Leviticus 3

Ilonggo (Maayong Balita nga Biblia (2012))

← Chapter 2 Jump to: Chapter 4 →

1“Ang bisan sin-o nga magdulot sang isa sang iya mga baka subong isa ka halad sa paghiambit, kinahanglan isa ini ka toro nga baka ukon isa ka bakiya nga wala sing bisan ano nga depekto.

2Itungtong niya ang iya kamot sa ulo sang sapat kag ihawon ini sa pwertahan sang Tolda sang akon presensya. Ang mga pari nga kaliwat ni Aaron magawisik sang dugo sa apat ka mga kilid sang altar

3kag magahalad sang masunod nga mga bahin sang sapat subong isa ka halad nga kalan-on sa akon: ang tanan nga sapay nga yara sa kasudlan,

4ang mga batubato kag ang sapay nga yara sa sini, kag ang labing maayo nga bahin sang atay.

5Ang mga pari magasunog sini tanan sa altar upod sa mga halad nga sinunog. Ang kahamot sining halad nga kalan-on manginkahalamut-an sa akon, ang Ginoo.

6“Kon ang isa ka karnero ukon kanding gamiton subong isa ka halad sa paghiambit, ayhan isa ini ka lalaki ukon babayi, pero kinahanglan wala ini sing bisan ano nga depekto.

7Kon ang isa ka tawo maghalad sing karnero,

8itungtong niya ang iya kamot sa ulo sini kag iya ihawon ini sa atubangan sang Tolda. Ang mga pari magawisik sang dugo sini sa apat ka mga kilid sang altar,

9kag magahalad sa akon sang masunod nga mga bahin sang sapat subong isa ka halad nga kalan-on: ang sapay, ang bug-os nga ikog nga matambok nga gin-utod sing suop, ang tanan nga sapay nga nagaputos sang mga kasudlan,

10ang mga batubato kag ang tambok nga yara sa ila, kag ang labing maayo nga bahin sang atay.

11Ang pari nga nagaalagad magasunog sini tanan sa altar subong isa ka halad nga kalan-on sa akon, ang Ginoo.

12“Kon ang isa ka tawo maghalad sing kanding,

13itungtong niya ang iya kamot sa ulo sini kag iya ihawon ini sa atubangan sang Tolda. Ang mga pari magawisik sang dugo sini sa apat ka mga kilid sang altar

14kag magahalad sa akon sang masunod nga mga bahin subong isa ka halad nga kalan-on: ang tanan nga sapay nga yara sa mga kasudlan,

15ang mga batubato kag ang sapay nga yara sa sini, kag ang labing maayo nga bahin sang atay.

16Ang pari magasunog sini tanan sa altar subong isa ka halad nga kalan-on nga magapahamuot sa akon. Ang tanan nga sapay akon.

17Wala sing Israelinhon nga magkaon sing sapay ukon dugo, amo ini ang isa ka pagsulondan nga pagatumanon sa walay katapusan sang tanan nga mga Israelinhon, bisan diin sila nagaestar.”

← Chapter 2 Jump to: Chapter 4 →