2 Kings 18

Ilonggo (Ang Biblia (1982))

← Chapter 17 Jump to: Chapter 19 →

1Sa ikatlong tuig ni Oseas nga anak ni Ela, nga hari sang Israel, nagsugud sa paghari si Ezequias nga anak ni Acaz, nga hari sang Juda.

2Nagsugud sia sa paghari sang sia duha ka pulo kag lima ka tuig, kag naghari sia sing duha ka pulo kag siam ka tuig sa Jerusalem. Ang ngalan sang iya iloy si Abi nga anak ni Zacarias.

3Kag ginhimo niya ang matarung sa mga mata sang Ginoo, sono sa tanan nga nahimo ni David nga iya amay.

4Ginkuha niya ang mataas nga mga duug, kag ginboong ang mga haligi, kag gin-utud ang mga Ashera. Kag gindugmok ang man-ug nga saway nga ginhimo ni Moises, kay tubtub sadtong mga adlaw nagsonog sa sini sing incienso ang katawohan sang Israel; ini gintawag niya nga Nehustan.

5Sia nagsalig sa Ginoo ang Dios sang Israel; sa bagay nga sa olihi niya walay kaangay sa iya sa tunga sang tanan nga hari sang Juda, ukon sa tunga sang mga nahauna sa iya.

6Kay nagtapik sia sa Ginoo; wala sia magbiya sa pagsonod sa iya, kondi ginbantayan niya ang mga sogo nga ginsogo sang Ginoo kay Moises.

7Kag ang Ginoo kaupud niya; bisan diin sia magkadto, nag-uswag sia. Nagribuk sia batok sa hari sang Asiria, kag wala mag-alagad sa iya.

8Gindaug niya ang mga Filistinhon tubtub sa Gasa kag sa iya mga ginsakpan, kutub sa torre sang mga manugbantay tubtub sa banwa nga napamakuran.

9Sa ikap-at nga tuig ni Hari Ezequias, nga amo ang ikapitong tuig ni Oseas nga anak ni Ela nga hari sang Israel, nagtaklad si Salmanasar nga hari sang Asiria batok sa Samaria kag ginkibon ini

10kag naagaw nila ini sa katapusan sang tatlo ka tuig. Sa ikan-um nga tuig ni Ezequias, nga amo ang ikasiam nga tuig ni Oseas nga hari sang Israel, naagaw ang Samaria.

11Ang hari sang Asiria nagtapok sang Israel pa Asiria, kag nagbutang sa ila sa Halah, kag sa Habor, ang suba sang Gozan, kag sa kabanwaanan sang mga Mediahanon,

12bangud nga wala sila magtuman sang tingug sang Ginoo nga ila Dios kondi ginlapas ang iya katipan, bisan ang tanan nga ginsogo ni Moises nga alagad sang Ginoo; wala magpamati sini ukon maghimo sini.

13Sa ikanapulog apat nga tuig ni Hari Ezequias nagtaklad si Senaquerib nga hari sang Asiria batok sa tanan nga kabanwaanan nga napamakuran sa Juda kag gin-agaw sila.

14Kag si Ezequias nga hari sang Juda nagpadala sa hari sang Asiria sa Laquis, nga nagasiling, “Ako nakasala; halin sa akon; ang igabutang mo sa akon batason ko.” Kag ang hari sang Asiria nagkinahanglan kay Ezequias nga hari sang Juda sing tatlo ka gatus ka talanton nga pilak kag katloan ka talanton nga bulawan.

15Kag ginhatag ni Ezequias sa iya ang tanan nga pilak nga nakita sa balay sang Ginoo, kag sa mga bahandi sang balay sang hari.

16Sa sadtong tion ginkakas ni Ezequias ang bulawan sa mga ganhaan sang templo sang Ginoo, kag sa mga haligi nga gintaklapan sing bulawan ni Ezequias nga hari sang Juda kag ginhatag ini sa hari sang Asiria.

17Kag ang hari sang Asiria nagpadala kay Tartan, kay Rab-saris, kag kay Rabsaces upud sang isa ka dakung kasoldadosan kutub sa Laquis sa kay Hari Ezequias sa Jerusalem. Kag nagtaklad sila kag nag-abut sa Jerusalem. Sang nakataklad sila, nag-abut sila kag nagdolog sa luyo sang palatayonan sang punong nga naibabaw, nga yara sa luyo sang dalanon sang Latagon sang Manugbunak.

18Kag sang natawag nila ang hari, naggowa sa ila si Eliaquim nga anak ni Helcias, nga tulugyanan sang panimalay, kag si Sena nga escriba, kag si Joa nga anak ni Asaf, nga manugsulat sang maragtas.

19Kag si Rabsaces nagsiling sa ila, “Isiling ninyo karon kay Ezequias, ‘Amo ini ang ginasiling sang dakung hari, ang hari sang Asiria: Ano bala nga kalig-onan ang imo ginasaligan?

20Nagahunahuna ka nga ang mga polong laygay kag kusug lamang nga sa inaway! Karon sa kay sin-o ka bala nagasalig, nga nagbato ka sa akon?

21Yari karon, ikaw nagasalig sa sining sungkud nga tabon-ak nga basag, bisan sa Egipto, nga kon magpanukud sa iya ang isa ka tawo, magadulut sa iya kamut kag magalapus sini. Amo ini si Faraon nga hari sang Egipto sa tanan nga nagasalig sa iya.

22Apang kon magsiling ka sa akon, “Kami nagasalig sa Ginoo nga amon Dios” indi bala ini sia nga ang iya mataas nga mga duug kag mga halaran ginkuha ni Ezequias, nga nagasiling sa Juda kag sa Jerusalem, “Sa atubangan sining halaran magasimba kamo sa Jerusalem”?

23Kari karon, hatagi sing mga pasalig ang akon agalon nga hari sang Asiria: ako magahatag sa imo sing duha ka libo nga kabayo, kon ikaw makasarang sa imo bahin sa pagbutang sing mga manugsakay sa ila.

24Paano bala niyan ang pagpatalikud mo sang nawung sang isa ka pangolo sang labi ka kubus sang mga alagad sang akon agalon, kay nagasalig ka sa Egipto tungud sa mga kangga kag sa mga manugkabayo?

25Labut pa, nagtaklad bala ako nga wala ginaupdi sang Ginoo batok sining duug sa paglaglag sini? Ang Ginoo nagsiling sa akon, Taklad ka batok sining duta, kag laglaga ini.’”

26Niyan nagsiling si Eliaquim nga anak ni Helcias, kag si Sebna, kag si Joa, kay Rabsaces, “Ginaampo ko sa imo, pamolong ka sa imo mga alagad sa hambal nga Sirianhon, kay kami nakahangup sini; dili ka magpamolong sa amon sa hambal nga Jinudio sa mga idulungug sang katawohan nga yara sa ibabaw sang kuta.”

27Apang si Rabsaces nagsiling sa ila, “Ginpadala bala ako sang akon agalon sa imo agalon kag sa imo, sa pagpamolong sining mga polong, kag wala bala niya ako pag-ipadala sa mga tawo nga yara sa ibabaw sang kuta, nga natagudilian sa pagkaon sang ila kaugalingon nga tai kag sa pag-inum sang ila kaugalingon nga ihi upud sa inyo?”

28Niyan nagtindug si Rabsaces kag nagsinggit sa mabaskug nga tingug sa Jinudio: “Pamati kamo sang polong sang dakung hari, ang hari sang Asiria!

29Amo ini ang ginasiling sang hari: ‘Dili kamo magpadaya kay Ezequias, kay indi sia makasarang sa pagluwas sa inyo gikan sa akon kamut.

30Si Ezequias dili magpasalig sa inyo sa Ginoo nga nagasiling, Sa pagkamatuud luwason kita sang Ginoo, kag ining banwa indi pag-itugyan sa kamut sang hari sang Asiria.’

31Dili kamo magpamati kay Ezequias; kay amo ini ang ginasiling sang hari sang Asiria: ‘Pakighidait kamo sa akon kag gowa kamo pakari sa akon; niyan ang tagsatagsa magkaon gikan sa iya ulubasan, kag ang tagsatagsa sa iya higuera, kag ang tagsatagsa mag-inum sang mga tubig sang iya kaugalingon nga tanki;

32tubtub nga ako mag-abut kag magdala sa inyo sa duta nga kaangay sang inyo kaugalingon nga duta, duta sang uyas kag bag-ong alak, duta sang tinapay kag mga ulubasan, duta sang mga kahoy nga olivo kag dugus, agud nga magkabuhi kamo, kag indi mapatay. Kag dili kamo magpamati kay Ezequias kon sia magbuyok sa inyo nga nagasiling, Ang Ginoo magaluwas sa aton.

33Nakaluwas bala ang bisan sin-o sang mga dios sang mga pungsud sang iya duta gikan sa kamut sang hari sang Asiria?

34Diin na bala ang mga dios sang Hamat kag sang Arpad? Diin na bala ang mga dios sang Sefarvaim, Hena, kag Iva? Naluwas bala nila ang Samaria sa akon kamut?

35Sin-o bala sila sa tunga sang tanan nga dios sang mga duta nga nagluwas sang ila duta gikan sa akon kamut, agud nga ang Ginoo magluwas gikan sa akon kamut sang Jerusalem?’”

36Apang ang katawohan naghipus kag walay polong nga ginsabat sa iya, kay ang sogo sang hari nagasiling, “Dili pagsabta sia.”

37Niyan si Eliaquim nga anak ni Helcias, nga tulugyanan sang panimalay, kag si Sebna nga escriba, kag si Joa nga anak ni Asaf, nga manugsulat sang maragtas, nag-abut kay Ezequias nga nakusnit ang ila mga panapton, kag nagsugid sa iya sang mga polong ni Rabsaces.

← Chapter 17 Jump to: Chapter 19 →