Ezekiel 48

Chhattisgarhi

← Chapter 47 Jump to:

1“सूची म लिखे गय गोत्र के नांव ये अंय: “उत्तरी सीमना म, दान के एक भाग होही; येह हेतलोन सहर के रद्दा के पाछू लेबो-हमात तक जाही; हसर-एनान सहर अऊ हमात ले लगे दमिस्क के उत्तरी सीमना येकर सीमना के भाग होही, जऊन ह पूरब कोति ले पछिम तक होही।

2आसेर के एक भाग होही; येकर सीमना पूरब ले पछिम तक दान के सीमना ले लगे होही।

3आसेर के सीमना ले लगके, पूरब ले पछिम तक नपताली के एक भाग होही।

4नपताली के सीमना ले लगके, पूरब ले पछिम तक मनस्से के एक भाग होही।

5मनस्से के सीमना ले लगके, पूरब ले पछिम तक एपरैम के एक भाग होही।

6एपरैम के सीमना ले लगके, पूरब ले पछिम तक रूबेन के एक भाग होही।

7रूबेन के सीमना ले लगके, पूरब ले पछिम तक यहूदा के एक भाग होही।

8“यहूदा के सीमना ले लगके, पूरब ले पछिम तक एक भाग होही, जेला तें एक बिसेस भेंट के रूप म अरपन करबे। येकर चौड़ई 25,000 क्यूबीट, अऊ पूरब ले लेके पछिम तक येकर लम्बई कोनो एक गोत्र ला दिये गय भाग के बरोबर होही; ये भाग के बीच म पबितर-स्थान होही।

9“जऊन बिसेस भाग, तेंह यहोवा ला अरपन करबे, ओकर लम्बई 25,000 क्यूबीट अऊ चौड़ई 10,000 क्यूबीट होही।

10येह पुरोहितमन बर पबितर भाग होही। उत्तर कोति येकर लम्बई 25,000 क्यूबीट, पछिम कोति येकर चौड़ई 10,000 क्यूबीट, पूरब कोति येकर चौड़ई 10,000 क्यूबीट अऊ दक्खिन कोति येकर लम्बई 25,000 क्यूबीट होही। येकर मांझा म यहोवा के पबितर-स्थान होही।

11ये भाग ह सादोक के बंस के ओ पबितर करे गय पुरोहितमन बर होही, जेमन मोर सेवा करे म बिसवासयोग्य रिहिन अऊ ओ लेवीमन सहीं नइं भटकिन, जेमन इसरायलीमन के भटके के बेरा, भटक गे रिहिन।

12देस के पबितर भाग ले येह ओमन बर एक बिसेस भेंट होही, एक महा पबितर भाग, जऊन ह लेवीमन के सीमना ले लगे होही।

13“पुरोहितमन के इलाका ले लगे एक भाग लेवीमन बर होही, जऊन ह 25,000 क्यूबीट लम्बा अऊ 10,000 क्यूबीट चौड़ा होही। येकर पूरा लम्बई 25,000 क्यूबीट अऊ चौड़ई 10,000 क्यूबीट होही।

14ओमन येला न तो बेचंय अऊ न ही येकर कोनो भाग ला अदला-बदली करंय। येह देस के सबले बने भाग ए अऊ कोनो भी हालत म येला आने मन के हांथ म झन देय जावय, काबरकि येह यहोवा बर पबितर अय।

15“बचे 5,000 क्यूबीट चौड़ा अऊ 25,000 क्यूबीट लम्बा भाग ह सहर के सधारन उपयोग बर, घर अऊ चरागन बर होही। सहर ह येकर मांझा म होही

16अऊ येकर नाप अइसने होही: उत्तर कोति 4,500 क्यूबीट, दक्खिन कोति 4,500 क्यूबीट, पूरब कोति 4,500 क्यूबीट अऊ पछिम कोति 4,500 क्यूबीट।

17सहर के चरागन बर भुइयां ह उत्तर कोति 250 क्यूबीट, दक्खिन कोति 250 क्यूबीट, पूरब कोति 250 क्यूबीट, अऊ पछिम कोति 250 क्यूबीट होही।

18पबितर भाग के सीमना ले लगे जऊन बचे भाग होही अऊ पबितर भाग के लम्बई म होही, ओह पूरब कोति 10,000 क्यूबीट अऊ पछिम कोति 10,000 क्यूबीट होही। येकर ऊपज ले सहर के काम करइयामन ला जेवन मिलही।

19सहर के जऊन काम करइयामन येमा खेती-बारी करहीं, ओमन इसरायल के जम्मो गोत्रमन ले आहीं।

20ये पूरा भाग ह वर्गाकार होही, हर एक कोति 25,000 क्यूबीट। एक बिसेस भेंट के रूप म, तें पबितर भाग ला, सहर के संपत्ति के संग अलग रखबे।

21“पबितर भाग ले बने इलाका के दूनों कोति जऊन भाग बच जाथे, ओह अऊ सहर के संपत्ति हाकिम के होही। येह पबितर भाग ले 25,000 क्यूबीट पूरब के सीमना कोति अऊ 25,000 क्यूबीट पछिम के सीमना कोति फईले होही। ये दूनों भाग हाकिम के होहीं, जेमन गोत्र के भागमन के लम्बई म होहीं, अऊ येमन के मांझा म पबितर भाग के संग मंदिर के पबितर-स्थान होही।

22ये किसम ले लेवीमन के संपत्ति अऊ सहर के संपत्ति ओ इलाका म होही, जऊन ह हाकिम के होही। हाकिम के भाग यहूदा के सीमना अऊ बिनयामीन के सीमना के बीच म होही।

23“बाकि गोत्रमन के भाग ह ये किसम ले होही: “पूरब कोति ले लेके पछिम तक फईले एक भाग बिनयामीन के होही।

24बिनयामीन के इलाका के सीमना ले लगके पूरब ले पछिम कोति एक भाग सिमोन के होही।

25सिमोन के भाग के सीमना ले लगके पूरब ले पछिम कोति एक भाग इस्साकार के होही।

26इस्साकार के भाग के सीमना ले लगके पूरब ले पछिम कोति एक भाग जबूलून के होही।

27जबूलून के भाग के सीमना ले लगके पूरब ले पछिम कोति एक भाग गाद के होही।

28गाद के दक्खिनी सीमना दक्खिन कोति तामार ले लेके मरीबा-कादेस के पानी के सोता तक जाही, तब मिसर के नरवा ले होवत भूमध्य सागर तक होही।

29“येह ओ देस ए, जेला तें इसरायल के गोत्रमन ला एक उत्तराधिकार के रूप म बांट देबे, अऊ येमन ओमन के भाग होहीं,” परमपरधान यहोवा ह घोसना करत हे।

30“येमन सहर ले बाहिर निकले के दुवारमन होहीं: “उत्तर कोति ले सुरू होके, जेकर लम्बई 4,500 क्यूबीट हवय,

31सहर के दुवारमन ला इसरायल के गोत्रमन के नांव दिये जाही। उत्तर कोति तीन ठन दुवारमन के नांव रूबेन के दुवार, यहूदा के दुवार अऊ लेवी के दुवार होही।

32पूरब कोति, जेकर लम्बई 4,500 क्यूबीट हवय, तीन ठन दुवार होहीं: यूसुफ के दुवार, बिनयामीन के दुवार अऊ दान के दुवार।

33दक्खिन कोति, जेकर नाप 4,500 क्यूबीट हवय, तीन ठन दुवार होहीं: सिमोन के दुवार, इस्साकार के दुवार अऊ जबूलून के दुवार।

34पछिम कोति, जेकर लम्बई 4,500 क्यूबीट हवय, तीन ठन दुवार होहीं: गाद के दुवार, आसेर के दुवार अऊ नपताली के दुवार।

35“चारों कोति के दूरी 18,000 क्यूबीट होही। “अऊ ओ समय ले सहर के नांव होही, ‘यहोवा उहां हवय।’ ”

← Chapter 47 Jump to: