Galatians 4

ibibio

← Chapter 3 Jump to: Chapter 5 →

1Se ami ntañ ado ke adaña ini a-adiaakpa adooho etəkayịn, ukpəhọ ibaaha ke atu anye mme afʌn, akpesʌk ado anye anieeghe ukeed se ete ekekpa ekpọñ.

2Ana anye asịne ke idak ukara mme andikama anye mme mbon se ekeyak afịd ñkpọ esịn ke ubọk tutu ini e-ete amọ akenịmme adikem.

3Kpa ntodo ñko, ke idaha a-ñnyịn ikidoññoke ntəkayịn ikibañña ke ufʌn ke idak mme ibed ukara ederimbod.

4Ado ke ini amaakedikem ayọhọ-ayọhọ, Abasi amaadọñ Ayịn amọ a-akemanake ato awonwaan, amana ke idak ibed,

5nọ adifakka mbon e-ebaaha ke idak ibed, nọ ñnyịn ikan ibọ ayọọhọ unen nditọ.

6Sia ndufo edoñño nditọ, Abasi amaadọñ Sịbidịd Ayịn amọ isịn ñnyịn ke esịd, Sịbidịd a-asiooho uyo akood “Abba,” Ete.

7Ke ntodo afo udooho aba afʌn, ado Ayịn, ndin sia afo adooho Ayịn, Abasi unam fiin ñko adiaakpa.

8Akpa, ke ini a-ndufo mmiikidiọọñọke Abasi, ndufo ekedoñño ifʌn enọ mbon e-edooho ke idem ammọ, idoññoke mme abasi.

9Ado idahami emaediọọñọ Abasi, ke editʌm ntañ Abasi idiọọñọ ndufo, nsinam ekanna edem emaana ebịne mme ntək mmem-mmem ndiọi sịbidịd edo? Eyem ammọ emaana isịn ndufo ke ufʌn?

10Ndufo esʌk ese mme akpan usen, mme afiọñ ye mme ini ye mme isua.

11Ndịk annam miin ibaña ndufo, sia adiba nte afịd ufen mmi ke idem ndufo ababaha.

12Ami mmikpe ndufo ubọk nditọete, ekappa eba nte ami, sia ami mmaakappa mba nte ndufo. Ndufo innamma miin idiọọkñkpọ.

13Nte a-ndufo emaediọọñọ akedo ke ntak udọñọ ke ami ñkekwọọrọ ikọ inọ ndufo ke akpa ifed.

14Akpesʌk ado nte udọñọ mmi akedooho nte ñkpọ idomo inọọ ndufo, ndufo ikiñkamake miin nsak-nsak, utu ke ado emaedaara edidi mmi nte ñkedo enyere Abasi; nte ñkedo Krais Yisọs ke idem amọ.

15Nso-o ikitịppe inọ afịd inemesịd ndufo? Ami mmekeme editañ ikọ ntiense mbo ke akpedooho emaekan enam ntodo, ekpaekesiooño mme anyen ndufo ennọ miin.

16Nte mmekappa ndo asua ndufo ke edidọkkọ ndufo akpanikọ?

17Mbon awo ado e-enekke esịn idem ke edidʌt ndufo nnọ idem ammọ ado idooho ke eti. Se ammọ eyem ado edidiañña ndufo ikpọñ ñnyịn, nọ ato do ndufo ekappa ekeene ammọ afịd-afịd.

18Afọfọn edinekke nsịn idem adieke adooho ke eti ntak, mme edinyʌñ nnam ntodo afịd ini, ado idooho ke mmaadiba ye ndufo kpọd.

19Ndima nditọ mmi, a-adooho ke ntak ndufo ami mmaana mba ke ubiak adimaana mman ndufo tutu ebot Krais ke esịd ndufo.

20Ñkpaama adieke ñkpekanna ediba mme ndufo idahami ñnyʌñ ñkpəhọ uyo mmi, sia idem a-anekeke añkpa miin ibaña ndufo.

21Indọkọ miin, ndufo e-eyemme ediba ke idak ibed, ndufo idiọọñọke se ibed atañ?

22Sia ewed ebo ke Ebraham akenie nditọ ideen iba, keed akemana ato afʌn awonwaan, anye ako akemana ato amanaisọñ awonwaan.

23Ayịn a-afʌn awonwaan akemanna ke ñkaña usʌñ; ado ayịn a-amanaisọñ awonwaan akemanna adi ato ibọọrọ enwọñọ.

24Eekeme edidat mme ñkpọ ami nte ñke, sia mme ibaan ami eda enọ nsio-nsio edioomo iba. Akaaña keed ato Abod Sainai anyʌñ aman nditọ e-ediidoñño ifʌn: anye ami ado Haka.

25Ndin Haka ada anọ Abod Sainai ke Arebia a-anyʌññọ aba nte abio Yerusedem abio mfịn, sia anye asịne ke ufʌn mme nditọ amọ.

26Ado Yerusedem a-abaaha ke anyọñ idooho afʌn ndin anye ado eka ñnyịn.

27Sia ewewet: “Nem esịd, O ada, afo a-akenam muumanna ayịn: nsio ñkpo idaara nyʌñ bọọñ ke ekamba uyio; nyʌñ sio ñkpo afo a-akenam mmuukoppo ubiak uman; sia nditọ awonwaan a-amiinieeghe ebe ewak ekan ake andinie ebe.”

28Idahami ndufo, nditọete, nte Aisik, edoñño nditọ enwọñọ,

29Ke ini ado ayịn a-akemanake ke ñkaña usʌñ amaatʌkkọ ayịn a-akemanake ato adudu Sịbidịd. Ado ukem idahami.

30Ado nso-o ke ñwed Abasi atañ? Bịne afʌn awonwaan ado sio mme ayịn amọ, sia ayịn afʌn awonwaan tutu amama idiiwaanake ñkpọ ke edidia akpa mme ayịn amanaisọñ awonwaan.

31Ke ntodo, nditọete, ñnyịn idooho nditọ afʌn awonwaan, ido ake amanaisọñ awonwaan.

← Chapter 3 Jump to: Chapter 5 →