Job 24

Ilonggo (Ang Biblia (1982))

← Chapter 23 Jump to: Chapter 25 →

1“Ngaa bala wala matipigi sang Makaako ang mga tion, kag ngaa bala nga sila nga nakakilala sa iya wala makakita sang iya mga adlaw?

2May yara nga nagahalin sang mga dulunan; nagakuha sila sing palugus sang mga panong kag ginapahalab sila.

3Ginatabog nila ang asno sang mga ilo; ginakuha nila ang inugpalig-on nga baka sang balong babayi.

4Ginapalipas nila sa dalan ang may kinawad-on; ang tanan nga imol sang duta nagapanago sila.

5Yari karon, subong sang mga asno nga talonon sa desierto nagakadto sila sa ila buluhaton, nga nagapangita sing tulukbon sa kamingawan subong nga kalan-on sa ila mga anak.

6Ginagalab nila ang ila kumpay sa latagon kag ginasaghaw nila ang patubas nga uvas sang malauton.

7Nagahigda sila sa bug-os nga gab-i nga hubo, nga wala sing panapton, kag wala sing habol sa tugnaw.

8Nabasa sila sang mga ulan sang mga bukid, kag nagahakus sang igang tungud nga wala sing pasilongan.

9(May nagaagaw sang ilo gikan sa dughan, kag nagakuha sing inugpalig-on gikan sa imol.)

10Nagalagaw sila nga hubo, nga wala sing panapton; nga gutum, nagadala sila sang mga linaylay;

11nagalana sila sa sulud sang mga dingding sini nga mga tawo; nagalinas sila sang ila mga linasan sang uvas, kag ginauhaw.

12Gikan sa banwa nga madamu sing pumuluyo ang mga tawo nagaugayong, kag ang kalag sang pilason nagasinggit; apang ang Dios wala magsapak sang kabuangan.

13“Ini sila amo ang mga gikan sa nagasumpung batok sa kapawa, wala sila makakilala sang mga dalanon sini, ukon nagapabilin sa iya mga banas.

14Ang manugpatay nagabangon upud sa pamanagbanag, ginapatay niya ang imol kag ang may kinawad-on; kag sa kagab-ihon subong sia sang makawat.

15Ang mata man sang makihilawason nagahulat sang kasisidmon, nga nagasiling, ‘Wala sing mata nga makakita sa akon’; kag sia nagatabon sang iya nawung.

16Sa kadudulman nagaguhab sila sa mga balay; nagabukot sila sa adlawon; wala sila makakilala sang kapawa.

17Kay ang kaagahon sa tanan sa ila subong sang pitipit nga kadudulman; kay nakilala nila ang mga kakugmat sang pitipit nga kadudulman.

18“Nagaagi sila sing madasig sa kadaygan sang mga tubig; ang ila bahin pinakamalaut sa duta; wala sila nagabalik sa dalanon sang mga ulubasan.

19Ang tingadlaw kag init nagapahubas sang mga tubig sang nieve; amo ang ginahimo sang Sheol sa ila nga nakasala.

20Ang tiyan malimot sa iya; ang ulud magakaon sing matam-is sa iya; indi na sia pagdumdumon; kag ang pagkadimatarung balion subong sang kahoy.

21“Ginalamon niya ang baw-as nga wala nagadala, kag wala nagahimo sing maayo sa balo nga babayi.

22Apang ang Dios tungud sang iya gahum nagatipig sang gamhanan; ginapatindug niya ang wala sing kalig-onan sang kabuhi.

23Ang Dios nagahatag sa ila nga manginmalig-on, kag nagasalig sila sa sini; kag ang iya mga mata yara sa mga dalanon nila.

24Ginabayaw sila sa malip-ot nga tion, kag wala na sila; ginapaubus sila kag ginakuha sila sa dalanon subong sang tanan nga iban; ginautud sila subong sang mga ukbung sang mga uhay sang uyas.

25Kon indi ini matuud karon, sin-o bala ang magahimutig sa akon, kag magapakawala sing pulus sang akon hambal?”

← Chapter 23 Jump to: Chapter 25 →