Leviticus 24

Ilonggo (Maayong Balita nga Biblia (2012))

← Chapter 23 Jump to: Chapter 25 →

1Ginsingganan sang Ginoo si Moises:

2“Sugoa ang mga tawo sang Israel sa pagdala sang puraw nga lana sang olivo nga labing maayo nga sahi para sa mga suga sa Tolda sang akon presensya, agod ang suga magpadayon sa pagsiga.

3Sa tagsa ka gab-i, sindihan ini ni Aaron kag pasigahon tubtob mag-aga, didto sa akon presensya sa gwa sang kurtina sa atubangan sang Kaban sang Kasugtanan, nga amo ang Labing Balaan nga Duog. Ini nga pagsulondan pagatumanon ninyo sa tanan nga panahon nga palaabuton.

4Si Aaron magatatap sang mga suga nga yara sa kandelirohan nga puraw nga bulawan kag pat-uron gid nga nagapadayon ang pagsiga sini sa akon atubang.

5“Magkuha ka sing baynte kwatro ka libra sang pinili nga harina kag magluto sing dose ka bilog nga tinapay.

6Ipahamtang ang mga binilog sang tinapay sa duha ka idas, tig-anom sa tagsa ka idas, sa ibabaw sang lamisa nga nahaklapan sing puraw nga bulawan nga yara sa akon presensya.

7Butangi sing puraw nga insyenso ang tagsa ka idas, subong nga handumanan sang halad nga kalan-on sa akon paagi sa kalayo nga sa pagkuha sang lugar sang tinapay.

8Kinahanglan ipahamtang ang tinapay sa akon atubang sa tagsa ka Adlaw nga Inugpahuway para sa tanan nga panahon nga palaabuton. Amo ini ang walay katapusan nga katungdanan sang Israel.

9Ang tinapay iya ni Aaron kag sang iya mga kaliwat, kag pagakaunon nila ini sa isa ka balaan nga duog, tungod kay tama ini ka balaan nga bahin sang halad nga kalan-on paagi sa kalayo nga nahalad sa akon para sa mga pari.”

10May isa ka tawo nga ang iya amay isa ka Ehiptohanon kag ang iya iloy isa ka Israelinhon. Ang ngalan sang iya iloy amo si Selomit, ang anak nga babayi ni Dibri halin sa tribo ni Dan. Ini nga tawo ato didto sa kampo kag nagpakig-away sa isa ka Israelinhon. Samtang nagaaway sila, ginpakamalaut sang amo nga tawo ang Ginoo, gani gindala nila sia kay Moises,

12ginpagwardyahan, kag naghulat sila sang sugo sang Ginoo kon ano ang ila pagahimuon sa iya.

13Dayon ang Ginoo nagsiling kay Moises:

14“Dalha ina nga tawo sa gwa sang kampo. Ang tagsatagsa nga nakabati sa iya nga nagapakamalaut magbutang sang ila mga kamot sa ulo sang tawo sa pagpamatuod nga nakasala sia, kag dayon batuhon sia sang bug-os nga katilingban tubtob mapatay sia.

15Dayon singgana ang mga tawo sang Israel nga ang bisan sin-o nga magpakamalaut sa akon dapat mag-antos sang silot

16kag pagapatyon. Ang bisan sin-o nga Israelinhon ukon dumoluong nga nagaestar sa Israel nga magpakamalaut sa akon pagabatuhon sang bug-os nga katilingban tubtob mapatay.

17“Ang bisan sin-o nga nakapatay sing tawo pagapatyon,

18kag ang bisan sin-o nga nakapatay sing isa ka sapat nga iya sang iban nga tawo dapat mag-ilis sini. Ang kasugoan amo nga ang kabuhi pagabayaran sing kabuhi.

19“Ang bisan sin-o nga makasakit sang isa ka tawo, pagahimuon man sa iya ang bisan ano nga iya nahimo.

20Kon nakabali sia sing tul-an pagabalion man ang isa sang iya mga tul-an, kon nakalukat sia sang isa ka mata, pagalukaton man ang isa niya ka mata, kon nakabingaw sia sang isa ka ngipon, pagabingawon man ang isa niya ka ngipon. Kon ano nga halit ang iya nahimo sa iban nga tawo, amo man ang ibalos sa iya.

21Ang bisan sin-o nga makapatay sing sapat, magailis sini, pero ang bisan sin-o nga makapatay sing tawo pagapatyon man.

22Ini nga kasugoan para gid sa inyo tanan, sa mga Israelinhon kag sa mga dumoluong nga nagaestar sa tunga ninyo, tungod kay ako amo ang Ginoo nga inyo Dios.”

23Sang makasiling sini si Moises sa mga tawo sang Israel, gindala nila ang tawo sa gwa sang kampo kag ginbato sia tubtob mapatay. Sa sini nga paagi ang mga tawo sang Israel nagtuman sang ginmando sang Ginoo kay Moises.

← Chapter 23 Jump to: Chapter 25 →