2 Kings 3

Ilonggo (Ang Biblia (1982))

← Chapter 2 Jump to: Chapter 4 →

1Si Joram nga anak ni Acab nagsugud sa paghari sa Israel sa Samaria sa tuig nga ikanapulog walo ni Josafat nga hari sang Juda, kag naghari sing napulog duha ka tuig.

2Naghimo sia sang malaut sa itololok sang Ginoo, apang indi subong sang iya amay kag sang iya iloy, kay ginsikway niya ang obelisco ni Baal nga nahimo sang iya amay.

3Wala sing sapayan nagpabilin sia sa mga sala ni Jeroboam nga anak ni Nabat, diin ginpapakasala niya ang Israel; wala sia magbiya sa sini.

4Karon si Mesa nga hari sang Moab tag-iya sang mga carnero; kag nagbayad sia sa hari sang Israel sang bulbul sang isa ka gatus ka cordero, kag sang isa ka gatus ka libo ka carnero.

5Apang sang patay na si Acab, ang hari sang Moab nagribuk batok sa hari sang Israel.

6Gani si Hari Joram naggowa gikan sa Samaria sa sadto nga tion, kag nag-usisa sang bug-os nga Israel.

7Kag nagkadto sia kag nagpadala kay Josafat nga hari sang Juda, nga nagasiling, “Ang hari sang Moab nagribuk batok sa akon; magakadto ka bala upud sa akon sa pag-away batok sa Moab?” Kag sia nagsiling, “Magataklad ako; ako subong sa imo, ang akon katawohan subong sang imo katawohan, ang akon kabayo subong sang imo kabayo.”

8Niyan nagsiling sia, “Diin bala nga dalan magataklad kita?” Kag nagsabat sia, “Sa dalan sang kamingawan sang Edom.”

9Gani naglakat ang hari sang Israel kag ang hari sang Juda kag ang hari sang Edom. Kag naglibut sila sing pito ka adlaw nga lalakton, kag wala sing tubig sa kasoldadosan, ukon sa mga sapat nga nagsonod sa ila.

10Niyan ang hari sang Israel nagsiling, “Kailo! Gintawag sang Ginoo ini nga tatlo ka hari sing tingub sa pagtugyan sa ila sa kamut sang Moab.”

11Apang si Josafat nagsiling, “Wala bala diri sing manalagna sang Ginoo, agud nga makapamangkot kita sa Ginoo paagi sa iya?” Niyan ang isa sang mga alagad sang hari sa Israel nagsabat, “Yari diri si Eliseo nga anak ni Safat, nga nagbobo sing tubig sa mga kamut ni Elias.”

12Kag si Josafat nagsiling, “Ang polong sang Ginoo yara sa iya.” Gani nagdulhog sa iya ang hari sang Israel kag si Josafat kag ang hari sang Edom.

13Kag si Eliseo nagsiling sa hari sang Israel, “Ano bala ang akon labut sa imo? Kadto ka sa mga manalagna sang imo amay kag sa mga manalagna sang imo iloy.” Kag ang hari sang Israel nagsiling sa iya, “Indi; kay gintawag sang Ginoo ini nga tatlo ka hari sa pagtugyan sa ila sa kamut sang Moab.”

14Kag si Eliseo nagsiling, “Sa nagakabuhi ang Ginoo sang kasoldadosan, nga sa iya atubangan nagatindug ako, sa pagkamatuud kon wala ako nagahangad kay Josafat nga hari sang Juda, indi ako magtolok sa imo, ukon magpakigkita sa imo.

15Apang karon, dalhi ninyo ako sing manuglanton.” Kag sang nagkutingkuting ang manuglanton, ang kamut sang Ginoo nag-abut sa iya.

16Kag nagsiling sia, “Amo ini ang ginasiling sang Ginoo, ‘Hil-uba ini nga nalupyakan sing mga trensira.’

17Kay amo ini ang ginasiling sang Ginoo, ‘Indi kamo makakita sing hangin ukon makakita kamo sing ulan, apang yadto nga nalupyakan mapuno sing tubig, kag magainum kamo, kamo, kag ang inyo mga kahayupan, kag ang inyo kasapatan.’

18Ini butang nga mahapus lamang sa itololok sang Ginoo; itugyan man niya ang mga Moabnon sa inyo kamut,

19kag gubaton ninyo ang tagsa ka banwa nga napamakuran, kag ang tanan nga banwa nga pinili, kag magapulud sang tagsa ka maayo nga kahoy, kag magatampok sang tanan nga tuburan sang tubig, kag magasamad sang tagsa ka maayo nga duta sing mga bato.”

20Sa pagkaaga, sang mga tion sang pagdolot sang halad, yari karon, nag-abut ang tubig paagi sa Edom, kag ang duta nakapanan sing tubig.

21Karon sang nakabati ang tanan nga Moabnon nga ang mga hari nagtaklad sa pag-away batok sa ila, nagtipon sila sing tingub, ang tanan nga makasuklub sing hinganib, kag pa ibabaw, kag nagtindug sa dulunan.

22Kag nagbangon sila sing aga pa, kag nagsubang ang adlaw sa tubig, kag nakita sang mga Moabnon sa atubangan nila nga ang tubig mapula subong sang dugo.

23Kag nagsiling sila, “Dugo ini; ang mga hari nalaglag sa pagkamatuud, kag nag-inaway sila. Busa karon, Moab, sa inagaw!”

24Apang sang nag-abut sila sa dologan sang Israel, nagtindug ang mga Israelnon kag gindamhagan ang mga Moabnon, sa bagay nga nagpalagyo sila sa atubangan nila; kag nagsulud sila sa duta nga nagapamatay sang mga Moabnon.

25Kag ginlaglag nila ang kabanwaanan, kag ang tagsa ka tawo naghaboy sang iya bato sa tagsa ka maayo nga duta, kag ginhil-ob ini; kag gintampokan nila ang tanan nga tuburan sang tubig, kag ginpukan ang tanan nga maayo nga kahoy; tubtub nga sa Kirhareset ginbilin nila ang mga bato sini lamang, wala sing sapayan, ang mga manuglabyog naglikup sini kag naglaglag sini.

26Sang nakita sang hari sang Moab nga ang inaway matama sa iya, nagkuha sia upud sa iya sing pito ka gatus ka tawo nga naggabut sing espada, sa pagbulho pakadto sa hari sang Edom; apang indi sila makasarang.

27Niyan ginkuha niya ang iya anak nga lalaki nga kamagulangan nga dapat kuntani maghari nga tal-us niya, kag ginhalad sia nga halad-nga-sinonog sa ibabaw sang kuta. Kag may daku nga kasingkal batok sa Israel; kag nagbiya sila sa iya kag nagpauli sa ila kaugalingon nga duta.

← Chapter 2 Jump to: Chapter 4 →