Job 31

Ilonggo (Ang Biblia (1982))

← Chapter 30 Jump to: Chapter 32 →

1“Nagapakigkatipan ako sa akon mga mata; paano bala niyan ang pagtolok ko sa ulay?

2Kay ano bala ang bahin ko gikan sa Dios sa ibabaw, kag ang panublion ko gikan sa Makaako sa hitaas?

3Indi bala kalalat-an sa mga dimatarung, kag kalaglagan sa mga manughikot sing kalautan?

4Wala bala niya makita ang akon mga dalanon, kag maisip ang tanan kong tikang?

5“Kon nakalakat ako sa kabutigan, kag ang akon tiil nagdalidali sa limbong;

6(Ipatimbang sa nagakaangay nga timbangan, agud nga mahibaloan sang Dios ang akon pagkatadlong!)

7kon ang akon tikang nakalipas sa dalanon, kag ang akon tagiposoon nagsonod sa akon mga mata, kag kon ang bisan anong dagta nagtapik sa akon mga kamut;

8niyan magsab-og ako, kag iban ang magkaon; kag ipagabut ang patubas sang akon uma.

9“Kon ang akon tagiposoon nahaylo sa babayi, kag nakapuut ako sa ganhaan sang akon isigkatawo;

10niyan pagalinga ang akon asawa sa iban, kag ang iban paludha sa iya.

11Kay ina makangilil-ad nga sala; kalautan ini nga silotan sang mga hukom;

12kay ini kalayo nga nagaupud tubtub sa Kalaglagan, kag magagabut sang tanan kong patubas.

13“Kon gintamay ko ang katarungan sang akon ulipon nga lalaki ukon ulipon ko nga babayi, sang nagsuay sila sa akon;

14ano bala niyan ang akon himoon kon ang Dios magtindug? Kon magduaw sia, ano bala ang akon isabat sa iya?

15Indi bala sia nga naghimo sa akon sa tiyan naghimo sa iya? Kag wala bala ang isa naghimo sa aton sa tiyan?

16“Kon ginpunggan ko ang mga imol sa ila handum, ukon ginpadulum ang mga mata sang balong babayi,

17ukon nakakaon sang akon hungit nga ako lamang, kag wala makakaon sini ang ilo

18(kay kutub sa akon pagkapamatan-on nagtubo sia upud sa akon subong nga upud sa amay, kag kutub sa tiyan sang akon iloy gintuytuyan ko sia);

19kon nakakita ako sing bisan sin-ong nawala tungud sa kakulang sing panapton, ukon nga ang mga nawad-an walay tabon;

20kon ang iya mga balikawang wala magpakamaayo sa akon, kag kon wala sia mapainiti sang bulbul sang akon mga carnero;

21kon ginbayaw ko batok sa ilo ang akon kamut, bangud nga nakita ko ang akon bulig sa gawang;

22niyan ang akon abaga mapopo sa akon luwagluwag, kag ang akon butkon mabali gikan sa tul-an.

23Kay ang kalalat-an gikan sa Dios kakugmat sa akon, kag sa kabangdanan sang iya pagkahari wala ako sing mahimo.

24“Kon nahimo ko ang bulawan nga akon paglaum, ukon nakatawag sa bus-og nga bulawan nga akon salaligan;

25kon nagkalipay ako bangud nga daku ang akon manggad, ukon bangud nga ang akon kamut nakaagum sing madamu;

26kon nagtolok ako sang adlaw sang nagsidlak ini, ukon sang bulan nga nagalakat sa kasilaw,

27kag ang akon tagiposoon ginhaylo sa tago, kag ang akon baba naghaluk sang akon kamut;

28ini man kalautan nga silotan sang mga hukom, kay ginpanghiwala ko kuntani ang Dios nga yara sa ibabaw.

29“Kon nagkalipay ako sa kalaglagan sang nagdumut sa akon, ukon nagpataas sang akon kaugalingon sang nasapwan sia sang malaut

30(wala ko pagtuguti ang akon baba sa pagpakasala sa pagpangayo sang iya kabuhi nga may pagpakamalaut);

31kon ang mga tawo sang akon layanglayang wala makasiling, ‘Sin-o bala ang makakita sing isa nga wala mabusug sang iya kalan-on?’

32(ang manlulugayaw wala magpabilin sa dalan; kondi ginbuksan ko ang akon mga ganhaan sa manlalakat);

33kon kaangay kay Adam gintabonan ko ang akon mga paglalis, sa pagtago sang akon kalautan sa akon sabak,

34bangud nga nahadluk ako sang dakung kadam-an, kag ang pagtamay sang mga panimalay nagpakugmat sa akon, sa bagay nga naghipus ako, kag wala maggowa sa ganhaan—

35O, nga may isa ako nga magpamati sa akon! (Yari ang akon pat-in! magsabat ang Makaako sa akon!) O, nga yari sa akon ang sumbung nga nasulat sang akon kasumpung!

36Sa pagkamatuud pas-anon ko ini sa akon abaga; ihigot ko ini sa akon subong nga purungpurung;

37isaysay ko sa iya ang kadamuon sang akon mga tikang; subong nga principe magapalapit ako sa iya.

38“Kon ang akon duta nagsinggit batok sa akon, kag ang mga idas sini nagahibi sing tingub;

39kon nakakaon ako sang mga bunga sini sa walay cuarta, ukon ginpadulaan sang ila kabuhi ang iya mga tag-iya;

40magtubo ang mga talongon sa baylo sang trigo, kag bahobaho sa baylo sang cebada.” Ang mga polong ni Job natapus.

← Chapter 30 Jump to: Chapter 32 →