2 Kings 13

Ilonggo (Ang Biblia (1982))

← Chapter 12 Jump to: Chapter 14 →

1Sa ikaduha ka pulo kag tatlo nga tuig ni Joas nga anak ni Ocozias, hari sang Juda, nagsugud sa paghari si Joacas nga anak ni Jehu sa Israel sa Samaria, kag naghari sia sing napulog pito ka tuig.

2Ginhimo niya ang malaut sa itololok sang Ginoo, kag nagsonod sa mga sala ni Jeroboam nga anak ni Nabat, nga sa ila ginpapakasala niya ang Israel; wala sia magtaliwan gikan sa ila.

3Kag ang kaakig sang Ginoo nagsingkal batok sa Israel, kag gintugyan niya sila sing dayon sa kamut ni Hazael nga hari sang Siria kag sa kamut ni Ben-hadad nga anak ni Hazael.

4Niyan si Joacas nagpakilooy sa Ginoo, kag ang Ginoo nagpamati sa iya; kay nakita niya ang pagpigus sang Israel, kon paano nga ginpigus sila sang hari sang Siria.

5(Busa ang Ginoo naghatag sing manluluwas sa Israel, sa bagay nga naluwas sila sa idalum sang kamut sang mga Sirianhon; kag ang katawohan sang Israel nagpuyo sa ila mga layanglayang subong sang una nga tion.

6Walay sapayan wala sila magtaliwan sa mga sala sang panimalay ni Jeroboam, nga sa ila ginpapakasala niya ang Israel, kondi naglakat sa ila; kag nagpabilin ang Ashera man sa Samaria.)

7Kay wala sia sing ginbilin nga mga tawo kay Joacas kondi kalim-an ka manugkabayo kag napulo ka kangga kag napulo ka libo ka tawo nga manuglakat; kay ang hari sang Siria naglaglag sa ila kag naghimo sa ila kaangay sang yab-ok sa paglinas.

8Karon ang nabilin sang mga binuhatan ni Joacas kag ang tanan nga ginhimo niya, kag ang iya gahum, wala bala sila masulat sa Tolon-an sang mga Maragtas sang mga Hari sang Israel?

9Gani si Joacas nagtolog upud sa iya mga ginikanan, kag ginlubung nila sia sa Samaria; kag naghari sa tal-us niya si Joas nga iya anak nga lalaki.

10Sa ikakatloan kag pito nga tuig ni Joas nga hari sang Juda nagsugud sa paghari si Jehoas nga anak ni Joacas sa Israel sa Samaria, kag naghari sing napulog anum ka tuig.

11Ginhimo man niya ang malaut sa itololok sang Ginoo; wala sia magbiya sa tanan nga sala ni Jeroboam nga anak ni Nabat, nga sa ila ginpapakasala niya ang Israel, kondi naglakat sia sa ila.

12Karon ang nabilin sang mga binuhatan ni Joas, kag ang tanan nga ginhimo niya, kag ang iya kagamhanan nga ginpakig-away niya kay Amasias nga hari sang Juda, wala bala sila masulat sa Tolon-an sang mga Maragtas sang mga Hari sang Israel?

13Gani si Joas nagtolog upud sa iya mga ginikanan, kag naglingkod si Jeroboam sa iya trono; kag si Joas ginlubung sa Samaria upud sa mga hari sang Israel.

14Karon si Eliseo nagmasakit sa iya balatian nga iya kinamatay, kag nagdulhog sa iya si Joas nga hari sang Israel, kag naghibi sa iya, kag nagsiling, “Amay ko, amay ko! Ang mga kangga sang Israel kag iya mga manugkabayo!”

15Kag nagsiling sa iya si Eliseo, “Kuha ka sing pana kag mga baslay”; gani nagdala sia sa iya sing pana kag mga baslay.

16Niyan si Eliseo nagsiling sa hari sang Israel, “Ibutang ang imo kamut sa pana”; kag ginbutang niya ang iya kamut. Kag ginbutang ni Eliseo ang iya mga kamut sa ibabaw sang mga kamut sang hari.

17Kag nagsiling sia, “Buksi ang talambuan nayon sa sidlangan”; kag ginbuksan niya ini. Niyan si Eliseo nagsiling, “Pana ka”; kag nagpana sia. Kag nagsiling si Eliseo, “Baslay sang Ginoo sang pagdaug, bisan ang baslay sang pagdaug sa Siria! Kay daugon mo ang mga Sirianhon sa Afec tubtub nga mapapas mo sila.”

18Kag nagsiling sia, “Kuhaa ang mga baslay”; kag ginkuha niya sila. Kag nagsiling sia sa hari sang Israel, “Ibuno sa duta”; kag ginbuno niya sing makatlo, kag nag-untat.

19Niyan ang tawo sang Dios nagsingkal sa iya, kag nagsiling, “Dapat mo kuntani ginbuno sing makalima ukon makan-um; niyan madaug mo kuntani ang Siria tubtub nga mapapas sia, apang karon daugon mo sa makatlo lamang ang Siria.”

20Gani napatay si Eliseo, kag ginlubung sia nila. Karon ang mga kabon sang mga Moabnon naggubat sang duta sa pagsugud sang tuig.

21Kag sang nagalubung sila sing tawo, yari karon, nakakita sila sing kabon kag ginbolhog nila ang tawo sa lulubngan ni Eliseo; kag sa gilayon nga nakatandug ang tawo sang mga tul-an ni Eliseo, naumpawan sia, kag nagtindug sa iya mga tiil.

22Karon si Hazael nga hari sang Siria nagpigus sang Israel sa bug-os nga mga adlaw ni Joacas.

23Apang ang Ginoo nagmaayohon sa ila kag nalooy sa ila, kag nagtamud sa ila, bangud sang iya katipan kay Abraham, kay Isaac, kag kay Jacob, kag indi buut maglaglag sa ila; ukon magsikway sia sa ila gikan sa atubangan niya tubtub karon.

24Sang napatay si Hazael nga hari sang Siria, naghari nga tal-us niya si Ben-hadad nga iya anak.

25Niyan si Jehoas nga anak ni Joacas nagbawi gikan sa kamut ni Ben-hadad nga anak ni Hazael sang kabanwaanan nga gin-agaw niya sa kamut ni Joacas nga iya amay tungud sa inaway. Makatlo sia daugon ni Joas kag mabawi ang mga kabanwaanan sang Israel.

← Chapter 12 Jump to: Chapter 14 →