2 Kings 16

Ilonggo (Ang Biblia (1982))

← Chapter 15 Jump to: Chapter 17 →

1Sa ikanapulo kag pito nga tuig ni Peca nga anak ni Remalias, nagsugud sa paghari si Acaz nga anak ni Joatam nga hari sang Juda.

2Nagsugud sa paghari si Acaz sang duha ka pulo ka tuig sia, kag naghari sia sing napulo kag anum ka tuig sa Jerusalem. Kag wala sia maghimo sang matarung sa mga mata sang Ginoo nga iya Dios, kaangay kay David nga iya amay,

3apang naglakat sia sa dalanon sang mga hari sang Israel. Hoo, ginpaagi niya ang iya anak nga lalaki sa kalayo, sono sa mga kangil-aran sang mga pungsud nga ginsobol sang Ginoo gikan sa atubangan sang katawohan sang Israel.

4Kag sia naghalad kag nagsonog sing incienso sa mataas nga mga duug, kag sa ibabaw sang mga kabakoloran, kag sa idalum sang tagsa ka kahoy nga hilaw.

5Niyan si Resin nga hari sang Siria kag si Peca nga anak ni Remalias, nga hari sang Israel, nagtaklad sa pagpakig-away sa Jerusalem, kag ginkibon nila si Acaz apang indi makadaug sa iya.

6Sa sadto nga tion si Resin nga hari sang Siria nagbawi sang Elat tungud sa Siria, kag ginsobol ang mga Judio gikan sa Elat; kag ang mga Sirianhon nag-abut sa Elat, kag nagpuyo didto tubtub sini nga adlaw.

7Gani si Acaz nagpadala sing mga manugbalita kay Tiglat-peleser nga hari sang Asiria, nga nagasiling, “Ako imo alagad kag imo anak nga lalaki. Taklad ka, kag luwasa ako sa kamut sang hari sang Siria kag sa kamut sang hari sang Israel, nga nagtindug batok sa akon.”

8Si Acaz nagkuha sang pilak kag bulawan nga nakita sa balay sang Ginoo kag sa mga bahandi sang balay sang hari, kag nagpadala sini nga dolot sa hari sang Asiria.

9Kag ang hari sang Asiria nagpamati sa iya; nagtaklad ang hari sang Asiria batok sa Damasco, kag gin-agaw ini, kag gindala nga bihag ang katawohan sini sa Kir, kag ginpatay si Resin.

10Sang nagkadto si Hari Acaz sa Damasco sa pagsugata kay Tiglat-peleser nga hari sang Asiria, nakita niya ang halaran nga yadto sa Damasco. Kag ginpadala ni Hari Acaz kay Urias nga sacerdote ang dagway sang halaran, kag ang huwaran sini, sono sa tanan nga pagbuhat sini.

11Kag si Urias nga sacerdote nagpatindug sing halaran; sono sa tanan nga ginpadala ni Hari Acaz gikan sa Damasco amo ang ginhimo ni Urias nga sacerdote sa wala pa mag-abut si Hari Acaz gikan sa Damasco.

12Kag sang nag-abut ang hari gikan sa Damasco, nakita sang hari ang halaran. Niyan nagpalapit ang hari sa halaran, kag naghalad sa ibabaw sini,

13kag ginsonog niya ang iya halad-nga-sinonog kag ang iya halad-nga-kalan-on, kag gin-ula ang iya halad-nga-ilimnon, kag ginwisik ang dugo sang iya mga halad-sa-paghidait sa ibabaw sang halaran.

14Kag ang halaran nga saway nga yadto sa atubangan sang Ginoo ginhalin niya gikan sa atubangan sang balay, gikan sa ulut sang iya halaran kag sang balay sang Ginoo, kag ginbutang ini sa kilid sang iya halaran nayon sa aminhan.

15Kag si Hari Acaz nagsogo kay Urias nga sacerdote, nga nagsiling, “Sa ibabaw sang daku nga halaran sonoga ang halad-nga-sinonog sa kaagahon, kag ang halad-nga-kalan-on sa kahaponon, kag ang halad-nga-sinonog sang hari, kag ang iya halad-nga-kalan-on, pati ang halad-nga-sinonog sang bug-os nga katawohan sang duta, kag ang ila halad-nga-kalan-on, kag ang ila mga halad-nga-ilimnon; kag iwisik sa ibabaw sini ang bug-os nga dugo sang halad-nga-sinonog, kag ang bug-os nga dugo sang halad; apang ang halaran nga saway mangin-akon pamangkotan.”

16Amo ini ang ginhimo ni Urias nga sacerdote, sono sa tanan nga ginsogo sa iya ni Hari Acaz.

17Kag gingikas ni Hari Acaz ang mga cuadro sang mga tulungtungan, kag ginkuha ang batiya sa ibabaw nila, kag ginpapanaug ang dagat gikan sa ibabaw sang mga baka nga saway sa idalum sini, kag ginbutang ini sa ibabaw sang salog nga nabatohan.

18Kag ang naatupan nga alagyan nga sa adlaw nga inugpahuway nga ginhimo niya sa balay, kag ang alagyan sang hari pasulud ginliso niya pakadto sa balay sang Ginoo, bangud sang hari sang Asiria.

19Karon ang nabilin sang mga binuhatan ni Acaz nga ginhimo niya, wala bala sila masulat sa Tolon-an sang mga Maragtas sang mga Hari sang Juda?

20Kag si Acaz nagtolog upud sa iya mga ginikanan, kag ginlubung upud sa iya mga ginikanan sa banwa ni David; kag naghari nga tal-us niya si Ezequias nga iya anak.

← Chapter 15 Jump to: Chapter 17 →