2 Kings 25

Ilonggo (Ang Biblia (1982))

← Chapter 24 Jump to:

1Kag sa ikasiam nga tuig sang iya paghari, sa bulan nga ikapulo, sa ikapulo nga adlaw sang bulan, si Nabucodonosor nga hari sang Babilonia nag-abut upud sang bug-os niyang kasoldadosan batok sa Jerusalem, kag nagpahamtang sing dologan batok sa iya; kag nagpatindug sila batok sa iya sing mga pamakud palibut.

2Gani ang banwa nakibon tubtub sa ikanapulog isa nga tuig ni Hari Sedequias.

3Sa ikasiam nga adlaw sang ikap-at nga bulan ang tiggulutum tama gid sa banwa, sa bagay nga wala na sing kalan-on sa katawohan sang duta.

4Niyan nahimo ang isa ka bulwang sa banwa; nagpalagyo sa kagab-ihon ang tanan nga hangaway sa dalan sang gawang sa ulut sang duha ka kuta, nga yara sa luyo sang katamnan sang hari, bisan ang mga Caldeanhon batok sa banwa sa palibut. Kag ang hari naglakat paagi sa dalanon sang Araba.

5Apang ang hangaway sang mga Caldeanhon naglagas sa hari, kag nalambut sia sa mga kapatagan sang Jerico; kag nag-alaplaag gikan sa iya ang bug-os niyang hangaway.

6Niyan gindakup nila ang hari, kag ginpataklad sia pakadto sa hari sang Babilonia sa Ribla, kag ginhukman nila sia.

7Ginpatay nila ang mga lalaking anak ni Sedequias sa atubangan sang iya mga mata, kag ginlukat ang mga mata ni Sedequias, kag gingapus sia sa mga grilyos, kag gindala sia sa Babilonia.

8Sa ikalimang bulan, sa ikapitong adlaw sang bulan—nga amo ang ikanapulog siam nga tuig ni Nabucodonosor, hari sang Babilonia—nag-abut sa Jerusalem si Nabuzaradan, nga pangolo sang bantay, nga alagad sang hari sang Babilonia.

9Kag ginsonog niya ang balay sang Ginoo, kag ang balay sang hari kag ang tanan nga balay sang Jerusalem; ang tagsa ka dakung balay ginsonog niya sa kalayo.

10Kag ang bug-os nga hangaway sang mga Caldeanhon, nga upud sa pangolo sang bantay, naglumpag sang mga kuta sang Jerusalem palibut.

11Kag ang nabilin sang katawohan nga yadto sa banwa kag ang mga nagsaylo nga nagsaylo sa hari sang Babilonia, kag ang nabilin sang kadam-an, gindala nga bihag ni Nabuzaradan nga pangolo sang bantay.

12Apang ang pangolo sang bantay nagbilin sang labi ka imol sang duta nga mga manginmanug-uvas kag mga manugpanguma.

13Kag ang mga haligi nga saway nga yadto sa balay sang Ginoo, kag ang mga tulungtungan kag ang dagat nga saway nga yadto sa balay sang Ginoo, gindugmok sang mga Caldeanhon, kag gindala nila ang saway sa Babilonia.

14Kag ginkuha nila ang mga kaldero, kag ang mga pala, kag ang mga inugsugi, kag ang mga cuchara kag ang tanan nga gamit nga saway nga sa ila nagpanghikot sila,

15ang mga balagahan, kag ang mga planggana. Ina nga mga sa bulawan sa bulawan, kag ina nga mga sa pilak sa pilak, ginkuha sang pangolo sang bantay.

16Ang duha ka haligi, ang isa ka dagat, kag ang mga tulungtungan, nga ginhimo ni Salomon nga sa balay sang Ginoo, ang saway sini tanan nga gamit indi matimbang.

17Ang kataason sang isa ka haligi napulog walo ka maniko, kag ang oloolo nga saway sa ibabaw sini; ang kataason sang oloolo tatlo ka maniko; may pinuna kag mga granada sa oloolo palibut, ang tanan saway. Kag kaangay sini sa ila ang ikaduhang haligi, may pinuna.

18Kag ginkuha sang pangolo sang bantay si Seraya nga puno nga sacerdote, kag si Sofonias nga ikaduhang sacerdote, kag ang tatlo ka bantay sang atangan;

19kag gikan sa banwa nagkuha sia sing isa ka pangolo nga ginpadumala sa mga hangaway, kag lima ka tawo sa ila nga nakakita sang nawung sang hari nga nakita sa banwa; kag sang escriba nga pangolo sang kasoldadosan nga nagtipon sang katawohan sang duta; kag kan-uman ka tawo sang katawohan sang duta nga nakita sa banwa.

20Kag si Nabuzaradan nga pangolo sang bantay nagkuha sa ila, kag nagdala sa ila sa hari sang Babilonia sa Ribla.

21Kag ang hari sang Babilonia nagpilas sa ila, kag nagpatay sa ila sa Ribla sa duta sang Hamat. Gani ang Juda gindala nga bihag gikan sa iya duta.

22Kag sa mga tawo nga nabilin sa duta sang Juda, nga ginbilin ni Nabucodonosor nga hari sang Babilonia, ginhimo niya nga pangolo-puud si Gedelias nga anak ni Ahicam, ang anak ni Safan.

23Karon sang nakabati ang tanan nga pangolo sang mga kasoldadosan kag ang ila mga tawo nga ginhimo sang hari sang Babilonia nga pangolo-puud si Gedelias, nagkadto sila kay Gedelias sa Mizpa, bisan si Ismael nga lalaking anak ni Netanias, kag si Johanan nga lalaking anak ni Carea, kag si Seraya nga lalaking anak ni Tanhumet nga Netofanhon, kag si Jazanias nga lalaking anak sang Maacatnon, sila kag ang ila mga tawo.

24Kag si Gedelias nagsumpa sa ila kag sa ila mga tawo, kag nagsiling sa ila, “Dili kamo magkahadluk bangud sang mga alagad sang mga Caldeanhon; puyo kamo sa duta, kag mag-alagad sa hari sang Babilonia, kag magmaayo sa inyo.”

25Apang sa ikapitong bulan, nag-abut si Ismael nga anak ni Netanias, ang anak ni Elisama, sa panimalay nga harianon, kag ang napulo ka lalaki upud sa iya, kag ginpilas si Gedelias sa bagay nga napatay sia kag ang mga Judio kag ang mga Caldeanhon nga nag-upud sa iya sa Mizpa.

26Niyan ang bug-os nga katawohan, magagmay kag dalagku, kag ang mga pangolo sang mga kasoldadosan nagtindug, kag nagkadto sa Egipto; kay nahadluk sila sa mga Caldeanhon.

27Kag sa ikakatloan kag pito nga tuig sang pagbihag kay Joaquin nga hari sang Juda, sa ikanapulog duha nga bulan, sa ikaduha ka pulo kag pito nga adlaw sang bulan, si Evil-merodac nga hari sang Babilonia, sa tuig nga nagsugud sia sa paghari, nagbayaw sang olo ni Joaquin nga hari sang Juda gikan sa bilanggoan;

28kag nagpamolong sia sing maayo sa iya, kag ginpahamtang ang iya trono sa ibabaw sang trono sang mga hari nga nag-upud sa iya sa Babilonia.

29Gani gin-ilisan ang iya panapton sa bilanggoan. Kag nagkaon si Joaquin sing dalayon sa latok sang hari sa tanan nga adlaw sang iya kabuhi;

30kag nahanungud sang iya inugkabuhi, may dalayon nga inugkabuhi nga ginhatag sa iya sang hari, sa adlawadlaw isa ka bahin, sa tanan nga mga adlaw sang iya kabuhi.

← Chapter 24 Jump to: