Galatians 5

ibibio

← Chapter 4 Jump to: Chapter 6 →

1Ke ntak adinam ñnyịn ido mme nditọ amanaisọñ ke Krais akisiooño ñnyịn ke ufʌn. Sọọñọ da, ndin, kuumaana uben akpọnọ ufʌn ukọñọ.

2Wet ikọ mmi nịm, ami Bọọd ntañ mbo ke emaeyak inịm ndufo mboppo, Krais idiinieeghe ufʌn ndomokeed inọ ndufo.

3Nsʌk mmaana ntañ nnọ afịd se iyak idem ammọ inọ unịm mboppo ke e-emaana etịmme ekekpono afịd ibed.

4Ndufo e-enwanake edibọ utoppo ikpe nto ke ibed emaidiañña ndufo ekpọñ Krais; ndufo emewuọ ekpọñ mfọn.

5Ado ke mbuọdidem ye ke ñnyekidem ñnyịn isʌk ibet mme nti ido a-ñnyịn idotto anyen ibaña ato ke Sịbidịd.

6Sia ke Krais Yisọs adinịm mboppo mme aditre adinịm mboppo ibaaha ufọn ndomokeed. Ñkukwere ñkpọ a-abaaha ufọn ado mbuọdidem e-ekịtte eto ima.

7Ndufo ekefeghe eti itọk. Anie awo ikikpịkke ndufo iso ibo ikiinịm se ido akpanikọ?

8Utọ ukpek ado itooho anye i-ikoodo ndufo.

9Etək yis asinam afịd eboho uyo atịt.

10Ami mmenie isọñesịd ke Abọọñ mbo ke ndufo idiidʌkkọ usʌñ mfen. Anye i-itoppo ndufo asịn ke ndutịme, ake anye akpedodo, ayaabọ ufen.

11Nditọete, adieke adooho nsʌk ñkwọrọ adinịm mboppo, ntak e-esʌkkọ eduntʌkkọ miin-e? Ke utọ usʌñ ado ñkpọ iyadesịd ke krọs ibaaha aba.

12Amaado mme andisịn ndutịme ado, ñkpaama ammọ edusuunọ idem ammọ!

13Ndufo, nditọete mmi, ekikood ndufo ebo nọ ebọkkọ. Ado ikiidat ubọkkọ ndufo inam idiọọkñkpọ, utu ke ado inam ñkpọ inọ emọ-emọ ke ima.

14Afịd-afịd ibed esaña ekedʌk ke ibed keed kpọd: “Ma mbọhọidʌñ mfo nte idem mfo.”

15Adieke ekaaha iso ke adidom ñnyʌñ mbiaad emọ-emọ, ikpeme, mmiidooho ntodo eyaeduwotto idem ndufo.

16Ke ntodo, ami mbo, idu uwem ke Sịbidịd, ndin ndufo idiibọọhọ uyʌkkọ ke mme udọñ abʌkidem.

17Sia abʌkidem ayem se Sịbidịd miimaaha, ndin Sịbidịd inyʌññọ iwʌrọ se abʌkidem ama. Sịbidịd mme uduod idiọọkñkpọ eba ke ndusuaara, ke ntodo ukanna unam se afo ayem inam.

18Ado adieke afo abaaha ke ndadusʌñ Sịbidịd, afo ubaaha ke idak ibed.

19Mme utom abʌkidem eba anwa-anwa: use, efịbe, unana adisana uwem;

20ukpono ndem ye ufọt ifọd, unana mfadidem, usua, ntịme, ufịb, ubakka

21ye ufịb, edikpa mmịn, usiak uduọd ñka mfen, udia uwem ye mme ndiọi uwem mfen. Ami mmetañ inọ ndufo nte mmaaketatañ, mbon e-eduuho uwem ntom idiidʌkkọ ke abio ubọọñ Abasi.

22Ado mfịd Sịbidịd ado ima, idadesịd, emem, ime, mfọnido, eti uwem, mbuọdidem,

23ifuuro-ifuuro uwem mme mfadidem. Mbed ndomokeed ibịọñọke mme ñkpọ ntodo.

24Mbon e-ebaaha ke Krais Yisọs emaekọñ abʌkidem ye afịd nduwʌd ye idiọọk itọñ ammọ ke krọs.

25Sia ñnyịn iduuho ke Sịbidịd, yak ñnyịn isaña ke Sịbidịd.

26Yak ñnyịn ikuukappa ikịt idem, inam esịd ayat emọ-emọ ñnyʌñ nnie ufịb ye emọ-emọ awo.

← Chapter 4 Jump to: Chapter 6 →