bisan ano nga obra sa sina nga adlaw, ako gid amo ang magapapatay sa iya.

31Ini nga pagsulondan para sa tanan ninyo nga kaliwat, bisan diin sila nagaestar.

32Halin sa pagtunod sang adlaw sa ikasiyam nga adlaw sang bulan tubtob sa pagtunod sang adlaw sa ika-10, saulogon ninyo ini subong isa ka pinasahi nga adlaw sang pagpahuway kag indi gid kamo magkaon bisan ano sa sini nga adlaw.

33“Ang Piesta sang mga palasilungan nagasugod sa ika-15 nga adlaw sang ikapito nga bulan kag nagapadayon ini sa sulod sang pito ka adlaw.

35Sa nahauna nga adlaw magtipon kamo sing tingob sa pagsimba kag indi kamo maghimo sang inyo adlaw-adlaw nga bulohaton.

36Sa sulod sang pito ka adlaw magdulot kamo sing halad nga kalan-on paagi sa kalayo kada adlaw. Sa ikawalo nga adlaw magtipon kamo liwat sing tingob sa pagsimba kag magdulot sing halad nga kalan-on paagi sa kalayo. Isa ini ka adlaw sa pagsimba kag indi kamo maghimo sang bisan ano nga obra.

37“Ini nga mga piesta para sa akon sa diin ginapasidunggan ninyo ako paagi sa pagtipon sing tingob sa pagsimba kag pagdulot sing mga halad nga kalan-on paagi sa kalayo, mga halad nga sinunog, mga halad nga kalan-on, mga halad sang paghiambit, kag mga halad nga bino, suno sa ginakinahanglan adlaw-adlaw.

38Wala labot sini nga mga piesta may yara na nga mga kinaandan nga Adlaw nga Inugpahuway, kag dugang pa sini nga mga halad yara na ang inyo kinaandan nga mga halad, ang inyo mga halad sa pagtuman sang mga saad kag ang inyo mga halad nga kinabubot-on nga ginahatag sa akon.

39“Sa ika-15 nga adlaw sang ikapito nga bulan, kon naani na ninyo ang inyo mga uma, sauloga ninyo ini nga piesta sa sulod sang pito ka adlaw. Sa nahauna kag katapusan nga adlaw sang piesta amo ang pinasahi nga mga adlaw sang pagpahuway.

40Sa sina nga adlaw magkuha kamo sang pinakamaayo nga mga bunga sang inyo mga kakahuyan, magkuha kamo sang mga paklang sang mga palma kag mga sanga sang madabong nga mga kahoy, kag sauloga ninyo ang piesta para sa akon sa pagpasidungog sa akon nga inyo Dios.

41Sauloga ninyo ini sa sulod sang pito ka adlaw. Ini nga pagsulondan kinahanglan tumanon sang inyo mga kaliwat sa tanan nga panahon nga palaabuton.

42Ang tanan nga mga tawo sang Israel magaestar sa mga palasilungan sa sulod sang pito ka adlaw,

43agod ang inyo mga kaliwat makahibalo nga ako nagpaestar sang mga tawo sang Israel sa mga palasilungan sang pagpagwa ko sa ila sa Ehipto. Ako amo ang Ginoo nga inyo Dios.”

44Gani sa sini nga paagi ginhatag ni Moises sa mga tawo sang Israel ang mga pagsulondan sa pagsaulog sang mga piesta para sa pagpasidungog sa Ginoo.

← Chapter 22 Jump to: Chapter 24 →