Job 1

Ilonggo (Ang Biblia (1982))

Jump to: Chapter 2 →

1May isa ka tawo sa duta sang Uz, nga ginhingalanan Job; kag yadto nga tawo himpit kag matarung, isa nga mahadlukon sa Dios, kag nagalikaw sa malaut.

2Amay sia sang pito ka anak nga lalaki kag tatlo ka anak nga babayi.

3Ang iya pagkabutang man pito ka libo ka carnero, tatlo ka libo ka mga camelyo, lima ka gatus ka pares nga baka, kag lima ka gatus ka asno nga babayi, kag tama kadaku nga panimalay; sa bagay nga ini nga tawo amo ang labi gid ka daku sa tanan nga katawohan sang sidlangan.

4Ang iya mga anak nga lalaki nagkadto kag naghiwat sing sinalosalo sa balay sang tagsatagsa sa iya adlaw; kag ginpakadtoan nila kag ginpatawag ang ila tatlo ka utud nga babayi sa pagkaon kag pag-inum upud sa ila.

5Kag sang natapus na ang paglibud sang mga adlaw sang ila sinalosalo, si Job nagpadala kag nagpakabalaan sa ila, kag nagbangon sia sing aga pa kag nagdolot sing mga halad-nga-sinonog sono sa kadamuon nila tanan; kay si Job nagsiling, “Ayhan nakasala ang akon mga anak, kag nagpasipala sang Dios sa ila mga tagiposoon.” Amo ini ang ginhimo ni Job sing dalayon.

6Karon may adlaw sang nag-abut ang mga lalaking anak sang Dios sa pag-atubang sa Ginoo, kag si Satanas man nag-abut sa tunga nila.

7Ang Ginoo nagsiling kay Satanas, “Diin ka bala maghalin?” Nagsabat si Satanas sa Ginoo, “Gikan sa paglibutlibut sa duta, kag sa paglakatlakat sa sini.”

8Kag ang Ginoo nagsiling kay Satanas, “Natalupangdan mo bala ang akon alagad nga si Job, nga wala sing kaangay sa iya sa duta, tawo nga himpit kag matarung, nga mahadlukon sa Dios kag nagalikaw sa malaut?”

9Niyan nagsabat si Satanas sa Ginoo, “Nahadluk bala si Job sa Dios sa wala sing pulus?

10Wala mo bala sia pagkudali palibut kag sa iya balay kag sa tanan nga iya, sa tagsa ka luyo? Ginpakamaayo mo ang kinabudlayan sang iya mga kamut, kag ang iya pagkabutang nagdugang sa duta.

11Apang untaya karon ang imo kamut, kag tanduga ang tanan nga iya, kag sikwayon ka niya sa imo nawung.”

12Kag ang Ginoo nagsiling kay Satanas, “Yari karon, ang tanan nga iya yara sa imo gahum; lamang dili mo pag-untayon ang imo kamut sa iya kaugalingon.” Gani si Satanas naghalin sa atubangan sang Ginoo.

13Karon may adlaw sang nagakinaon kag nagaininum sing alak ang iya mga anak nga lalaki kag iya mga anak nga babayi sa balay sang ila utud nga lalaki nga kamagulangan;

14kag may nag-abut nga manugbalita kay Job, kag nagsiling, “Ginaarado ang mga baka kag ang mg asno nagahalab sa luyo nila;

15kag gindamhagan sang mga Sabeanhon kag gin-agaw sila, kag ginpatay nila ang mga alagad sa sulab sang espada; kag ako gid lamang ang nakapalagyo sa pagsugid sa imo.”

16Sang nagahambal pa sia, may nag-abut man nga isa, kag nagsiling, “Ang kalayo sang Dios naholog gikan sa langit kag nagsonog sang mga carnero kag sang mga alagad kag nagpapas sa ila; kag ako gid lamang ang nakapalagyo sa pagsugid sa imo.”

17Sang nagahambal pa sia, may nag-abut naman nga isa, kag nagsiling, “Ang mga Caldeanhon naghimo sing tatlo ka guban, kag nagdamhag sa mga camelyo kag nag-agaw sa ila, kag nagpatay sang mga alagad sa sulab sang espada; kag ako gid lamang ang nakapalagyo sa pagsugid sa imo.”

18Sang nagahambal pa sia, may nag-abut naman nga isa, kag nagsiling, “Ang imo mga anak nga lalaki kag ang imo mga anak nga babayi nagakinaon kag nagaininum sang alak sa balay sang ila lalaking utud nga kamagulangan;

19kag yari karon, may nag-abut nga isa ka mabaskug nga hangin gikan sa kamingawan, kag nagkuyup sang apat ka pamusud sang balay, kag nagtupa ini sa mga pamatan-on, kag napatay sila; kag ako gid lamang ang nakapalagyo sa pagsugid sa imo.”

20Niyan si Job nagtindug, kag nagkusnit sang iya kunup, kag nagkiskis sang iya olo, kag naghapa sa duta, kag nagsimba.

21Kag nagsiling sia, “Hubo ako nga naggowa sa tiyan sang akon iloy, kag hubo magabalik ako; ang Ginoo naghatag, kag ang Ginoo nagkuha; pakamaayohon ang ngalan sang Ginoo.”

22Sa sini tanan wala makasala si Job ukon nagpabangud sa Dios sing binuang.

Jump to: Chapter 2 →