2 Kings 5

Ilonggo (Ang Biblia (1982))

← Chapter 4 Jump to: Chapter 6 →

1Si Naaman, pangolo sang kasoldadosan sang hari sang Siria, daku nga lalaki sa atubangan sang iya agalon kag dungganon, bangud nga paagi sa iya ang Ginoo naghatag sing pagdaug sa Siria. Sia gamhanan man nga tawo nga isganan, apang sia aroon.

2Karon ang mga Sirianhon naggowa sa mga kinabon kag nakadala sing bihag gikan sa duta sang Israel nga isa ka diotay nga lin-ay, kag sia nag-alagad sa asawa ni Naaman.

3Nagsiling sia sa iya agalon nga babayi, “Kabay kuntani nga ang akon ginoo makaatubang sa manalagna nga yara sa Samaria! Ayohon niya sia sang iya aro.”

4Gani ang isa nagsulud kag nagsugid sa iya ginoo, “Amo ini kag amo ini ang ginsiling sang lin-ay nga gikan sa duta sang Israel.”

5Kag nagsiling ang hari sang Siria, “Lakat karon, kag ako magapadala sing sulat sa hari sang Israel.” Gani nagtaliwan sia, kag nagdala sia sing napulo ka talanton nga pilak, anum ka libo ka bilog nga bulawan, kag napulo ka ilislan nga panapton.

6Kag gindala niya ang sulat sa hari sang Israel, nga nagasiling, “Kon mag-abut sa imo ining sulat, mahibaloan mo nga napadala ko sa imo ang akon alagad nga si Naaman, agud nga ayohon mo sia sang iya aro.”

7Kag sang nabasa sang hari sang Israel ang sulat, ginkusnit niya ang iya mga panapton kag nagsiling, “Dios bala ako, sa pagpatay kag sa pagbuhi, nga ining tawo nagapadala sa akon sa pag-ayo sing isa ka tawo sang iya aro? Lamang talupangda, kag tan-awa kon paano nga nagapangita sia sing kaawayon batok sa akon.”

8Apang sang nabatian ni Eliseo nga tawo sang Dios nga ginkusnit sang hari sang Israel ang iya mga panapton, nagpadala sia sa hari, nga nagasiling, “Ngaa bala nga ginkusnit mo ang imo mga panapton? Pakari-a sia karon sa akon, agud nga mahibaloan niya nga may manalagna sa Israel.”

9Gani nag-abut si Naaman upud ang iya mga kabayo kag mga kangga, kag nagdolog sia sa ganhaan sang balay ni Eliseo.

10Kag si Eliseo nagpadala sing manugbalita sa iya, nga nagasiling, “Kadto kag magpanghugas sing makapito sa Jordan, kag ang imo unud mauli sa imo, kag manginmatinlo ka.”

11Apang si Naaman nagsingkal, kag naghalin, nga nagasiling, “Yari karon, naghunahuna ako nga gowaon niya ako nga gayud, kag magtindug, kag magtawag sa ngalan sang Ginoo nga iya Dios, kag magpayasyas sang iya kamut sa bahin, kag ayohon ang aroon.

12Indi bala ang Abana kag ang Farfar, ang mga suba sang Damasco, maayo pa sang tanan nga tubig sang Israel? Indi bala ako makapanghugas sa ila, kag magmatinlo?” Gani nagtalikod sia kag naglakat sa kaalipungut.

13Apang ang iya mga alagad nagpalapit kag nagpamolong sa iya, “Amay ko, kon ang manalagna nagpangabay sa imo sa paghimo sing dakung butang, indi ka bala buut maghimo sini? Daw ano pa niyan, sang nagasiling sia sa imo, ‘Panghugas, kag magmatinlo?’”

14Gani naglusong sia kag naglumoy sing makapito sa Jordan, sono sa pinamolong sang tawo sang Dios; kag ang iya unud nag-uli kaangay sa unud sang diotay nga bata, kag nagtinlo sia.

15Niyan nagbalik sia sa tawo sang Dios, sia kag ang bug-os niyang kaupdanan, kag nag-abut kag nagtindug sa atubangan niya; kag sia nagsiling, “Yari karon, ginakilala ko nga walay Dios sa bug-os nga duta kondi sa Israel; gani karon magbaton ka sing dolot sa imo alagad.”

16Apang nagsiling sia, “Sa nagakabuhi ang Ginoo, nga sa atubangan niya nagatindug ako, indi ako magbaton sing bisan ano.” Kag ginpilit niya sia sa pagbaton sini, apang nagdumili sia.

17Niyan si Naaman nagsiling, “Kon indi, ginaampo ko sa imo, hatagi ang imo alagad sing duta nga malulan sang duha ka mula; kay kutub karon ang imo alagad indi na magdolot sing halad-nga-sinonog ukon halad sa iban nga mga dios kondi sa Ginoo.

18Sa sining butang magpatawad ang Ginoo sa imo alagad: kon ang akon agalon magsulud sa balay ni Rimon sa pagsimba didto, kag maghamboy sia sa akon kamut, kag ako magyaub sa balay ni Rimon, kon magyaub ako sa balay ni Rimon, ang Ginoo magpatawad sang imo alagad sa sining butang.”

19Nagsiling sia sa iya, “Lakat ka sa paghidait.” Apang sang nagtaliwan si Naaman gikan sa iya sa uluunhan,

20si Giezi, ang alagad ni Eliseo nga tawo sang Dios, nagsiling, “Yari karon, ang akon agalon nagpasaylo sining Naaman nga Sirianhon, sa indi pagbaton sa iya kamut sang gindala niya. Sa nagakabuhi ang Ginoo, magalagas ako sa iya, kag magkuha sing bisan ano gikan sa iya.”

21Gani si Giezi nagsonod kay Naaman. Kag sang nakita ni Naaman ang isa nga nagadalagan sa olihi niya, nagpanaug sia sa kangga sa pagsugata sa iya, kag nagsiling, “Maayo bala ang tanan?”

22Kag nagsiling sia, “Maayo ang tanan. Ang akon agalon nagpadala sa akon sa pagsiling, ‘May nag-abut sa akon karon gid gikan sa kabakoloran sang Efraim ang duha ka pamatan-on nga lalaki sa mga anak sang mga manalagna; ginaampo ko sa imo, hatagi sila sing isa ka talanton nga pilak kag duha ka ilislan nga panapton.’”

23Kag si Naaman nagsiling, “Magmahamuut ka sa pagbaton sing duha ka talanton.” Kag ginpilit niya sia, kag ginputus ang duha ka talanton nga pilak sa duha ka puyo, pati sang duha ka ilislan nga panapton, kag ginpapas-an sila sa duha sang iya mga alagad; kag gindala nila sila sa una ni Giezi.

24Kag sang nag-abut sia sa bakolod, ginkuha niya sila sa kamut nila, kag gintago sila sa balay; kay ginpalakat niya ang mga tawo, kag nagtaliwan sila.

25Nagsulud sia, kag nagtindug sa atubangan sang iya agalon, kag si Eliseo nagsiling sa iya, “Diin ka bala maghalin, Giezi?” Kag nagsiling sia, “Ang imo alagad wala magkadto sa bisan diin.”

26Apang nagsiling sia sa iya, “Wala bala mag-upud ang akon tagiposoon sa imo sang nagbalik ang tawo gikan sa iya kangga sa pagsugata sa imo? Tion bala ini sa pagbaton sing cuarta kag sa pagbaton sing mga panapton, mga katamnan sang olivo kag mga ulubasan, mga carnero kag mga baka, mga alagad nga lalaki kag mga alagad nga babayi?

27Busa ang aro ni Naaman magatapik sa imo, kag sa imo mga kaliwatan sa gihapon.” Gani si Giezi naggowa gikan sa atubangan niya nga aroon, nga maputi subong sang nieve.

← Chapter 4 Jump to: Chapter 6 →