Leviticus 12

Ilonggo (Maayong Balita nga Biblia (2012))

← Chapter 11 Jump to: Chapter 13 →

1Ang Ginoo naghatag kay Moises sining masunod nga mga pagsulondan:

2“Ihambal sa mga katawhan sang Israel nga sa sulod sang pito ka adlaw sa tapos ang isa ka babayi makabata sing isa ka lalaki, mangindi-matinlo sia kasubong sang tion nga yara ang iya pamulanon.

3Sa ikawalo nga adlaw, ang bata pagatulion.

4Dayon kinahanglan pa ang dugang nga trayntay tres ka adlaw kag manginmatinlo sia sa nagapanggwa sa iya nga dugo. Kinahanglan indi sia magtandog sang bisan ano nga butang nga balaan ukon magsulod sa balaan nga Tolda tubtob matapos ang iya pagpaninlo.

5“Sa sulod sang katorse ka adlaw, ang babayi nga makabata sing babayi mangindi-matinlo subong sang tion nga yara ang iya pamulanon. Dayon kinahanglan pa ang dugang nga sesentay sais ka adlaw tubtob nga manginmatinlo sia sa nagapanggwa sa iya nga dugo.

6“Kon tapos na ang panahon sang iya pagpaninlo, bisan ang iya bata lalaki man ukon babayi, magadala sia sa pari sa pwertahan sang Tolda sang akon presensya sing isa ka tuig nga kordero para sa halad nga sinunog kag isa ka tukmo ukon pating para sa halad tungod sa sala.

7Ang pari magadulot sang iya halad sa akon kag magahimo sang tulomanon sa pagkuha sang iya pagkadi-matinlo, kag manginmatinlo sia. Gani, amo ini ang pagahimuon sang isa ka babayi sa tapos sia makapanganak.

8“Kon ang babayi indi makasarang sa paghalad sang isa ka kordero, magadala sia sing duha ka mga pating ukon duha ka mga tukmo, ang isa para sa halad nga sinunog kag ang isa para sa halad tungod sa sala, kag ang pari magahimo sang tulomanon sa pagkuha sang iya pagkadi-matinlo, kag manginmatinlo sia.”

← Chapter 11 Jump to: Chapter 13 →