Ezekiel 20

Chhattisgarhi

1हमर बंधुवई के सातवां साल के पांचवां महिना के दसवां दिन इसरायल के कुछू अगुवामन यहोवा ले पुछे बर आईन, अऊ ओमन मोर आघू म बईठ गीन।

2तब यहोवा के बचन मोर मेर आईस:

3“हे मनखे के बेटा, इसरायल के अगुवामन ले बात कर अऊ ओमन ला कह, ‘परमपरधान यहोवा ह ये कहत हे: का तुमन मोर ले पुछे बर आय हवव? मोर जिनगी के कसम, मेंह तुमन ला मोर ले पुछे बर नइं दंव, परमपरधान यहोवा ह घोसना करत हे।’

4“का तें ओमन के नियाय करबे? हे मनखे के बेटा, का तें ओमन के नियाय करबे? तब ओमन के पुरखामन के घिनौना काम ओमन ला बता

5अऊ ओमन ले कह, ‘परमपरधान यहोवा ह ये कहत हे: जऊन दिन मेंह इसरायल ला चुने रहेंव, मेंह अपन हांथ उठाके याकूब के संतानमन ले सपथ खाय रहेंव अऊ मिसर देस म अपनआप ला ओमन ऊपर परगट करेंव। हांथ उठाके मेंह ओमन ले कहेंव, “मेंह यहोवा तुम्हर परमेसर अंव।”

6ओही दिन मेंह ओमन ले सपथ खायेंव कि मेंह ओमन ला मिसर देस ले निकालके एक अइसे देस म ले आहूं, जेला मेंह ओमन बर खोजे रहेंव; एक अइसे देस जेमा दूध अऊ मंधरस के धारा बहिथे, अऊ जऊन ह जम्मो देसमन ले सुघर हवय।

7अऊ मेंह ओमन ले कहेंव, “तुमन म ले हर एक जन ओ निकम्मा मूरतीमन ला निकाल फेंकव, जेमन ऊपर तुम्हर आंखी लगे हवय, अऊ मिसर के मूरतीमन ले अपनआप ला असुध झन करव। मेंह यहोवा तुम्हर परमेसर अंव।”

8“ ‘पर ओमन मोर बिरूध बिदरोह करिन अऊ मोर बात ला नइं सुनिन; ओमन ओ निकम्मा मूरतीमन ला नइं फेंकिन, जेमा ओमन के आंखी लगे रिहिस, अऊ न ही ओमन मिसर के मूरतीमन ला छोंड़िन। एकरसेति मेंह कहेंव कि में ओमन ऊपर अपन कोप भड़काहू अऊ मिसर देस म ओमन के बिरूध अपन कोरोध देखाहूं।

9पर अपन नांव के खातिर, में ओमन ला मिसर देस ले निकाल लानेंव। मेंह अइसने एकरसेति करेंव ताकि मोर नांव ओ जाति-जाति के मनखेमन के नजर म अपबितर झन ठहिरय, जेमन के बीच ओमन रहत रिहिन अऊ जेमन के देखत म मेंह अपनआप ला इसरायलीमन ऊपर परगट करे रहेंव।

10एकरसेति मेंह ओमन ला मिसर देस ले निकालके सुन्ना जगह म ले आयेंव।

11मेंह ओमन ला अपन बिधिमन ला देंव अऊ ओमन ला अपन कानूनमन ला बतांय, जेकर यदि कोनो मनखे पालन करथे, त ओह जीयत रहिही।

12मेंह ओमन बर अपन बिसराम दिन घलो ठहिरांय, जऊन ह मोर अऊ ओमन के बीच म एक चिनहां ए, ताकि ओमन जानंय कि में यहोवा ह ओमन ला पबितर बनाय हंव।

13“ ‘तभो ले इसरायल के मनखेमन सुन्ना जगह म मोर ले बिदरोह करिन। ओमन मोर बिधिमन म नइं चलिन अऊ मोर कानूनमन ला नइं मानिन—जेकर पालन यदि कोनो मनखे करथे, त ओह ओमन के दुवारा जीयत रहिही—अऊ ओमन मोर बिसराम दिनमन ला बहुंत अपबितर करिन। एकरसेति मेंह कहेंव कि ओमन ऊपर मोर कोप भड़कही अऊ सुन्ना जगह म ओमन ला नास कर दूहूं।

14पर अपन नांव के खातिर मेंह ओ करेंव जेकर ले मोर नांव ओ जाति-जाति के मनखेमन के नजर म अपबितर झन ठहिरे, जेमन के देखत मेंह ओमन ला निकालके लाय रहेंव।

15हांथ उठाके मेंह ओमन ले सुन्ना जगह म कसम घलो खायेंव कि जऊन देस मेंह ओमन ला दे रहेंव, ओ देस म ओमन ला नइं लानंव—एक अइसने देस जिहां दूध अऊ मंधरस के धारा बोहात हे, जऊन ह जम्मो देसमन ले सुघर हवय—

16काबरकि ओमन मोर कानूनमन ला नइं मानिन अऊ मोर बिधिमन म नइं चलिन अऊ मोर बिसराम दिन ला अपबितर करिन। काबरकि ओमन के मन ह ओमन के मूरतीमन ऊपर लगे रिहिस।

17तभो ले मेंह ओमन ऊपर दया-दिरिस्टी करेंव अऊ ओमन ला नास नइं करेंव या निरजन जगह म ओमन के अन्त नइं करेंव।

18मेंह निरजन जगह म ओमन के लइकामन ले कहेंव, “अपन दाई-ददा के बिधिमन म या ओमन के कानूनमन म झन चलव या ओमन के मूरतीमन ले अपनआप ला असुध झन करव।

19मेंह यहोवा तुम्हर परमेसर अंव; मोर बिधिमन म चलव अऊ धियान देके मोर कानूनमन के पालन करव।

20मोर बिसराम दिन ला पबितर मानव कि ओमन मोर अऊ तुम्हर बीच एक चिनहां ठहिरंय। तब तुमन जानहू कि मेंह यहोवा तुम्हर परमेसर अंव।”

21“ ‘पर ओमन के लइकामन मोर ले बिदरोह करिन: ओमन मोर बिधिमन म नइं चलिन, ओमन मोर कानूनमन के पालन नइं करिन, जेमन के बारे म मेंह कहे रहेंव, “ओ मनखे जऊन ह ओमन के पालन करही, ओह ओमन के दुवारा जीयत रहिही,” अऊ ओमन मोर बिसराम दिन ला अपबितर करिन। एकरसेति मेंह कहेंव ओमन ऊपर मोर कोप भड़कही अऊ निरजन जगह म मेंह अपन कोरोध ओमन ला देखाहूं।

22पर मेंह अपन हांथ ला रोके रखेंव, अऊ अपन नांव के खातिर मेंह ओ करेंव, जेकर कारन मोर नांव ओ जाति-जाति के मनखेमन के नजर म अपबितर झन ठहिरय, जेमन के देखत म मेंह इसरायलीमन ला निकाल लानेंव।

23अपन हांथ उठाके सुन्ना जगह म मेंह ओमन ले सपथ घलो खायेंव कि मेंह ओमन ला जाति-जाति के मनखेमन के बीच बगरा दूहूं अऊ देस-देस म ओमन ला तितिर-बितिर कर दूहूं,

24काबरकि ओमन मोर कानूनमन के पालन नइं करिन पर मोर बिधिमन ला अस्वीकार करिन अऊ मोर बिसराम दिनमन ला अपबितर करिन, अऊ ओमन के आंखी ओमन के दाई-ददा के मूरतीमन म लगे रिहिस।

25एकरसेति मेंह ओमन ला आने बिधि-बिधान देंव, जेमन ठीक नइं रिहिन अऊ ओमन ला अइसे कानून देंव जेकर दुवारा ओमन जीयत नइं रह सकत रिहिन;

26मेंह ओमन ला ओमन के ही भेंटमन के जरिये असुध करेंव—हर एक पहिलऊठा के बलिदान—ताकि मेंह ओमन ला भयभीत करंव अऊ ओमन जानंय कि मेंह यहोवा अंव।’

27“एकरसेति, हे मनखे के बेटा, इसरायल के मनखेमन ले बात कर अऊ ओमन ले कह, ‘परमपरधान यहोवा ह ये कहत हे: येमा घलो तुम्हर पुरखामन मोर ले बिसवासघात करके मोर निन्दा करिन:

28जब मेंह ओमन ला ओ देस म ले आंय, जेला मेंह ओमन ला देय के कसम खाय रहेंव, त ओमन कोनो ऊंचहा पहाड़ी या कोनो पानवाले रूख ला देखके उहां अपन बलिदान अऊ भेंट चघाय लगिन, अऊ अपन खुसबूवाला धूप जलाके पेय-बलिदान चघाय लगिन, जेकर कारन मोर कोरोध ह भड़किस।

29तब मेंह ओमन ले कहेंव: ये ऊंचहा जगह का ए कि तुमन उहां जाथव?’ ” (येला आज तक बामाह कहे जाथे।)

30“एकरसेति इसरायलीमन ले कह: ‘परमपरधान यहोवा ह ये कहत हे: का तुमन अपन पुरखामन सहीं अपनआप ला असुध करहू अऊ ओमन के निकम्मा मूरतीमन बर कामुक होहू?

31जब तुमन अपन भेंट चघाथव—अपन लइकामन ला आगी म बलिदान करथव—त अइसने करे के दुवारा तुमन आज तक अपनआप ला अपन जम्मो मूरतीमन के दुवारा असुध करत आवत हव। त हे इसरायलीमन, का में तुमन ला मोर ले पुछताछ करन दूहूं? मोर जिनगी के कसम, परमपरधान यहोवा ह घोसना करत हे, में तुमन ला मोर ले पुछताछ करे बर नइं दंव।

32“ ‘तुमन कहिथव, “हमन ओ जाति-जाति अऊ संसार के मनखेमन सहीं होय चाहथन, जेमन कठवा अऊ पथरा के सेवा करथें।” पर तुम्हर मन म जऊन बात हवय, ओह कभू पूरा नइं होवय।

33मोर जिनगी के कसम, परमपरधान यहोवा ह घोसना करत हे, में सक्तिसाली हांथ अऊ बढ़ाय हुए बाहां अऊ भड़के हुए कोप के संग तुम्हर ऊपर सासन करहूं।

34मेंह तुमन ला ओ जाति-जाति के मनखेमन के बीच म ले लानहूं अऊ ओ देसमन ले लानके तुमन ला इकट्ठा करहूं, जिहां तुमन तितिर-बितिर हो गे हव—मेंह तुमन ला सक्तिसाली हांथ अऊ बढ़ाय हुए बाहां अऊ भड़के हुए कोप के संग इकट्ठा करहूं।

35मेंह तुमन ला जाति-जाति के मनखेमन के निरजन जगह म ले आहूं अऊ उहां, आमने-सामने मेंह तुम्हर नियाय करहूं।

36जऊन किसम ले, मेंह मिसर देस के सुन्ना जगह म तुम्हर पुरखामन के नियाय करे रहेंव, ओही किसम ले, मेंह तुम्हर नियाय करहूं, परमपरधान यहोवा ह घोसना करत हे।

37जब तुमन मोर लउठी के अधीन होके चलहू, त मोर धियान तुम्हर ऊपर रहिही, अऊ में तुमन ला करार के बंधना म बांधहू।

38मेंह तुमन ला ओमन ले हटाके सुध करहूं, जेमन मोर बिरूध बिदरोह अऊ अपराध करथें। हालाकि मेंह ओमन ला ओ देस ले निकालके लानहूं, जिहां ओमन रहत हवंय, तभो ले ओमन इसरायल देस म नइं जाय सकहीं। तब तुमन जानहू कि मेंह यहोवा अंव।

39“ ‘हे इसरायल के मनखेमन, जहां तक तुम्हर बात ए, परमपरधान यहोवा ह ये कहत हे: तुमन म ले हर एक जन जावव अऊ अपन-अपन मूरतीमन के सेवा करव! पर बाद म तुमन मोर बात ला जरूर सुनहू अऊ मोर पबितर नांव ला अपन भेंट अऊ मूरतीमन के दुवारा फेर अपबितर नइं करहू।

40काबरकि परमपरधान यहोवा ह घोसना करत हे, मोर पबितर पहाड़, इसरायल के ऊंचहा पहाड़ ऊपर, उहां देस म, इसरायल के जम्मो मनखेमन मोर सेवा करहीं, अऊ उहां में ओमन ला स्वीकार करहूं। उहां मेंह तुम्हर भेंट अऊ तुम्हर उत्तम चीजमन ला तुम्हर जम्मो पबितर बलिदानमन संग लूहूं।

41मेंह तुमन ला एक खुसबूवाला धूप के रूप म स्वीकार करहूं, जब में तुमन ला जाति-जाति के मनखेमन के बीच ले निकाल लानहूं अऊ ओ देसमन ले तुमन ला इकट्ठा करहूं, जिहां तुमन तितिर-बितिर हो गे हवव, अऊ में जाति-जाति के मनखेमन के नजर म तुम्हर जरिये पबितर ठहिराय जाहूं।

42तब तुमन जानहू कि मेंह यहोवा अंव, जब में तुमन ला इसरायल देस म ले आहूं, ओ देस जेला मेंह तुम्हर पुरखामन ला देय बर हांथ उठाके सपथ खाय रहेंव।

43उहां तुमन अपन चालचलन अऊ अपन जम्मो काममन ला सुरता करहू, जेमन के दुवारा तुमन अपनआप ला असुध करे हव, अऊ अपन दुवारा करे गय जम्मो दुस्ट काममन के कारन, तुमन अपनआप ले घिन करहू।

44हे इसरायल के मनखेमन, जब मेंह तुम्हर दुस्ट काम अऊ तुम्हर खराप चालचलन के मुताबिक नइं, पर अपन नांव के हित म तुमन ले बरताव करहूं, तब तुमन जानहू कि मेंह यहोवा अंव, परमपरधान यहोवा ह घोसना करत हे।’ ”

45यहोवा के ये बचन मोर मेर आईस:

46“हे मनखे के बेटा, अपन मुहूं ला दक्खिन कोति कर; दक्खिन के बिरोध म परचार कर, अऊ दक्खिन देस के जंगल के बिरूध अगमबानी कर।

47दक्खिन के जंगल ला कह: ‘यहोवा के बचन ला सुनव। परमपरधान यहोवा ह ये कहत हे: मेंह तोर म आगी लगानेचवाला हंव, अऊ येह तोर हरियर अऊ सूखा जम्मो रूखमन ला जलाके नास कर दीही। धधकत जुवाला ह नइं बुताही, अऊ दक्खिन ले लेके उत्तर तक हर चेहरा येकर कारन झुलस जाही।

48हर एक जन ह देखही कि में यहोवा ह येमा आगी लगाय हंव; येह नइं बुताही।’ ”

49तब मेंह कहेंव, “हे परमपरधान यहोवा, ओ मनखेमन मोर बारे म कहत हें, ‘का ओह सिरिप पटंतर ही नइं कहत हे?’ ”

← Chapter 19 Jump to: Chapter 21 →