Job 39

Ilonggo (Ang Biblia (1982))

← Chapter 38 Jump to: Chapter 40 →

1“Makahibalo ka bala sang tion kon san-o ang mga kanding nga talonon sang igang nagabata? Ukon makatanda ka bala kon san-o ang mga usa nagabata?

2Makaisip ka bala sang mga bulan sang ila pagdala, ukon makahibalo ka bala sang tion kon magbata sila,

3nga nagabarikutut sila, nagabun-ag sang ila bata, kag ginapagowa nila ang ila mga sakit?

4Ang ila mga tinday nagabakud, nagatubo sila sa wayang; nagalakat sila, kag wala nagabalik.

5“Sin-o bala ang nagapahilway sang asno nga talonon? Sin-o bala ang nagahubad sang gapus sang asno nga madasig,

6nga ang iya puluy-an ginhimo nga kamingawan, kag ang maasin nga duta iya puluy-an?

7Ginakadlawan niya ang kagahud sang banwa; wala sia magpamati sa mga singgit sang manugdumala.

8Ang talaytay sang mga bukid amo ang iya halalban, kag nagapangita sia sang tagsa ka hilaw nga butang.

9“Buut bala ang baka nga talonon mag-alagad sa imo? Magpabilin bala sia sa imo pasungan?

10Makatakud ka bala sang baka nga talonon sa iya higot sa idas, ukon mapakaras bala sia sa mga nalupyakan sa olihi nimo?

11Magasalig ka bala sa iya bangud nga daku ang iya kusug, ukon itugyan mo bala sa iya ang imo buluhaton?

12Magasalig ka bala sa iya nga dalhon niya pauli ang imo binhi, kag magatipon sang uyas sang imo linasan?

13“Ang mga pakpak sang avestruz nagakapaykapay sing binugalon; apang mga kuyus kag bulbul bala sila sang gugma?

14Kay ginabayaan niya sa duta ang iya mga itlog, kag ginapainit sila sa yab-ok,

15nga nagakalipat nga ang tiil makapusa sa ila, ukon nga ang sapat nga talonon makatapak sa ila.

16Mabangis sia sa iya mga piso, subong nga sila daw indi iya; bisan wala sing pulus ang iya pagpangabudlay, wala sia sing kahadluk;

17bangud nga ginkuhaan sia sang Dios sang kaalam, kag wala sia niya paghatagi sing paghangup.

18Sa tion nga magtindug sia sa paghuyab, ginakadlawan niya ang kabayo kag ang iya manugsakay.

19“Nakahatag ka bala sa kabayo sang iya kusug? Nasaputan mo bala ang iya liog sang bungaybungay nga nagakurugkurug?

20Napalumpat mo bala sia subong sang apan? Ang himaya sang iya pusnga makakulugmat.

21Nagapangahig sia sa nalupyakan, kag nagakalipay sa iya kusug; nagagowa sia sa pagsugata sang mga tawo nga lupit sa hinganiban.

22Nagatamay sia sang kahadluk, kag wala mahangawa; wala nagatalikud sa espada.

23Ang baslayan nagakano batok sa iya, ang nagaidlab nga bangkaw kag sumbiling.

24Ginahalunhon niya ang duta sa kabangis kag kasingkal; wala sia nagapati nga ini tonog sang budyong.

25Sa kasunsun nga ang budyong nagatonog, nagasiling sia ‘Aha!’ Ginapanimahoan niya ang inaway sa malayo, ang pagdaguub sang mga pangolo, kag ang sininggit.

26“Nagatimbuuk bala ang dapay sa imo kaalam, kag nagahumlad sang iya mga pakpak nayon sa bagatnan?

27Tungud bala sa imo sogo nga ang aguila nagapaibabaw kag nagahimo sang iya mga pugad sa mataas?

28Sia nagapuyo sa pil-as kag nagahimo sang iya puluy-an sa putokputokan sang pil-as kag sang pamakud.

29Kutub didto makita niya ang dalagiton; ang iya mga mata nagalantaw sini sa malayo.

30Ang iya mga piso nagasupsup sang dugo; kag kon diin ang pinatay, didto sia.”

← Chapter 38 Jump to: Chapter 40 →